Ole tamaitai lenei o Patty Hermann, 58, mai Houston Texas, USA. Ole masina fou o Aperila e malaga mai ai o ia i Samoa mo le tuuga Aau mamao mai Upolu agai atu i Savaii. E 22.3km le mamao ole tuuga e 12 i latou ole a tauva i lea faamoemoe. O nei tagata aau e omai i Farani, USA, Ausetalia, Initia, Niu Sila, Tonga ma le toatasi mai Samoa. E tasi le ‘au e to’afa ona sui ua faaulu mai, ole ‘au aau ale afioaga o Saoluafata.
Ole feiloaiga lenei ale Samoa Times ma le tamaitai o Patty Hermann mo sana faamatalaga i lana taumafaiga mo le Tuuga Aau i Savaii.
Se’i faamatala tuuga mamao ua e auai?
Ole aau pito i mamao na ou tauva ai ole END-WET, e 27 maila le mamao o lea tuuga, ae o lea ua faaopoopo le isi 15 maila ole aau lea. Ole isi tuuga ole SCAR i Arizona (2015, 2016). E 42 maila le mamao, e fā aso ole tuuga. E fai i vaituloto o Arizona lea tuuga aau ole aso muamua 9.5 maila, 9 maila ile aso lona lua, 17 maila ile aso lona tolu, ma le 6.5 maila ile aso mulimuli. E tele vaituloto i Arizona, e tofu lava le aso ma le vaituloto e aau ai.
Ole ā le tuuga ete fiafia tele iai?
Ole tuuga oute fiafia tele iai ole tuuga lea i Arizona, SCAR. E manaia tele nofoaga e fai ai, te vaai atu i atu mauga ole toafa, e manaia foi nei nofoaga ona ole fealofani o tagata aau aemaise le vaega e faafoeina le tuuga.
Ole ā le tuuga pito sili ona faigata ia te oe?
O soo se tuuga mamao lava e faigata. Ae e fiu tele a’u ile malulu ole vai. A i lalo loa ole 21 tikeri le malulu, e faigata tele mo a’u. E mafai ona ou aau i vai malulu, ae a umi loa ona faigata lea.
E iai se aau na lamatia ai lou soifua?
O faigata masani i feausiga mamao ole tau. E iai le isi aau na goto ai le vaaafi na malaga faatasi ma matou. Ae e leai nisi tulaga faigata e pei o i’a fe’ai, oute lei oo lava i lea tulaga.
E faapefea ona e tapena mo aau mamao?
E lē suia lava la’u polokalame, ua masani foi lo’u tino ile aau mamao. Oute toleni ile tausaga atoa ile sami ile Gulf of Mexico. Oute toleni foi ile Gym. E atoa le 25km ole mamao oute aau ai i vaiaso taitasi, ae a latalata mai loa tuuga ona oo lea ile 30km pe ova atu foi. Ona tipi ai loa lea ile toe lua vaiaso oo ile tuuga.
E iai se isi ua avea ma taiala ia te oe?
E toatele tagata ua avea ma faamalosiau ia te au. Aemaise ai le ‘au matutua, le vaega e pei o a’u. Ae ole tagata ua ou faamoemoeina tele o Martin Strel, o ia na amataina a’u i aau malafoni. E 4 ana matati’a i totonu ole Guinees Book of World Records mo le aau ole vaitafe ole Amazon, le Mississippi, le Danube, ma le Yangtze i Saina. E masani ona ma o faatasi i a’u tuuga, o ia foi na a’oina metotia e tatau mo lo’u tino mo le aau mamao.
E iai se fesootaiga o oe ma le siosiomaga, poo ni faaaliga ete mafaufau iai ile taimi umi a’o e aau?
O la’u masani lava ole manatu ile feausiga oloo o’u iai, maimau pe ana faapea e mafai ona ou vaai taulai i lea taimi i isi mea tāua, peitai, e na’o le aau lava oute mafaufau iai. Oute faamanatu lava a’u ia te au, e lē toe umi ae tini. Aua le faavaivai.
E faapefea ona e iloaina le aau i Samoa – Apolima Strait?
E toalua tagata na ta’uina mai ia te au: o Tiffany McQueen (Apolima Strait, 2017) ma Bruckner Chase (Ocean Positivie).
Ole ā lau fuafuaga mo le aau i Savaii?
E tasi lava le saoasaoa oute alu ai, ole saoasaoa lea e masani ai a’u. Ole saoasaoa oute amata ai ole saoasaoa foi lea oute tini ai. Afai e iai se fesoasoani mai le auma ole sami, ona faavave lea o la’u aau, a leai ona faifai mālie ai lava lea – e umi le tuuga.
Ole ā se isi tulaga oloo e fuafua iai mo lau malaga mai i Samoa?
Ole taimi muamua lenei ua ou asiasi mai ai i Samoa, a uma le tuuga ona matou tafafao lea ise vaiaso atoa i Samoa faatasi ma la’u tama teine ma lona toalua e malaga mai i Niu Sila.
Ole aso 6 o Aperila le tuuga. E amata ile 5.30am le tagata aau muamua, ae ole 7.30 le aau mulimuli.
E amata ile Sheraton Resort i Mulifanua le aau ae tini ile maota o Pauli Lusia i Salelologa, le Lusia Lagoon & Chalets.
