Talofa! Ua fulisia laau mata ma ua tulolo le ‘olo punimatagi, ina ua tuumalo le afioga ia Fuafaasaga o le sā fai ma pae ma auli i totonu o le aiga ma le Ekalesia.
O le Aso Toonai, aso 21 o Iulai na faia ai toe sauniga o le tausi ia Neli Taua Valovalo, o le paia lava lea i le Falefia o Alii, o le maopu ma le Gataiala, upu ia te oulua Nofoa ma le mamalu ia te oe Saleupolu.
Na faamanavaina galuega a le tausi ia Neli i le ‘afa o le 5 i le Aso Toonai 14 o Iulai 2012, i le Maota gasegase o le Princess Alexandra i Brisbane, i le savalia ai o le 56 o tausaga o lona soifua.
O le tausi ia Neli o se tasi o toa lototele sa auai i le Divine Mercy poo le Senakolo a Goodna. O ona alalafaga o Vailele ma Moataa, faaipoipo atu i le fetalaiga a Taua Valovalo mai Vailele, e toalua nai o la alo o Robert ma Marina.
Sa taitaia le sauniga lotu e le afioga ia Patele Epati Tamati sa faia lava i le Ekalesia Katoliko i Goodna.
Na maualuga ma mamalu le aso e ala i le aufaigaluega a le Atua sa auai, le susuga ia Rev PetaiaTuifao EFKS Southside, susuga ia Rev Fiu Kolia faafeagaiga EFKS mai Campbelltown i Sini, molimauina foi e le paia i aiga, uo ma paaga faapea Samoana potopoto.
O le afioga ia Togia Tanuvasa Manaia Sepuloni Falepau sa fai ma fofoga o le aso (tuagane o Neli), ma e malaga mai Niu Sa Uelese.
O le fetalaiga ia Fiu Fogalevai Tanupo Ameko Aukuso mai Niu Sila sa fai ma sui o aiga ga lua sa tu tootoo auā le paia i le aufaigaluega a le Atua ma le atunuu aemaise o faaaloaloga.
O le tamā matua o taumafa le tofa ia Poulava Sam ma Lorna Matautia o le fale‘aiga a le Uncle Sam’s Catering sa tapenaina le taumafataga o lea foi faamoemoe. Tau ina ia iai faamafanafanaga a le Atua i le tamā ia Taua Valovalo ma le nofoaalo loto faavauvau, uso ma tuagane o Neli ma le aiga potopoto faapea aiga uma o tagi mai ala.
