Ua ta‘ape pāpā ua tafea le tauofe, ua to le timu ma ua taloto moemoe ina ua tuua le malo e le afioga ia Nanai Tietie Seturo Nanai Tolovae Tuilaepa ile maota gasegase i Red Cliffe ile aso 26 o Me 2016. Amuia ē faanoanoa auā e faamafanafanaina i latou!
O le lāgia lava lea o le paia ile aiga Tauaana ma le latou tama, o le lāgia foi lea o Matautu o le maota e afio ai le matua o Nanai ma le paia o le latou aiga Sa Nanai.
O le lāgia lava foi lea o le Falefitu o le Atitagaloa e afio ai le Aiga Tauaana ma le latou Tama. O le usuia foi lea o le fono ia Galuefa ma le tula o Salogo ma tagata o le vavau ma upu ia te oe Falelatai. O ona sauniga faaleaiga na faia ile po o le Aso Tofi sa taitaia lava e lana faafeagaia, le susuga ia Rev Osa Nanai faatasi ma nisi o lupe faalele a le aiga. O Rev Osa Nanai o le leoleo mamoe na ia fafagaina le soifua faaleagaga o le tamā.
O le taeao o le Aso Faraile na faia ai ona toe sauniga e le ekalesia lava EFKS na taitaia e le susuga ile Toeaina o le Pulega le susuga ia Rev Lauie Lupematasila ma nisi foi faafeagaiga sa fai sao. E lasi ma talalasi le anoanoai o talaaga ma molimau lelei na saafi ai le fanau, le faletua faapea aiga aemaise o auauna a le Atua ile soifua auauna o le afioga ia Nanai Tietie Seturo ua tele ina molimauina e nisi e ala i lona tautua lotu ma le tausi faifeau aemaise o totonu o lona ia aiga. Na saunoa le susuga ile toeaina ia Rev Lauie Lupematasila i lana molimau ile aso faaiu, “O Nanai Tietie o se tamā e lē fia poto ae poto, o se tamā e lē fia malosi ae toa.”
Na saunoa foi le susuga ia Rev Osa Nanai i le tele o galuega lelei na faia e lenei tamā e ala ile faatuina o le ekalesia ua galulue ai ona e ui ina sui suafa ae o le ekalesia na faavae mai e le afioga ia Nanai Tietie Seturo.
O le fetalaiga ia Toomaga Nanai sa feagai ma faaaloaloga e fai ma sui o aiga na lua ae fetalai Tiatia Ualesi e faafetaia le paia i aiga ona o faaaloaloga ma fata luga fata lalo ile maualuluga ile po o le sauniga faaleaiga.
O le afioga ia Misa Leulumoega (mai Melepone) o le laau na fausia na fai ma fofoga o le paia i aiga e faaleoina faaaloaloga auā faafeagaiga ma auauna a le Atua sa auai e molimauina peau faamavae o le tamā Matua ia Nanai Tietie Seturo.
O le fofoga o le ekalesia EFKS a Caboolture le tofa ia Sitagata sa tali fuaitau.
O le afioga ia Nanai Tietie Seturo ma le faletua ia Falefaoaiga e mai le alalafaga o Matautu Falelatai e to‘a 15 le nofoaalo ma le toatele o grandchildren ma greatgrandchildren ua tupu ma ola ai le aiga.
Na foi le gogo ma si ana i‘a auā na tofusia e lē gata o taumafa faaleagaga ae sili ai na laulelei i taumafa faaletino i le lava tapena o le Uncle Sam’s Take Away (Poulava Sam & Lona Matautia) mo le taumafataga.
