Tutulu le faifeau maoa‘e le foai i le sāvali a Manono-Uta

O le Isaraelu moni e susue lona faamalama ma vaavaai i lona faasinomaga ma lona tupuaga, e lele foi le toloa ae maau lava i le vai. O le tauasa mamao mai ai o le susuga i le faafeagaiga ia Rev Faatoto Tapuai ma le sui o le komiti faafoe ia Leiataua Mulipola Laki i le fia maua o se fesoasoani i alo ma tamafanau o le afioga o Manono o loo alala ma aumau i Niu Sila nei na vaaia ai le talisapaia faatua eleele o le laua savali e pei ona malaga mai ai.

O le faamoemoe o lenei savali o le faamae‘aina lea o le hall ua fausia mo tupulaga talavou uma i Manono faatasi ai ma isi afioaga, aemaise ai o le tele o mea e fai a le malo e faatinoina i Manono ae leai se fale tele e faataunuuina ai, ma ua tupu ai se lagona i le susuga i le faafeagaiga ma le Ekalesia ua tatau ona fausia se maota mo tupulaga.

O le Aso Toonai ua mavae na faataunuuina ai le sailiga tupe (tusigaigoa) a le mafutaga a lenei afioaga o loo alala ma aumau i Niu Sila nei i le hall a le Ekalesia Metotisi i Otara. Na tatala foi i le sauniga lotu na taitaia e le susuga i le Sea o le Sinoti a Aukilani i Matu ia Rev Oianatai Matale ma faagasolo ai loa ma ipu.

O le afioga lava i le Sea na ia tatalaina faafiafiaga ona sosoo lea ma le Sea o le sinoti a Aukilani i Saute ia Rev Masunu Utumapu ma faasolo ane ai i isi faafeagaiga Metotisi ma latou aulotu, faatasi ai ma ipu a matafale o lenei mafutaga.

E 11 matafale o loo latou faatinoina lenei mafuataga, o loo Peresetene ai le susuga ia Leiataua, sui peresetene o Iumai  Fale Lavea, Failautusi o Foketi Fiu ma le teutupe o Leiataua Togia Sefo, sa faapea foi ona auai se tasi o tina matua ia Taupau Losalina i le faamaopoopoina o lenei mafutaga.

O le galulue faatasi o tamafanau o lenei afioaga, ua lē silasila i le eseese o tapuaiga ae ua auai lava ona o le fia togi o se maa ma le soosoo tau‘au e tusa ai ma le sāvali ma le faamoemoe o le afioaga.

O le tofa ia Telea Tali sa fai ma fofoga o le aso ma o ia foi sa fai a sui o le mafutaga i le taimi o faaaloaloga. Na taualuga e le faafeagaiga mai Samoa faafiafiaga o lea aso ma faaiu ai i lana saunoaga faafetai lea sa tutulu ai ma faaleo lona agaga fiafia ma faafetai mo susuga i faafeagaiga ma aulotu sa auai aemaise o le agalelei ma le aao mafola o alo ma tamafanau o Manono.

Na o le $40,000.00 Samoa o loo manaomia i le faamae‘aina o lenei galuega, ae ua faateia le faafeagaiga ma le sui o le komiti faafoe i le mae‘a ai o le faamoemoe ma ausia ai se fuainumera e $38,300.00. O le tofa ia Taavili Pauli o le sui mai Otara na tali faitau i le saunoaga o le fofoga o le aso.

Sausaunoaga a le faafeagaiga mai Samoa Rev Faatoto Tapuai taualuga ai le faamoemeo o Manono Uta Sui o le mafutga i Niu Sila nei faatasi ai ma le aumalaga mai Samoa Saunoaga faafetai a le faafeagaiga mai Manono Uta Rev Faatoto Tapuai