Ole mataupu lenei, e lei finagalo lē ana le taavale e faalauaitele. Peitai ona o aafiaga o lagona ma le fesiligia ai poo ai e agavaa ona ave iai le faatuatuaga, ae faamasino mai oe.
E oo mai nei ua toe oo lava i lima o Tu lana taavale. E toe foi atu le taavale a Tu ua galo ia te ia e lei uma atu lava le tau, na faatau ai ele faifeau o Tasi.
Ole mea na tupu ua nofo Tasi ma toe faatau le taavale lenei a Tu ile isi faifeau o Lua ile tau e $5afe tala.
Na faatalitali ai lava lea o Tu talu mai le 2013 ua lē toe foi atu lava Tasi e faauma atu le tau ole taavale.
Ae ua faateia Tu ile telefoni atu ole tamā ma faapea atu, oloo ile ofisa ole LTA, Land Transport Authority, ole ofisa e lesitala ai taavale i Vaitele le faifeau o Lua.
Ole tagata na i luga ole telefoni, ua faapea atu o ia ole Loia ale LTA. Peitai ole leo tama na talanoa atu e ui ina ole tamaitai oloo loia ai ile LTA.
O Setema ole 2016, lea na faatoa manatua ai e Tu lana taavale na faatau ele faifeau o Tasi ile 2013 ae lei uma ane lava le tau.
Ina ua faapea atu le telefoni, “Malie o lau susuga e ana le taavale lea ua faatau ele faifeau o Lua, ae lei faaliliuina lava pepa, pe mafai ona e aumai lau ioega i luga ole telefoni, e mafai lava ona faaliliu ai le pepa ii, e aunoa ma lou tau sau fua.”
E faalogo atu Tu ile faamatalaga ma ia manatua ai loa lana taavale ma faapea atu loa ile tagata na talanoa ane ile telefoni, “E ese le faifeau na faatau iai la‘u taavale, se‘i fai atu lava ile faifeau lena e susū mai ma le taavale, o lea ua galo atu la‘u taavale lena.”
Na o loa faifeau nei ile maota o Tu, ma fai a latou faiga tala, ma toe ave iai e Tu le avanoa i faifeau e o ai ma le taavale.
Peitai, ile faamatalaga a Tu, ua alu nei le faifeau o Lua vaai le ofisa loia i Apia. Ua fai ai ele ofisa loia le tusi e avatu ia Tu mo le toe faafoiina ane ole taavale ia Lua.
Ole faifeau lava ia Lua na susū ma le tusi ale Loia ia Tu. Na talia e Tu le taunuu atu o Lua i lona maota, ma ia tapa atu e avane lana ki se‘i vaai pe tutusa ma le ki oloo ia teuina lava.
Ole taimi lava na iloa ai e Tu e tutusa lelei lava ki ia e lua, na ia faatonu ai loa ma le faifeau e alu e tapena uma ese lava ana meatotino oi le taavale. Ae vaai se isi taavale e toe foi ai.
Ole aso na sosoo ai na alu ai Tu e vaai le Loia e ana le tusi na alu atu ma le faifeau o Lua. Ma uma atu ai lava iina lena mataupu ina ua malamalama le loia, ma ua toe faafoi ane le taavale e Tu.
Ole faamatalaga a Tu, “Ua tele avanoa na ave iai. Ole isi aso na omai uma lava ulugalii faifeau tusa ole taimi ole palota. Na fetagisi fetagisi ai ii, toe ave iai le avanoa ma o ai ile taavale.”
E oo mai ile taimi na tusia ai lenei lipoti ua toe paka ai nei le taavale a Tu i lona fanua. Ma faatalasua ai, pau lea ole taavale e $5afe na rent ai, ae tolu tausaga.
