“Sa lē tatau ona tupu lea tulaga”… Misa Nafoitoa Talaimanu Keti
O le faaiuga a le taitai leoleo o le vaega o taavale afi i le matagaluega o leoleo e taofia se tamā ona o le lē usitaia o le tulafono o le lē laiseneina o lana taavale ae o loo fealuai ai lava ma faaaogā, lea na loka atu ai ma le atalii e 3 tausaga le matua, o le tamā e ana le taavale, ua faaalia ai le lē fiafia o le Sui komesina o leoleo le afioga Misa Nafoitoa Talaimanu Keti.
“O le mea lava ia ua leva foi na faigaluega ma ua iloa le mea e tatau ona fai, sa lē tatau lava ona tupu lea tulaga”. O se vaega o le finagalo o le Sui komesina ina ua fesiligia e tusa o le lipotia o lea mataupu ma ua ilitata ai lagona faaalia o le toatele aemaise lava o le loka o le tamā ae loka atu ai ma lona atalii laititi.
“O a‘u foi ua leva tausaga o faigaluega o se leoleo o le Malo, ae faatoa ou faalogo lava lea i se mea faapea ua tupu”. O le susuga Keti Toleafoa le taitai leoleo o le vaega o taavale afi ua tuuaia i le faaiuga na faia.
E fai le talanoaga a le tusitala ma le sui Komesina e lei uma le suesuega na ia faatonuina e saili tonu ai le mafuaaga o le faaletonu na tulai mai, ae poo ai foi na faia le faaiuga. “Ou te lē vave faia se faamatalaga i le taimi lenei se‘i mae‘a mai suesuega o loo faia e le Professional Stanadards Unit.”
O le faamatalaga mai se leoleo e silafia le mataupu lenei na faailoa ai e faapea, o le tamā na taofia e lē o o le taimi muamua lea ua taofi ai e leoleo. “Ua faalua pe faatolu ona maua e lei laiseneina lava lana taavale, ma o le mafuaaga lea na ave ai loa i le ofisa mo suesuega atili ma faia ai le faaiuga e taofia mo suesuega”, o le tala lea a se molimau o se alii leoleo i le vaega o taavale afi.
“O le gaioiga lea ua solia ai ma aiaiga o le feagaiga o aiā tatau o fanau”. O le finagalo lea o Misa ma ia faailoa pea e lē o se tulaga lelei i le mātau mai a le atunuu aemaise o le lalolagi ona o le feagaiga sili lea ona puipui i ai le Malo o Samoa.
O le feagaiga foi lea o loo matuā maioio ai le puipuiga o aiā tatau o fanauiti i lo latou tausaga o le matua o loo itiiti e lei oo i le 16 tausaga le matutua.
O Samoa le isi atunuu ua na apo ma lagolagoina le feagaiga ma ua faaaogāina tele i faamasinoga i mataupu e aafia ai le aiā tatau o fanau, aemaise lava o moliaga tau solitulafono e faasino i le sauaina o tamaiti e le gata o le tino a o le mafaufau. O loo iai se tagi a le tamā e ana le atalii 3 tausaga faasaga i leoleo, ma o loo tapenaina e se tasi o loia sinia mai Niu Sila o le afioga Leuluaialii Olinda Woodroffe.
Faaaliga aloaia: Toafā leoleo ua faamalolo lē tumau:
