E lei faamautu mai e le Ofisa o Leoleo ae o lea ua maua mai ni lipoti o ni alii pagota o loo masalomia i le faaoogalima lea na faatopetope atu ai i le falemai se isi alii pagota e suafa ia Lauititi Tualima i le faaiuga o le vaiaso ua te’a.
O le Aso Toonai lea na ta‘ua le ave ai lenei alii i le falemai mo ni togafitiga faatopetope ona o manu‘a e foliga mai na tui e se tasi i Tafaigata. O le alii pagota lea na faatoa toe faafoi i totonu o le toese i Tafaigata i le Aso Toonai atu i ona tua, ina ua maua e leoleo o ia lea na faia se osofaiga i se alii faipisinisi mai i Saina o loo iai sana faleoloa i Samoa nei i Vaitele. Na maua atu e le aiga o lea tagatānuu o Saina lea alii o taoto telenoa mai i fafo o lona fale i Vaitele ma ua lepa le palapala (se‘i tulou) i le nofoaga o loo taatia ai.
O le sailiga la e leoleo o le tagata na faia le osofaiga i se agaese i lea alii Saina na maua ai i Lalovaea le alii lea o Lauititi ma faatoa iloa ai foi e leoleo o lea ua sola i tua lea alii.
O se alii na taofia muamua foi ae sola i tua ma ia faia ai foi se isi solitulafono o le faamalosi lea o se tamaitai asiasi mai i Ausetalia, ae saisai le uo tama a lea tamaitai i le taimi na ia osofaia ai le tamaitai papalagi.
O lea foi la e taatia lena moliaga ae ua toe molia foi i le osofaiga na faia i le alii faipisinisi Saina. Faaalia e leoleo na maua ai lavalava ma le tupe ma isi meatotino a le Saina i lea alii i le fale na faamautu ai, ma o le taimi la lea na toe faafoi ai i le falepuipui ae tulai mai ai loa le osofaiga faasaga ia Lauitiiti.
Sa iai le lipoti muamua faapea o leoleo na faia le faaoogalima faasaga i lea alii pagota, peitai o lea ua maua mai isi ripoti e lē o leoleo na osofaia le alii pagota, ae o isi lava pagota i totonu o le toese i Tafaigata. O le pa sima sa taofia ai lea alii ina ua maua atu i le osofaiga lea na faia i Vaitele.
O le fale fogafale lua lea e iai se tamaitai e faauo ma le ulugalii Saina i luma, o iina na osofai ai e Lauitiiti le alii faipisinisi Saina ma na ta‘ua e le tamaitai lea e agai atu i le po na maua ai le Saina ua osofai mai i fafo o lona fale, ua matuā faaletonu lava ma na laki lava le vave ona ave i le falemai lea alii.
Ua toe tea i tua le alii Saina ae ua taofia atu le alii o Lauitiiti ma e leai lava se faamatalaga o toe maua mai i le Pulega o Falepuipui i Tafaigata faatatau i lenei faalavelave.
