O le faaipoipoga, o se osigafeagaiga lea i luma o le Atua i le va o se alii ma se tamaitai talavou i le tino e tasi, ma le agaga e tasi, ma le loto e tasi, ona ta‘ua ai loa lea o le aiga ua tasi. O le moemitiga lea sa faananau i ai le alii o Eti Fagalilo ma le tamaitai ia Rosa Fotu Manusa ina ia taulau o le la faamoemoe, lea sa faataunuuina i le Aso Toonai ua mavae i le falesa o le Ekalesia Samoan Assembly Of God Niu Sila i Magele.
O le susuga ia Taeleipu Moananu sa taitaia le sauniga ma osia le feagaiga i le aiga fou. Na faatumulia le mamalu o le auvalaaulia sa latou molimauina le tuufaatasia o i laua i le mama sa fai lea ma faamau faailoga i le la mafutaga.
Na mae‘a le sauniga ona sosoo ai ma le ‘aiga i le faletaalo i Manurewa, e silia i le limaselau tagata sa auai i le taumataga. O le fale‘aiga a le Continental Bransh i Otahuhu na latou saunia le taumafataga, ae o le faaili a le Folasi sa faafiafia, faatasi ai ma le faaili a le susuga ia Michael.
Na su‘ifefiloi lea aso i faafiafiaga matagofie a le aiga a le tama faaipoipo ma le aiga o le teine faaipoipo.
O le Fofoga o le aso o le susuga ia Peilua Iosefa, ae o le tofa ia Lemauga Taoipu Seiuli sa fai ma sui o aiga na lua, o ia sa tu tootoo i le taimi o faaaloaloga e pei ona masani ai aso faapenei.
Na faamatafi le aso i le saunoaga mulimuli a le pule o le tausamaaga e molimoli ai le agaga faafetai i le mamalu o le auvalaaulia sa latou patipatia le aso fiafia o le fanau. Ia manuia le aiga fou!
