“Sa ou alofa faamaoni ia te oe”
Ole tusi a Opapo na tuuina atu ile taitaifono ale EFKS, le Susuga ia Tautiaga Senara, ua aliali mai ai le ituaiga o tautua sa ia faia ma lana lagolago i lana tusi na ia tuuina atu oloo taua ai:
“Faapea lava a‘u ailoga a galo i lou fingalo lo‘u alofa faamaoni ia te oe, na ou tu malosi ai, mo le avea o oe ma Toeaina ole Pulega. E silafia foi la‘u faamalosi ile Pulega i tausaga uma ona o lou naunau ia e pale ile Taitaifono ale Ekalesia.
“Sa ou alofa moni faaleuso ia te oe, ona ole tuafafine ia Naomi aemaise o lo‘u talitonu o oe ose tamā alofa ma le faapalepale. Ua 22 tausaga o tautua e leai se leo mo oe, peitai ona ole mataupu ia Toa e peiseai ua e‘e ai lou finagalo ma le lagona ia te au.
“Sa ou nofo lava ma le faamoemoe oute malu ia te oe lo‘u uso ma le tuafafine ia Olita poo oulua mātua faaleagaga, a‘o lenei ua fai lau faaiuga ua leai se mea e mafai.
“O api na ma le tusitupe ale pulega ua tuuina atu ona ua lagona le maasiasi e toe feiloai atu ia oulua mātua, e ui foi ile oona ma le matuitui o lenei mea ae ole a ma inu iai, ae lē uma le alofa.”
Talanoa Opapo, “e leai so‘u manatu o iai e sui sa‘u lotu, ona oute alofa tele ile EFKS.” Ma ole a faaauau ai pea lana tautua ile ekalesia, o ia ole Matai Samoa.
Na ta‘ua e Opapo ise feiloaiga ma le Tusitala, “Pe ave ese lava le latou tofi faifeau, ae e tumau lava lava lo‘u tofi Matai Samoa”.
E pau le tulaga oloo mamafa ile faifeau ile taimi nei o lona alofa tele i lana Ekalesia. Ae ole tulaga tau ile aveeseina o lona tofiga faifeau, ua leai sona malosiaga e toe mafai ai ona toe faafoi mai.
Ina ua oo ile oooga o agaifanua a Samoa ma lana ava fatafata, e lei taliaina e finagalo Kerisiano o taitai ale EFKS Ekalesia Faapotopotoga Kerisiano Samoa, le ifoga. Vagana ai le ietoga ole pulou ole ola, na talanoa ai Opapo sa talia ae teena le mafuaaga o lana ifoga.
Ile talanoa a Leilua Opapo, ole taimi lava e alu ese ai ma lona nuu e uma ai foi ma lona tofi faifeau, ae avea loa ia ma matai. Ua 40 ai lenei o tausaga talu ona faaee le suafa matai Leilua ia te ia e lona aiga i Sataua.
Peitai o tulafono ma tapu ale lotu EFKS sa lē faaaogaina ai. E iai foi isi faifeau ole ekalesia e fai ane le tulafono lea ale lotu ua leva ona matai, ma sa faataatitia ese lava o latou matai ona ole tulafono.
E le tasi se suafa matai oloo tauaveina ele Susuga Opapo, o lona finagalo nate faaaogaina uma lava na suafa matai, ile aso e oese ai ma Siufaga, lea e fuafua ole uma ai ole faamanatuina ole aso maliu ma le toetu o Iesu, ona faatoa tapena loa lea i lona aiga i Vaitele uta. Oloo maualuga le faanoanoa tele o Opapo, ile faasala o ia, ae leai lava sana faamatalaga ua mafai ona fai atu i Toeaiina ole ekalesia e fua iai le latou faaiuga ua faia faasagatau ia te ia.
I faamaumauga ale faamasinoga maualuga i Mulinuu, na agiga ai foi le tagi ale tasi o faifeau toeaina mai Brisbane Ausetalia, Kerita Reupena e faatatau lava ile leai foi o sona leo e sao atu i Toeaina, na faia le faaiuga faasaga ia te ia na aveesea ai lona tofi toeaina ma le tofiga Faatonu.
O lena mataupu na tumutumu ai le maota faamasino i tagata ole EFKS, auā na fetaui lena mataupu ma le taimi ole fono tele i Malua. Peitai, ole vaiaso nei, 27 Mati 2017, ua toe valaau ai foi i luma ole faamasinoga.
Ma ole taimi lenei ua oo atu ai loa ile faamasinoga o Apili. E lua mataupu apili ale Susuga Kerita Reupena faasaga ile Taitaifono ma isi taitai ole EFKS oloo tulai le tamaitai loia ia Leuluaialii Olinda Woodroffe e finau mo le faifeau, Kerita Reupena.
Ole tusi a Opapo ile Taitaifono ole Ekalesia, oloo manino ai se mafutaga vavalalata ma le fegalegaleai sa iai, peitai, ua oia ona o faaaliga oloo tauaveina ele alo tamaitai o Opapo ia Toaopuapuaga Patrick.
