A’o usuia i Samoa ile tausaga ua mavae le fono a ta’ita’i o Malo ole Pasefika, na faalogoina ai leo oi latou na auai ise solo tetee filemu na faia i luma ole faletalimalo ole Sheraton Aggie Grey i Vaisigano ile tatau i ta’ita’i ole Pasefika ona silasila ile mataupu ose malo tutoatasi o Papua i Sisifo lea oloo pulea e Indonesia.
Ose solo tetee filemu na aliali ai i luma lagona lē fiafia ole Amepasa o Indonesia i Samoa lea na ia faaalia e lē tatau ona avea le mataupu ose Malo tutoatasi o Papua i Sisifo ma se vaega o mataupu ole fono a ta’ita’i ole Pasefika. Ua ono masina talu ona tuanai le fonotaga sa usuia i Samoa ae ua oo mai ile masina o Mati na tea nei ua taunuu le meaalofa mai Indonesia mo le Matagaluega ole Soifua Maloloina o taavale ave ma’i poo ni ambulance se lua.
Ole saunoaga a se tasi o sui ole Malo o Indonesia na faaleoina le foai a lona Malo e tatau ona iai se vaaiga lelei ose tali atu a Samoa ile meaalofa ua aumai e lona Malo. Sa tau fesilisili le mafaufau ole tusitala poo le ā tonu le uiga o lea vaega ole saunoaga ale sui o lea Malo le susuga Muhammad Lutfi.
Na toe vave manatua le fono a ta’ita’i ole Pasefika na usuia i lo tatou atunuu ia Setema ole tausaga ua mavae 2017, ona oso a’e lea ose lagona atonu oloo manao Indonesia ia lagolago e Samoa lana mau oloo lelei ana pulega i Papua i Sisifo ae aua ne’i toe iai ni solo tetee e lagolago ai se malo tutoatasi o lea vaega o Papua oloo pule ai Indonesia.
Ole fono a ta’ita’i ole Pasefika i Nauru ia Setema ole tausaga nei ua maua ni molimau ole a toe vaaia ai ni solo tetee filemu e lagolago ai se malo tuma’oti o Papua i Sisifo. Ae mo Samoa lava ia ma le meaalofa o taavale ave ma’i mai Indonesia, ua talia ma le fiafia e le Minisita ole Soifua Maloloina le afioga Tuitama Talalelei Tuitama.
Ose meaalofa tāua auā ole a faaopoopo i taavale ave ma’i oloo iai, ma ua maua ni molimau ole a ave uma taavale e lua na foai mai e Indonesia mo le auaunaga ale soifua maloloina i Savaii.
Ole masina o Fepuari ole tausaga nei na taunuu ai le meaalofa ae na faatoa tauaao aloaia ile Minisita ole Soifua Maloloina ile masina na tea nei.
