Ua silasila le minisita o leoleo ma falepuipui atoa ai ma le pulega o falepuipui, i le talosaga a pagota i Tafaigata na momono ane i le ta’ita’i o le atunuu Tuilaepa Lupesoliai Sailele Malielegaoi, ina ua agai atu e saunoa i le tatalaga aloaia o le faletusi (library) faapitoa mo pagota o loo tuli o latou faasalaga.
O le talosaga, ia alofagia e le malo le toe tatala o faamanuiaga lea e ave i pagota i faaiuga o vaiaso poo le tatala o pagota e fai Aso Sa io latou aiga. O faamanuiaga nei na faaselemutu lona toe faamatuu atu ina ua avea lea ma avanoa e sosola ai isi pagota ma le toe foi atu i totonu o le falepuipui. E le gata i lea o le avanoa e mafuta ai ma aiga ae uma ane ua toe solitulafono.
Saunoa le Palemia, e na’o Samoa lava le atunuu i le lalolagi atoa o loo latou faia le tulaga lea o le tatala o pagota e Aso Sa i tua io latou aiga, ma e foliga mai o Samoa o se atunuu e ese le lalolagi lea e iai, ua o se parataiso ona o le tuu avanoa i pagota.
Ta’ua e Tuilaepa o le mataupu e pei ona talosagaina e pagota, e le o se mataupu faigofie, ma o se mataupu maaleale foi, auā afai nei ae toe tatala le avanoa lenei o lona uiga, e tatau la i le komiti o palola ona silasila lelei i le filiina oi latou e tatau ona ave iai le avanoa.
“E le tatau i le faamasino sili ma i latou o loo i le komiti ona toe ave avanoa faapea i le au gaoi, tagata fasioti tagata, auā o lipoti ua maua mai, e o loa i tua, maua mai lipoti ua osofaia se fale o se isi e le gata i lea ua toe molia atu i le toe sauaina o latou taitoalua ma latou fanau.”
“E fa’i foi o le alofa, ae ua avea ma auala e faaaogā ai e tagata e kami ane ai i tua isi fuafuaga le talafeagai, o lona uiga e tatau ona tuu ai pea i uta, aua o faaeteetega e lelei le alofa ae iai ona faaeteetega na e le mafai ona toe alofia.”
Saunoa Tuilaepa, e ui ina faaui ane ia te ia le talosaga a pagota i le mataupu, peitai o loo manino lava faiga faavae o mataupu faapenei. “O mataupu ia e tatau ona tuuina atu i le ofisa sili o le falepuipui e silasila iai ona faatoa aumai lea i totonu e iloilo e le Kapeneta pe toe tuuina atu se avanoa pe leai.”
O le amataga o le tausaga lenei, na aveese ai faamanuiaga mo pagota e Aso Sa i tua i o latou aiga i faaiuga o vaiaso. O le faatonuga mai i le taitai o le atunuu, ina ua fesiligia e le toatele o le atunuu, le tatala i tua o le susuga Tagaloasa Filipaina i lona aiga, i le tausaga talu ai, ae o loo faafalepuipui i se tasi o solitulafono ogaoga.
O le faaiuga foi lea a le komiti o palola o le palola i tua o Tagaloasa, ua aafia atu ai ma le toe iloiloina o faamanuiaga mo isi pagota. O le faaiuga o le toe iloiloga lea ua faasā ai loa ma faamanuiaga o Aso Sa i tua o pagota uma o loo taofia i Tafaigata.
Peitai e pau le faamanuiaga o loo tatala nei, o faamanuiaga ua faaigoaina o “special leave” poo livi faapitoa, ma e faaaogāina lea pe a fai ua matuā gasegase ua manaomia ai le tausiga a le aiga, ia poo le maliu o le tamā poo le tina. E le mafai la ona alu na’o le pagota, e tatau ona o faatasi ma se leoleo, e na te mataituina ana gaioiga.
E tusa ma le 80 le aofai o pagota na tatala i tua i tuutuuga o le palola i le vaitaimi o le Kerisimasi, ma o se faaiuga na faaalia e le Palemia le faavalevalea ona faatino, ona sa le tatau ona aofia ai ma pagota o loo tuli o latou faasalaga mamafa i le falepuipui. O le taimi nei e tusa ma le 400 pagota o loo i le falepuipui i Tafaigata.
