Ua faatali nei le alii Nigeria o William Okoro i se tali o lana talosaga i le faamasinoga mo se taui tupe e $85,000 e totogi atu e le Matagaluega o Leoleo ma Falepuipui ona o le lē maua o lona tusifolau, leiloloa o ana meatotino na tuu i ai faapea sana seleni e tusa ma le $4,500 tala Amerika.
E tusa ai ma se molimau faatuatuaina, e lei tali atu le Komesina i lea talosaga a le alii Nigeria mo se taui, ae o le aso 13 o Ianuari o le tausaga nei 2011, na ave ai se fautuaga a le Palemia susuga Tuilaepa L Sailele Malielegaoi i le Komesina e tusa ai ma le talosaga a Okoro na saunia e se ofisa o loia tuma‘oti.
Na mafua lea fautuaga ona sa kopi le talosaga mo se taui a lea alii i le Palemia, ma le Minisita o Leoleo ma Falepuipui, faapea le Loia Sili.
O le Aso Gafua, 6 o Iuni 2011 na suesueina ai e le faamasinoga le talosaga a lea alii Nigeria ma lana loia ina ia tatala ma faasaoloto ona e leai se solitulafono a lea alii.
Na amata taualumaga o le faamasinoga e lei taunuu atu loia a le Malo, ma e lei auina atu foi William Okoro e leoleo mai le falepuipui sa loka ai.
Na toe tolo i le 2 i le aoauli ma le faaaliga a le alii faamasino o Pierre Slicer, e tatau i le loia a le itu talosaga ona fesootai i loia a le Malo, ma ia oo atu ma se sui o le Matagaluega o le Va i Fafo pe a toe valaau le mataupu i le aoauli.
Ina ua toe fofogaina le talosaga na faaalia e loia a le Malo lo latou ioeina o le mau a le itu talosaga e tatau ona tatala ma faasaoloto le alii Nigeria ona e leai se mafuaaga faaletulafono ua loka ai e leoleo i Tafaigata.
Na tatala ai lava i le aso lea Okoro, peitai o loo taoto nei i le faamasinoga sana talosaga mo se taui o ana meatotino ua toesea e pei ona ia tuua‘ia ai leoleo.
O le talosaga foi lea a loia a le Malo i le faamasinoga ia avatu se avanoa e tali atu ai i le faamatalaga a lea alii i le toesea o lona tusifolau ma lana seleni.
E fia tali foi leoleo i le faamatalaga a lea alii e faapea o le aso na fuafua e tipoti ese ai ma Samoa, sa saisai ona lima ma vae toe leai ni ona laei.
Na oo i le malaevaalele i Faleolo ae na musu le pailate o le vaalele a le Air Pacific e ave ona e saisai uma lima ma vae. Na toe faasaasa‘o ane ai lana leoleo i le aso lea ma toe taofia i Tafaigata i le falepuipui.
O le mataupu i lenei alii Nigeria sa lipotia e le polokalame o le 30 minute a le TV1, lea na faaalia ai e le Komesina o Leoleo na mafua ona lē avea e le vaalele lea alii, ona sa musu e alu i luga o le vaalele.
O le mafuaaga lea na musu ai le pailate ona e ono lamatia ai le saogalemu o le pasese.
O William Okoro sa molia i le faia o ni gaioiga taufaavalea poo le fraud na ia aveina ai se seleni e tusa ma le 10 afe mai se kamupani tala tupe ma lafo tupe mai se tagata faigaluega la te masani ona sa nofo ma faamautu ai ina ua taunuu i Samoa i se vaitaimi o le tausaga e 2009.
Na suesueina e le faamasinoga faaitumalo lea moliaga ma taunuu ai i le faaiuga e lē faamaonia tuua‘iga faasaga i le alii Nigeria.
Sa finauina lava e Okoro lona tetee i moliaga e aunoa ma se loia na tu mo ia.
O le faamamāina o le suafa o lea alii mai ia moliaga na faatonuina ai loa e tipoti ese ma Samoa, peitai talu mai le tausaga e 2009 e oo mai i le tausaga nei e lei mafai ona alu ese ona ua leai se tusifolau.
E leai foi se ofisa o lea Malo e latalata mai i Samoa e mafai ona toe fai ai se isi ona tusifolau fou.
O le mafuaaga lea na taumafai ai leoleo e ave i Fiti e pue ai le isi vaalele e malaga ai i le atunuu e maua ai le ofisa o lo latou Malo e toe fai ai se isi ona tusifolau.
Faaalia e le loia a Okoro o Toleafoa Solomona Toailoa, o se CI poo se pepa faamaonia e iloagofie ai lea alii na taumafai leoleo e malaga ese ai ma Samoa, ae o atugaluga o le alii loia, e lē fetaui le CI ona na o tagatānuu o Samoa e mafai ona latou faaaogāina.
