Susuga Rev Elder Tauaaga ma le faletua Senerita Mataafa ma le au usufono a le Matagaluega EFKS Kuiniselani i Saute ua tuuvaa atu nisi i le fonotele i Malua

Susuga Rev Elder Tauaaga ma le faletua Senerita Mataafa ma le au usufono a le Matagaluega EFKS Kuiniselani i Saute ua tuuvaa atu nisi i le fonotele i Malua

O le vaiaso lenei ua amata gasolo atu ai i Samoa usugafono a le ekalesia EFKS e faasauni ma tapena mo le fonotele a le ekalesia aoao i Malua e pei ona masani ai le vaitaimi lenei i tausaga taitasi.

O le Aso Lua na tuuvaa atu ai i Samoa le susuga i le Toeaina Faatonu ia Rev Tauaaga Mataafa o le Matagaluega EFKS Kuiniselani i Saute, o le Aso Toonai gasolo nisi e iai le Tiakono toeaina Ofoia Lemamea ma Apaula faapea nisi sui usufono ao le faletua ia Senerita Mataafa ma isi e malaga i le Aso Sa tonu e faapitoa mo Tina.

O nisi o sui e aofia ai le Sui tupulaga, sui usufono Tina ma le komiti o fe’au eseese a le Matagaluega le susuga ia Mataafa Samuelu Mataafa. E iai vaega e toe fia faaleleia ma tapena o maota o le au usufono e afua ai na vave malaga nisi ae lei tatalaina le fonotele.

O le matagaluega a Kuiniselani i Saute Muagututi’a Lilomaiava o ia o le usufono (o le aoao fesoasoani). O le usufono tina o Lotovale, Sui usufono tupulaga o Masi Anesone, aemaise Komiti o faletua o le autoeaiina le Faletua ia Senerita Mataafa.

E lua matagaluega EFKS i Kuiniselani, e tofu lava le matagaluega ma sui i totonu o le Komiti a le ekalesia aoao e pei o komiti o a’oga, atina’e, komiti o tupe ma faamisionare ma isi tofiga. O le matagaluega a Kuiniselani i Saute e taitaia e le susuga i le toeaina faatonu ia Rev Elder Tauaaga ma le faletua ia Senerita Mataafa, e iai pulega e lua (Saute ma Logan). O le Pulega a Logan o loo iai le isi toeaina le susuga ia Rev Elder Ionatana ma le faletua ia Alapeta Faaiuaso.

O le matagaluega a Kuiniselani o loo taitaia e le susuga ia Rev Elder Lauie ma le faletua ia Autalaga Lupematasila i le itu i Matu. O le susuga ia Rev Lance ma le faletua ia Satelite Tautiepa o loo tausia le pulega a Sisifo.  Ua amata malaga uma foi sui o matagaluega nei e lua i le vaiaso lenei aua le tapenaina o maota aua le usugafono o lenei tausaga.

O nisi o tofi o loo tauave e susuga i toeaiina ia Rev Tauaaga Mataafa ma Rev Lauie Lupematasila, e aofia ai le Komiti o Malua, faapea komiti o mataupu tau le aufaigaluega.

O le fonotaga talu ai na usuia ia Mati a le au toeaiina ae leai ni iuga e faia ai, na ona fefulisa’i finagalo ae o le iuga faatoa maua uma i le fonotele masani lenei ia Me, o mataupu uma e tele ina faamaonia ai i le fonotele lenei.

E iai nisi ekalesia na faataunuuina i le Aso Sa ua tuanai a latou Aso Sa o Tina ona e auai atu i le fonotele i Samoa.  Ua faamoemoe o le uluai vaiaso o le fonotele o le a amataina i, fono a komiti, fono mafutaga aoao a Tina, ma le fono TPT poo le tupulaga talavaou.

O le Aso Toonai o le vaiaso muamau o le fono o le a faataunuuina ai le faauuga  o faifeau ua i’u mai i le Kolisi faa Faifeau i Malua, ona sosoo ai lea ma le sauniga lotu o le Aso Sa. E pei lava ona masani ai le vaiaso lona lua e faai’u ma usuia ai le fonotele.

A’o toesea le susuga i le Toeaina Faatonu ia Rev Tauaana Mataafa ma le faletua i le fono i Malua, o le a ta’ita’ia le lotu o le Aso Sa o Tina a le latou ekalesia e le susuga ia Rev Tapenaga Reupena. Ia tuu atu i le Atua le usugafono a le Toeaina Faatonu faapea le au usufono atoa, ia toe taliu mai i fanua ma le manuia.

Comments

comments