Tuua‘ia pule i ola tama taaalo talu faiaoga a le NRL

Na tau tuua‘ia e nisi o pulega a tama taaalo lakapi liki le soifuaga faasamoa ma le Pasefika o se mafuaaga e agai atu ai fanau lakapi liki talavou i le faaiuga e pule i o latou soifua ae peitai ane ua faailoa nei o le sauā o faamatalaga ma faaupuga a nisi o faiaoga na mafua ai le pule o le ola o nisi tama talavou e aofia ai ma alo e toalua o Samoa ia Alex Elisala ma Francis Winterstein.

I se lomiga na faalauiloa e le Daily Telegraph na faailoa ai e se tina na maliu lona alo lea sa pule i lona ola, ua iloa ai o le mamafa o faamatalaga ma upu masoā e lafo i tamaiti faatoa ulufale atu i aufili ma kalapu liki tetele i taimi o a latou toleniga o se tasi lea o vailaau oona e sao mai ai nisi ae teufatu ma liliu ai nisi i le oti.

O se tasi o talavou iloga mai Kuiniselani na pule i lona soifua ia Regan Grieve na iloga le talenia mai le sefulufā o ona tausaga e lei misi mai le aufili a Kuiniselani ma Ausetalia ae na filifilia foi mo le aufili a Ausetalia mo le malaga taamilo i Egelani ma Farani.

O lona maliu faafuasei na matuā fesiligia ai e lona aiga faiga nei e koleni ai ma faifai ai faiaoga ia luitau ai tama ia loto maaa ma faapei o ni pou sima mo le taaloga o le liki.

Na faaalia foi o taimi e manunu‘a ai tama taaalo le isi aafiaga faalemafaufau e saputu ai popolega o loto ma o latou manatu ma iu ai na pule i o latou ola. Na saunoa le tina o ‘Joanne’ o lana tama e lei iloa atu lava ni uiga ma foliga atugalu ma e lei lavea foi, ae ai o ni upu faifai i taimi o toleniga na momotu ai lona ia lava soifua.

O nisi o tama talavou e nanā mai o latou mātua nei faiga ma faamatalaga masoā auā popolega i tusi faaseā ma faailoa i pulega faiga lē tatau a nei faiaoga faapenei.

O le taimi nei e lē o mailoa lava se isi mafuaaga na pule ai le alii talavou Toga ia Mosese Fotuaika o le West Tigers i le lua tausaga talu ai nai lo o le mafuaaga o le manu‘aga mai toleniga ma lepeti ai sona avanoa mo le tausaga atoa.

O le tausaga 2013 na pule ai foi le sui o le Toa Samoa ia Alex Elisala o le North Queensland Cowboys i lona soifua e aunoa ma se isi mafuaaga vaganā ai ripoti faapea ua popole (stress).

Ma o le alo o Samoa na vaaia le agai mai luma ia Francis Winterstein o le Broncos/Cowboys na pule foi i lona ola e aunoa ma se isi mafuaaga vaganā ai manu‘aga lilo e pei ona saunoa i ai nisi mātua, o faamatalaga faifai ma faalumaluma a nisi o faiaoga ia taumafai e luitau ai, ae paga lea e aafia ai mafaufau ma finagalo o sui taaalo.

O loo finau nei le tina ia ‘Joanne’ ia malu puipuia alo ma fanau mo le lumanai mai nei faiga e suamalie a niu aati.

Alex Elisala o le Toa Samoa Photo: Toa Samoa