“Sa lē tatau ona malaga ese male atunuu, e lei mae‘a le faamasinoga”…Faamasino
Na matuā faitioina ele afioga ile tamaitai faamasino o Mata Keli Tuatagaloa le lē auai atu ole afioga Peseta Vaifou Tevaga i lona faamasinoga ina ua faailoa e lana loia oloo malaga le alii minisita lagolago e tautoaluaina le valaaulia ole Palemia ile Sisigafu‘a ale atunuu o Tuvalu.
“Sa ou talitonu e malaga mai ile taeao nei fetaui ai male taimi ole aoauli ua tuu mai iai le faaauauina ole faamasinoga, ae o lea ua logo mai a‘u e faatoa taunuu mai nanei”.
Ole faaaliga lea ale afioga Leulua‘ialii Olinda Woodroffe le loia a Peseta ina ua lē oo atu le minisita lagolago ile faamasinoga ile Aso Faraile ua mavae.
Na molimauina ile siufofoga ole faamasino lona lē fiafia ile tulaga ua tulai mai ona na ia faaalia e leai se isi ei luga a‘e ole tulafono, e tusa lava poo i latou ua ta‘ua ole aufaipolokiki poo faipule ole Palemene.
“E lua lava vaega oloo vaai iai le faamasinoga ole tuuina atu ose tusi saisai e loka ai lē ua molia ae faatali ai le Aso Gafua asau e toe valaau ai ona moliaga”, ole saunoaga lea ale tamaitai faamasino.
Peitai e ui ina sa faapea ole a faatonuina se tusi saisai, ae na saunoa le faamasino ole a toe tolo le mataupu ile amataga ole vaiaso nei.
Na faailoa ele loia a Peseta nate lei silafia ole a iai se tulaga faapea e tupu ae na faateia ina ua logo atu o ia oloo manaomia ele Palemia le afioga Peseta Vaifou late malaga ile valaaulia ole Malo o Samoa.
“Oute faatoese atu lau afioga ona o lenei tulaga ae e iai foi la‘u pitolaau ile tulaga ua tulai mai”.
Ole Aso Faraile ua mavae sa faatulaga e tuuina atu ai folasaga mulimuli a loia a leoleo male loia a Peseta ina ua mae‘a ona suesue molimau e faasino i moliaga ole minisita lagolago. O lona moliaga e tasi ole faia ose saini faamalosi male moliaga ose gaioiga faaalatua. Oloo teena malosi e Peseta tuua‘iga a leoleo e pei ona ia valaau le molimau ale tamaitai loia le afioga Maiava Visekota Peteru na ia faamaonia na saini lava le susuga Martin Scwalger lona suafa ile faaiuga e avea ai Peseta ma sui faatonu, ma se faisea ole kamupani nonu ole Local Partners and Associates i Vaitele.
Na aumai foi e Peseta ma lana loia se molimau faapitoa ile sainiga o suafa e saga faamaonia atili ai lana mau.
Na ta‘ua e lea molimau mai Niu Sila e iai lona talitonuga atoatoa ole sainiga ole suafa ole faatonu le susuga Martin Schwalger e lei faamalosia e Peseta.
Peitai na faailoa ele molimau nate lei maua le pepa ole sainiga aloaia muamua le original ae ua na ose kopi ole tusi oloo iai le saini ua tuua‘i ai le minisita lagolago.
Ole a faailoa ele faamasino pe a mae‘a taualumaga ole mataupu ile Aso Gafua o lenei vaiaso se aso ole a aumai ai le faaiuga e iloa ai le faamaonia male lē faamaonia o moliaga ole minisita lagolago ole Matagaluega ale Palemia male Kapeneta, ae ole faipule o Faasaleleaga Numera 4.
