Tito Luaiva ole teuoloa ale ekalesia AOG Panmure ma le alii ia Lincoln Faleauto Fereti

Tito Luaiva ole teuoloa ale ekalesia AOG Panmure ma le alii ia Lincoln Faleauto Fereti

Ole tusitusiga ale Samoa Times na faasalalauina ile lomiga ole Aso 7 o Mati 2017, na faaulutalaina “Faavalea e se alii le ekalesia ae gaoi tupe” na afua ai ona fesootai mai le alii na faasaga iai tuuaiga ale aulotu AOG Panmure, le susuga ia Lincoln Faleauto  Fereti. Na ia teena ai tuuaiga ua faia e le ekalesia faasag ia te ia, peitai, na ia faailoa mai ai ma tuuaiga ole gaoi faasaga ile Faifeau ma nisi o Sui ole aulotu EFKS Panmure.

Na faaalia foi le faanoanoa tele ole susuga ia Lincoln, ona ua molitu mai o ia e le faifeau ma le ekalesia ile nusipepa, ae le sei manatu i tulaga oloo faaletonu ai le ekalesia faasaga ia te ia. O ia faaletonu e aofia ai le toesea o ni mea totino na teuina e Lincoln ile ise vaega ole warehouse, lea sa lisi ai le ekalesia. O ia meatotino e aofia ai ni moli, speakers, play stations ma nisi oloa tau eletise (electrical goods) a tuufaatasi le tau aofai e ile va ole 70 afe ile 100 afe le tau.

Na taua e Lincoln, o tagata lava ole aulotu na latou faailoa atu ia te ia sa o latou vaai tino lava o toesea e le faifeau ma nisi ole ekalesia mea nei mai le potu na teu ai. Na ia taua foi, sa ia fesiligia le faifeau e tusa ai o mea ua gaoia, peitai, e leai se tali na tuuina mai ia te ia.

“Na fautuaina au e lau loia ina ia faia se moliaga faasaga ile faifeau ma le aulotu ona o mea ua gaoia, peitai, na ou musu lava e fai lea tulaga sa fautua mai foi lou tama ia te au ina ia ou faamagalo atu ile faifeau ma le aulotu,” ole tala lea a Lincoln.

Na faamautinoa mai foi e Lincoln e ala ise feau tusi na ia tuuina mai, ua maea ona faaulu lana tagi i leoleo faasaga ile faifeau ma sui o lana ekalesia, e le ose mea na manao e fai, le tagi ua ia faauluina nei, ole mataupu lenei sa iai lona manatu ua maea ona latou soalaupuleina ile fa tausaga talu ai ma le aulotu, peitai, ua toe lalaga mai e le ekalesia ma faatasina ai lona tagata, ole mafuaaga lea ua agai ai loa i leoleo e faaulu lana tagi i leoleo.

Na faaalia foi e Lincoln e tele fesoasoani na ia tuuina atu ile aulotu, na ia tuuina atu le $6000 e fesoasoani ai sailigatupe ale aulotu sa faia, na ia faatagaina foi le faaaogaina o lona nofoaga e faia fua ai se sailigatupe ale aulotu, na maua ai le faitau afe o tupe ale aulotu. E le gata i lea sa ia faafaigaluegaina foi ni sui se toalima ole ekalesia ile agaga alofa ma le fia fesoasoani atu iai.

Na ia faailoa mai foi, ose tasi aso na oo atu ai sui e toa fa, ole aulotu i lona ofisa e talosagaina lana fesoasoani. Ose tasi o tama ole a tipoti i Samoa ile itula e 4pm ile afiafi ole aso lava lea, peitai, e moomia se $2000 e totogi ai le loia mo le faia ose talosaga e taofia ai le tipoti o lea tama i Samoa. “Na ou telefoni ile loia e faagaioi le talosaga, ole a ia totogi atu le $2000 o lana pili. Na ia ave le $2000 ma le tuutuuga e toe totogi atu tai $100 ile vaiaso, peitai, e oo mai lava ile taimi nei e leai lava ma se tupu ua toe totogi atu ina.

Ile tali mai a Lincoln Falauto Fereti, i vaega uma pei ona ia taua, e leai se sootaga ma le mataupu na uluai lipotia ele Samoa Times, ile faatauina ole fale lea na aafia ai se vaega tupe e silia ma le 100 afe tala.

E leai foi sana faaaliga e teena ai tuuaiga e pei ona faia e le ekalesia, peitai, o vaega na ia faailoa mai, e iai le talitonuga o Lincoln oloo lape ai foi le aulotu ilo latou va, ma e le ose mea amiotonu le agai mai o faitioga ia te ia, ae oloo iai vaega oloo faaletonu ai le aulotu, e pei la o oloa ma meatotino oloo ia tuuaia ai le faifeau ma nisi ole aulotu ile gaoi.

O lea la ua ia faamautinoa mai ua maea ona faatoai lana tagi i leoleo mo le suesueina o lea mataupu.

Fesiligia David Afamasaga

Ole susuga ia David Sootaga Afamasaga o ia lē sa avea muamua ma teuoloa ale ekalesia ao lei o ese ma lona aiga mai le lotu, oloo ia ioeina vaega oloo aumai ai le tuuaiga a Lincoln e ala i meatotino sa i totonu ole warehouse lea sa aveese faagaoi ele ekalesia. Taua e David Afamasaga e sao ma faamaoni lea tulaga aua sa tufatufaina lava ele faifeau ma le ekalesia mea ia ao galue ai i lea taimi.

Na faaaluina foi tupe a Lincoln ile faatauina o meaai ao iai le ekalesia i latou sailiga tupe e lua ile fale o Lincoln, ma sa valaaulia ai tagata i lea polokalame ma o tupe uma sa maua ai sa tuuina uma lava ile faifeau ma le ekalesia ae lei avea e Lincoln se tupe, aua ole susuga ia David Sootaga Afamasaga sa ia kukaina meaai i lea aso e fafaga ai tagata.

Ole ulugalii oloo taua na fia maua se fesoasoani ile taumafaiina o latou pepa nofomau, e ala lea ise tupe e ave ai le latou apalai i totonu, o Lincoln na aumai ai le $2,400 ina ua fesili ai David Afamasaga ise fesoasoani ise seleni sei apalai ai le nofomau ale aiga lea, peitai, e lei mafai ona fesoasoani ile aiga ile apalaiina o latou pepa faapea foi le ekalesia e lei mafai ona tuuina iai sa latou fesoasoani i lenei ulugalii.

O nisi vaega sa faaleleia i totonu ole fale e pei ole lipeaina o totonu, ma le valiina o totonu ole fale lea sa lisi ai le ekalesia o mea sa galue ai le susuga ia David Afamasaga i lona naunau ia lelei mea e fai ai le galuega ale Atua. Peitai ina ua faaseetauagalu lona aiga ma le aulotu lea, ma o iina sa ia le toe maua ai se faamatalaga i mea oloo tupu ai le feseeseaiga ile va o Lincoln ma le ekalesia.

Tetee le Ekalesia i tuua‘iga

O tuaiga oloo faasaga nei ile ekalesia AOG i Panmure e pei ona tuaia nei ile latou aveeseina faagaoi lea o meatotino ale susuga ia Lincoln Faleauto sa i totonu ole warehouse sa lisi ai le ekalesia, e pei o moli, playstation ma isi lava mea, ua saunoa manino ai le susuga ile faafeagaiga ia Satui Faafiu Setefano latou te lei tagofia lava se mea e tasi o nei mea uma sa i totonu ole warehouse.

Ile saunoaga ale faifeau ia Satui Faafiu, o nei mea uma na ole alu atu lava o Lincoln tatala le warehouse ae tuu ai i totonu e aunoa ma se laua fesootaiga i nei mea, pe fai atu foi se tala ia te ia poo le ekaleisia e uiga i nei mea. Na ia fesili ia Lincoln poo ai e ona nei mea? aua o latou lea e lisi ile fale ao lea foi e ia latou ki ole fale, ae sau le tali a Lincoln Faleauto, o mea nei o mea a palalagi e toalua o lea e tau ina aumai e tuu ai ii, aua e fai le garage sale ile isi vaiaso ona toe ave ai lea. O nei palalagi o palalagi oloo faifai mea faatasi lava ma Lincoln. Pau le mea na ano iai le ekalesia ma le faifeau o latou lava meatotino e pei o meafaili ma ipu ma ulo sa latou faaaogaina ao iai ile lisiina ole fale.

Ole susuga ia Tito Luaiva ole teuoloa lea ale ekalesia na ia tautino lava o ia sa ia toesea nisi mea totino ale susuga ia Lincoln mai luga ole faatonuga a Lincoln, e faapea, ole ata ole falesa ale ekalesia Living Water Woship Centre i Henderson na tusia ele uo a Tito Luaiva e $3000 ile $4000 lona tau, na manao iai Lincoln ia tusia se ata ae aua le popole ile tau e uma lava totogi, aluai aluai, ua le mafai ona totogi le ata, ona faatonu lea e Lincoln o Tito Luaiva ma lana uo e o e vaai mea ia i totonu ole warehouse poo a ni mea e mananao ai ona ave lea ma laua, ona aveesea mai lea e Tito Luaiva o TV e lua e totogi ai le tusiaina ole ata lea, ae tuu ai lava ile warehouse le tele o mea.

Ae oo ile po na fai ai taaloga ale ekalesia ile fale lava lea, ae maua lelei ai lava e Tito le isi alii security i luma ole fale oloo alu atu e lau mea ia i totonu ole warehouse, ona ia oso mai lea e fai iai, ae toe oso le alii security i lana taavale ma alu ile atoa, ona ia tuliloaina lea ma maua ai i luga ole auala ma ia faamasinoina loa poo fea a toe alu iai, ae sau le tali e alu ile isi aualii ia na latou o mai.

Ona faasa lea e Tito ole aualii ia ona toe sau se isi ile fale, ona avaeese mai lea e Tito ole ki ole fale lea sa alu atu le alii security lea ma tatala ai le fale. O security nei o tamaiti sa faafaigaluega e Lincoln i ana galuega ae lei totogiiina ma o lea sa ia faataonuina ai tamaiti nei e o mai e avatu mea ia i totonu ole fale, ole saunoaga lea ale faafeagaiga ia Satui Faafiu Setefano ma le teuoloa ia Tito Luaiva.

Na faailoa foi ele faifeau o mea nei oloo taua e Lincoln o mea totino a Ross ma James o palalagi ia sa faifai mea faatasi ma Lincoln, ma oloo latou taulimaina nei le tusi na lafo atu e palalagi ile aulotu, faatasi ai ma le tusi a Lincoln oloo latou taulimaina foi, lea na ia tusi taufaamatau atu ai e leo toe mamao ona o atu lea o leoleo e loka le tagata, ma ua tatau ona totogi mai le tupe o mea nei ua leiloloa, ma le faaupuga ale maua mai se $40,000, ua lava se $10,000.

  Peitai e lei totogiina lava ele ekalesia se vaega tupe se tasi o nei tupe ua manao iai Lincoln ma o lea sa ia toe emeli ai ile aulotu o lea ua ia faaaogaina le latou $15,000 lea sa inivesi e ave i palalagi e toe totogi ai a laua mea ia ua leiloloa. O nisi vaega o mea oloo taua e Lincoln sa ile warehouse, ole aso mulimuli lava sa o ese ai le ekalesia na tiai ai foi ele e ona le fale ile lapisi mea sa totoe ai, aua sa fesootaia atu le owner ole fale ile aulotu ia oo ile aso mulimuli e faagata ai le lisi ua tapena uma ese mea ia sa i totonu ole fale, ma sa le popole iai le ekalesia i ia mea aua e le o latou e ona.

E Leai se Behind ole Matou Fale

E $30,000 le tupe na tuuina ele ekalesia ia Lincoln e totogi ai le latou lisi ile 6 masina, peitai e lei uma le ono masina ae lafo mai le tusi ile e ona le fale ua tatau ona o ese le ekalesia ma le fale ona ua le lelei le totogiina ole lisi, ona ole mafuaaga e lei tuuina uma e Lincoln le $30,000.00 ole lisi ole ono masina ile owner ole fale.

Tali le ekalesia e leai se faaletonu ole totogiina ole fale ona sa latou tuuina uma le tupe ia Lincoln ole latou lisi ile 6 masina.

Ole $2000.00 e pei ona taua e Lincoln na ia totogiina ma taofia ai se tasi o aiga ole aulotu, o lenei mataupu e le o aofia ai le ekalesia i totonu.

Na faailoa foi e sui ole ekalesia e tupu lenei faafitauli ua o ese mai le ulugalii lea ua ova aso, ma o lenei mataupu ole fetuugaiga lava ale aiga lenei ma le susuga ia Lincoln, e leai se aia ale aulotu ile mataupu lea.

Oloo tetee foi le aulotu i fesoasoani a Lincoln e pei ona taua na ia fesoasoani ai i sailiga tupe ale ekalesia lea sa ia faapea na faaalu ai le $6000, e pei ona taua ele sui ole ekalesia ma le faifeau, e leai ni sailiga tupe ale ekalesia sa faia ao iai ma Lincoln, ole vaalaulia a Lincoln na tuuina mai ile ekalesia ile tatalaina o lona fale i Botany na ia tatalaina ai le avanoa ile ekalesia e agai atu e matamata i ana galuega i lona fale faatau. Ma e lei foaiina foi e Lincoln se tupe e $6000 mo le ekalesia ise taimi ose sailiga tupe.

Ma o tupe sa faaaluina e Lincoln, o ana ia lava tupe sa ia foaiina ma fai ai faatau ile taimi na o atu ai le ekalesia ile valaaulia ae leai se sailiga tupe i lea taimi.

Ile faafaigaluegaina o tagata ole ekalesia e pei ona taua e Lincoln, lea foi ua molimau le ekalesia e le faamaonia uma nei vaega, pau le tulaga sa iai i lea taimi ole susuga ia Tito Luaiva sa feoai lea ma Lincoln ile taimi ao taumafai le lisi lea sa faaaogaina ai lana taavale e feoai ai ma Lincoln, faatasi ai ma le po e tasi lea sa tatala ai lona fale e pei ona ia valaauliaina ai le ekalesia lea sa ia tofia ai nisi o tamaiti ole aulotu e fesoasoani ile galuega sekulati.

Oloo tetee le ekaleisa AOG i Panmure i nei tuuaiga uma oloo faasaga mai ile aulotu.

Comments

comments