Tutū faatasi taitai ole Pasefika e tetee ia Korea i Matu

 O taitai o Malo ole Pasefika ma o latou laei elei na saunia ele Malo o Samoa. O luma lea ole faletalimalo ole Taumeasina Island Resort i Moataa na pue ai le ata aloaia poo le official photo. Ole faletalimalo lea na usuia ai le fono mo le na’o le Aso Faraile ua mavae ae ole faletalimalo ole Sheraton Aggie Greys Hotel sa usuia ai mo aso e 4
O taitai o Malo ole Pasefika ma o latou laei elei na saunia ele Malo o Samoa. O luma lea ole faletalimalo ole Taumeasina Island Resort i Moataa na pue ai le ata aloaia poo le official photo. Ole faletalimalo lea na usuia ai le fono mo le na’o le Aso Faraile ua mavae ae ole faletalimalo ole Sheraton Aggie Greys Hotel sa usuia ai mo aso e 4

Ua tutū faatasi taitai o Malo ole Pasefika na auai ile fono lona 48 a taitai i Samoa, e tetee i faataitaiga o meatau faaniukilia fana mamao ale Malo o Korea i Matu.

Ole finagalo autasi o taitai na faailoa ele afioga ile Palemia o Samoa ua avea nei ma taitaifono ole fono a atunuu ole Pasefika, ina ua mae’a le fonotaga ile Aso Faraile ua mavae.

E le o toe po se silafia o atunuu uma ole lalolagi e aofia ai ma Samoa, i faataitaiga o ia meatau malolosi e pei ona lipotia ai e televise, o nusipepa ma leitio faapea fesootaiga televavave faaonapo nei.

Na saunoa le taitaifono le susuga Tuilaepa Lupesoliai Sailele Malielegaoi, ole gaioiga oloo faia e lea Malo e matuā le talia e atunuu ole Pasefika. Ole finagalo o taitai ole Pasefika ua faasāina ai ni vaa fagota oloo tauaveina le fu’a poo le tagavai o Korea i Matu ona toe faagogota i ogasami ole Pasefika, ma e faapea foi ini vaalele o tauaveina le fu’a o lea Malo e latou te sopoia ma faaaogā avanoa ole ea o atunuu e felelei ai.

Ua tauaao atu le tagavai o Malo ole Pasefika ile tamaitai oloo faauluulu iai le ofisa autu o pulega o galuega a Malo ole Pasefika i Fiti, faapea le tagavai ole Malo o Samoa ile afioga ile Palemia o Samoa ua tauaveina nei le tofiga taitaifono ole fono a Malo ole Pasefika seia aulia le tausaga fou e usuia ai le isi fonotaga ile atunuu o Nauru
Ua tauaao atu le tagavai o Malo ole Pasefika ile tamaitai oloo faauluulu iai le ofisa autu o pulega o galuega a Malo ole Pasefika i Fiti, faapea le tagavai ole Malo o Samoa ile afioga ile Palemia o Samoa ua tauaveina nei le tofiga taitaifono ole fono a Malo ole Pasefika seia aulia le tausaga fou e usuia ai le isi fonotaga ile atunuu o Nauru

Ole faamata’u a Korea i Matu i lona muamua fana ose meatau faaniukilia ile atunuu o Guam ose sui o Malo ole Pasefika, ose tulaga na faaalia e Tuilaepa ole faamata’uina foi lea ole saogalemu o atunuu uma ole Pasefika. O Guam ose tasi o atunuu oloo avea ma teritori ole Malo tele o Amerika i totonu ole Pasefika faapei foi o Amerika Samoa.

Ua faaopoopo lenei faaiuga a taitai ole Pasefika i aulape ua mae’a faia ele pulega ole puipuiga o Malo Aufaatasi le UN Security Council faasaga ia Korea i Matu ma ana faataitaiga o meatau faaniukilia fana mamao ma le gaosia o ia meatau malolosi ma matautia.

Ole feiloaiga a tusitala ma le susuga Tuilaepa, ole Peresetene o Nauru ma le tamaitai oloo faauluulu iai le ofisa autu o galuega a Malo ole Pasefika i Suva i Fiti, na folasia ai foi e le Palemia o Samoa i lona tulaga ole taitaifono nisi o faaiuga ua mae’a talia e taitai.

Ole Malo o Papua Niu Kini ua ia tatala le faitotoa e ulufale atu ai tagata o atunuu ole Pasefika e aunoa ma ni visa malaga. Ose avanoa lelei mo tulaga i fefaatauaiga, o tafaoga, ma faiga malaga e afea ai lea atunuu ma le faamoemoe e faaauau atu ai i isi atunuu ole lalolagi. Ole mataupu i suiga ole tau ua ave le lagolago a atunuu i taumafaiga uma mo le faia o polokalame e faaitiitia ai tagapepa iila ma isi otaota ua faaleagaina ai le sami ma gataifale ma lamatia ai le puipuia lelei o meaola ma alaga’oa oloo maua mai ai. Ole atunuu o Vanuatu ua na talia le feagaiga mo fefaatauaiga ile va o atunuu ole Pasefika lea e ta’ua ole Pacer Plus ma ua atoa ai nei le iva o atunuu ua talia le feagaiga.

Peitai o atunuu o Fiti ma Papua Niu Kini e malolosi tele o la tamaoaiga e le o lagolagoina le feagaiga ile taimi nei, ae oloo tatala pea le faitotoa mo ia atunuu ma isi Malo ole Pasefika e ulufale atu ai e avea ma sui.

O atunuu e lei sainia le Pacer Plus oloo iai o latou atugaluga ona o aiaiga ole feagaiga oloo manatu i latou e le o mafai ona faatauva ai a latou oloa ma oloa a atunuu lapopoa ole fono a Malo ole Pasefika o Niu Sila ma Ausetalia. Ole Malo o Nauru ole a talimalo ile fono lona 49 a taitai ole Pasefika ile tausaga fou 2018.