E silia i le onoselau tagata na molimauina le tuufaatasia o nisi o le fanau ia Mark Hakai ma Lyllian Toleafoa i le laua aso fiafia e pei ona faataunuuina i le Aso Toonai ua mavae 28 o Fepuari i le malumalu o le Ekalesia PIC i Otara.
E toafā susuga i faafeagaiga ma o latou faletua sa auai, o aiga na lua, faapea uo ma ē masani o le aiga o le tama ma le teine faaipoipo sa molimauina lenei sauniga paia.
O se aso lagilelei ma le matagofie i le alofa o le Atua, ae na molimauina ai le lelei o le Alii a o faagasolo le sauniga i lea taeao. O le afioga i le Peresetene ia Nomani o le Ekalesia o le Light of Life mai Ausetalia na faatinoina le sauniga.
O le viiga ma le faafetai i le Atua ona o lenei faamoemoe sa fau ao fau po, a o lenei ua faataunuuina ma le fiafia, na vaaia loimata o mātua i lea aso, ona ua misia fanau, auā foi o lea ua see i le isi sitepu fou o le soifuaga. O le afioga ia Toleafoa Sele Alavini na ia foaiina lona afafine i lima o le alii o Mark e fai ma ana manamea.
O susuga i faafeagaiga uma sa auai na faaee o latou lima i luga o le ulugalii fou e faapaia ai le amataga o le laua aiga, a o le lui ma le faamalosi a le taitai o le sauniga i le fanau i lo laua aso, “E faia e le Atua le fesoasoani mo le tane, auā a pa‘ū le isi e mafai ona faatu i luga e le isi, e aogā le toalua nai lo le toatasi.” O se sauniga mamalu ma le matagofie i le molimau a le toaele oi latou sa auai.
O tu ma aga i aso faapenei, e laualuga lava mea uma i le taumafataga, auā foi o le iuga lea o le faamoemoe, ae sa lē tumamaina ai e le faleaiga a le Talimanao, le naunau atu o le auvalaaulia e tali le galala o le manaoga.
O fiafia na saunia e aiga na lua, faapea le autalavou a le ekalesia mai Otahuhu na molimauina ai le maualauga o le aso o le fanau, ae lē gata i lea o molimau a tuaa a le tama ma le teine faaipoipo e uiga i o laua soifua galulue a o talavou.
O le Fofoga o le aso o le susuga ia Pulenato Kueva Sau, ae o le tamā matua ia Aiolupo Kirisimasi sa tu tootoo i le taimi o faaaloaloga, ae tali faitau i ai le tofa ia Tiatia Kalolo sa fai ma sui o le Ekalesia o le Light of Life i Otara ma le mamalu o le auvalaaulia.
