Tutū faatasi e taofi sauāga faasaga i tamaitai

Na timuga le agai atu i le faaiuga o le vaiaso na tea nei – ae o le taimi na faataunuu ai le savali faapitoa mo le taofiga o sauāga i totonu o aiga, na maua lava sina masele ma vaaia ai le susulu o le la i lea taimi.

O le savali ua faamanatu ai e Samoa le tele o polokalame e faatatau i le taofiga lea o sauāga faasaga i Tamaitai.

Mo le Matagaluega o Leoleo, o se taimi muamua lea ua faamanatu ai le aso ua ta‘ua o le aso mo le Lipine Paepae, lea e faamanatu foi i Kanata e manatua ai tamaitai e to‘a 14 ia na faaoo i ai le oti e se alii i Kanata.

O se faamanatu i le lalolagi atoa i le tulaga vaivai ma le lē saogalemu o iai soifua o tamaitai i le tele o atunuu o le Lalolagi.

O Oketopa lea na faaoo ai e se alii mai i Tulaele ma Lepea le oti i lona toalua ma o loo faagasolo le faamasinoga o lea alii.

Ae o le faamamafa ua ave e le ofisa o Leoleo e pei ona saunoa iai le alii Komesina o Leoleo, o le faalauiloa atili o le taofiga o sauāga.

Ua ioe foi le Afioga Lilomaiava Fou Taioalo, e lē o faaitiitia sauāga faasaga i Tina ma Tamaitai faapea ai fanau.

Ua mautu ai foi ma le lala a le Matagaluega o Leoleo ina ia tali atu i talosaga ma tagi e aumai e tina faatatau lava i nei sauāga.

O le tele lava o mataupu na ta‘ua e le Alii Komesina, ua faigata ona oo i le Faamasinoga auā e uma lava toe talosaga tina e toe faaui i tua ae o le a toe fotuai ulugalii ma vafaaleaiga.

O le tasi lava lea unai i le taofiga o ia sauāga, ina ia faaauau i le Faamasinoga ma ua iai nei se tulafono o loo tālia le pasia, e taofi ai soo se tasi ona toe faaui i tua ni tagi ua aloaia le oo atu i leoleo aemaise lava i mataupu faapea.

Mo le Mapusaga o Aiga, o le savali na faatautaia mo le aso faapitoa lenei, ua amata ai aso e 16 o galuega faatino ma faalauiloa faasaga i le taofiga o sauāga faasaga i tamaitai.

O se polokalame faalauiloa i tausaga taitasi e saga faalauiloa ai le leaga o ooooga o nei sauāga e faia pea faasaga i le Itupa Vaivai ma le aafiaga o Aiga ona o lea faafitauli. Ua tele tausaga o faavae mai le Mapusaga o Aiga e pei ona faatautaia e le Malo o Niu Sila ma le Malo o Samoa.

O le autū o lana galuega ia maua le filemu o aiga ma ia saogalemu ma ola fiafia tina ma tamaitai ma fanau aemaise foi tamā o loo faauluulu i ai aiga.

O le taulaiga o le galuega faalauiloa o lenei tausaga, na ta‘ua e le Mapusaga o Aiga o loo vaai ai e lē gata i le faamalosiau i tamaitai, ae ia aofia le tamā i nei polokalame ma e taualuga e se siva mo ulugalii lenei polokalame o le 16 o aso  e faalauiloa ai le manaoga e taofi sauāga i totonu o aiga.

Mo le Faalapotopotoga o le Toomaga mo Tagata Puapuagatia lea foi na savavali faatasi uma i lenei solo tele i le taulaga o Apia, o le faamamafa ua ave i le vave ona foia o faafitauli ma ia oo i le Faamasinoga nei mataupu.

O le faaiuga o le vaiaso na faamanatu ai foi le lima o tausaga o le Toomaga i Samoa ae o se tasi lenei o faalapotopotoga ua iloga le agai i ai o tagata mo talosaga i soo se mafatiaga.

O le autū o le faavae mai o le Toomaga ina ia mautinoa e fesoasoani ma i ai i se suiga i sauāga matagā ma sauāga o le tino ma le mafaufau o loo feagai ma tina ma fanau teine.

O galuega e ave ai mataupu nei i le Faamasinoga ua vaaia ai le tele o le numera o solitulafono faapenei ua faalauiloa ma ua ave mo se faaiuga a le Faamasinoga.

O le talosaga a le Toomaga, ia aua ne‘i fefe le tina ma le teineititi e lipoti nei mataupu pe a tulai mai, ma ia mautinoa e ave le tagata lea e faia le solitulafono e tali i moliaga ua faia faasaga ia i latou.

O le Lipine Paepae, o le aso mo Ulugalii, o Faamasinoga e faatautaia o nei galuega uma ua ta‘ua e le Malo ua lagolagoina e le Malo i lona foi sao faatasi ai ma galuega faalauiloa a le Matagaluega o Tina Tamaitai Atina‘e o Nuu ma Agafesootai, ina ia taofi le tulai mai pea o sauāga faasaga i tamaitai ma sauaga i totonu o aiga.