E ui sa faata‘uta‘u lava uiga o le tau i lea vaiaso atoa, ae ina ua malama le Aso Sa, aso 16 o Novema, na matuā matagofie ma lagi lelei, ma fiafia uma ai le aofia na valaaulia ma oo atu e patipatia ma molimauina le aso faapitoa lea, le aso 16 o Novema 2014, na tuu faatasia ai i se osiga feagagia paia o le faaipoipoga, le alii o Tema Jim Aukusitino Tuaimalo ma lana manamea le tamaitai o Aa Misiara Afoa.
O le nofoaga ua faapitoa mo sauniga tāua faapenei, le Nathan Homestead Garden i Manukau, sa faia ai lenei sauniga mamalu, i lalo o le taitaiga a le susuga i le faafeagaiga ia Pastor Naseri Filiga.
Mulimuli ane ona sosoo ai lea ma le taumafataga na tapenaina i le hall a le EFKS a Weymouth.
O le ulugalii fou, o i laua uma o ni sui auai o le ekalesia Samoan Unity Christian Church i Takanini, o inā foi o loo galue ai o le faafeagaiga i lea ekalesia le tuaa o le alii faaipoipo, le susuga Ps Aukusitino Tuaimalo.
O le tamaitai faaipoipo o Misiara o le alo o le tamā ia Asa Malaemoli ma le tina ia Tumema Malaemoli. O le alii faaipoipo ia Tema o le alo o le susuga i le faafeagaiga ia Aukusitino Tuaimalo ma le faletua ia Fuatino Tuaimalo.
E ui lava o loo soifua a‘e i laua ma o la aiga i Niu Sila nei, ae o nisi e tupuga mai afioaga o Matautu Uta i Apia mo le alii o Tema ae o le tamaitai o Misiara mai le afioaga o Vaisala i Savaii.
Tau ina ia manuia le aiga fou ma ia avea le Atua ma faavae papa i lo oulua aiga.
