O le taleni fatu pese ma le tusia o solo i le gagana Samoa e fiafia tele i ai le tina o Lalotoa Asaua Mulitalo Ropi Seumanutafa, o lana galuega o se faiaoga i aoga a le Malo i le tele o tausaga ua mavae.
O le aoga tulagalua o le Apia Primary na galue mulimuli ai seia oo ina malolo litaea. Peitai o le molimau a se tasi o ona alo tamaitai, le faletua o Sarona o loo galulue nei ma lona toalua le susuga i le faifeau o Faraimo Tiitii i le ekalesia EFKS i Utualii, e tiga lava ona ua lē o toe galue faafaiaoga lona tuaa ae e pei o sana galuega suamalie le fatuina o solo ma tusia pese.
O nisi o ana pese na mau tulaga i ni tauvaga o pese Samoa sa faia i Samoa faapea ma Niu Sila. Faaalia e le fatu pese ma solo le faletua o Lalotoa i upu tomua o le tusi ua faaulutalaina: “O le Mata‘u i le Atua” ua lomia ai ana galuega o le mafaufau i solo ma pese faasamoa, “o le tusi o le tali o se tatalo ua loa ona faaleo i le Atua, ona o se lagona matamuli sa iai e faasoa lenei taleni mai le Alii”.
Ua faafetai ai le tina i ona alo ma o latou aiga ma fanau i le talitonuina o lana taleni ma tulituliloa atu pea e lolomi ina ia faalauiloa ma faasoa atu. O le faitau i solo a le tina o Lalotoa e maeu le ‘oa o le gagana o loo tusia ai aemaise o nisi o solo e aogā ma tāua mo fanau a le atunuu.
Ua iai foi se solo e agai tonu i taumafa a Samoa ua toe faamautu ai mo le iloa e fanau ina ia tausia ai le soifua maloloina lelei. O tauloto sa ia tusia o loo faaalia e le tina sa maua mai i le siosiomaga a o nofonofo ma mātau galuega a aao o le Mataisau o le foafoaga e pei o tauloto i laau matagofie eseese e iai le mosooi, teuila, niu ma isi.
O le tauvaga solo o le Aso o Tina o le tausaga nei 2015 na maua ai e Lalotoa se faailoga faapitoa ona o ia o se tina pito matua sa aofia lana solo i taumafaiga a isi e sili ona talavou na tauva.
O ana pese na fatu a o faiaoga i le Apia Primary School ma sa avea ma vii o lenei aoga i Malifa. Fai mai le fatu pese sa lagi soo lava e le aoga pe a manumalo i tauvaga savali o aso faailogaina o le Tutoatasi o le atunuu.
E iai foi ma lana pese na fatu e faatatau i le afā malosi o Ofa i le tausaga e 1990 lea sa tuuina atu i se tauvaga pese e faatatau i lea afā fulifao na mafatia ai Samoa. Na manumalo lana pese lea i le tauvaga.
Sa ia fatu foi se pese i le faalavelave matautia o le sunami ia Setema o le tausaga e 2009. O se tasi o alo e faasino i sona tuagane sa aoga i le Iunivesite o Aukilani na talosaga atu i le tina e tusi se pese mo le tauvaga a le Iunivesite i lo latou aso faasamoa.
Fai mai le tina na manumalo le pese lea i le tauvaga. Sa ia tusia foi ma fatu se pese i le tausaga e 1999 ma le 2005 mo le mafutaga a tina o Apia.
O moomooga o le tina o Lalotoa ia aogā lana taleni e lē gata o ona alo ma a latou fanau i le lumanai, ae ia aogā foi mo fanau uma a Samoa. E mafai ona maua se fesootaiga ma le tusi pese, o solo ma tauloto pe a fia silafia atili mafuaaga o nisi o ana pese ma tauloto, i numera o telefoni: 29131 poo le telefoni feaveai 7717797.
