O le faaolaolaina pea o le tatou gagana Samoa o se galuega ua ave pea i ai le faamamafa a le Malo aemaise ua iai nei le Komisi o le gagana Samoa, o se itutino o le a saga faatumauina ai le gagana a le atunuu. O le tauvaga o tu ma aganuu a kolisi maualuluga talu ai nei na manumalo le lauga a se tasi o tamaitai aoga o le Kolisi o Sagaga na autu i le gagana Samoa ma lona tāua tele lea sa ia saafi ai ma ave le tuualalo i le Malo, pe lē ua tatau loa ona faaaogā le gagana Samoa i suega uma a le fanau aemaise ia aoaoina ai mataupu uma o le aoga ona o le isi lea o to‘a o loo mafua ai le musuā o nisi o fanau ona o le gagana peretania o loo tele ina aoaoina ai mataupu o le aoga.
O le tāua o le tatou gagana o le faasinomaga o soo se tagata Samoa, ua taunuu ai se isi meafaigaluega tāua mo lona aoaoina ma faaaogā e fanau ma tagata uma o se tusi ua faaigoaina “Sa i le amataga le Upu”.
‘O lo’o fa’amatalaina ai uiga o ‘upu, ma lo lātou fa’aaogāina i le gagana Peretānia ma le gagana Sāmoa. ‘O lo’o fa’aogāina ai fo’i faailoga e pei o le fa’amamafa (macron) ma komaliliu (glottal stop) e pei ona sā iai i le ‘āmataga aua o le isi lea vaega taua tele ile gagana Samoa e silafia ai le fa’aleoga sa’o o upu.
Faaalia e le tusitala o le tusi ‘Sa i le amataga le Upu’, le susuga Tuiataga Faafili o le afioaga o Moataa, O lona naunautaiga , ‘ia faaolaolaina pea le gagana Samoa, aemaise le faaosofia o loto o tatou tagata ia fiafia pea e faitau le Tusi Paia, o le Puna o le Poto ma le atamai silisili.
Ua iai le faamoemoe e tuuina atu kopi o lenei tusi i aoga maualuluga i le atunuu aemaise le Iunivesite aoao a Samoa ae o le a maua foi i faletusi. Sa tatala aloaia ma faalauiloa lenei tusi i Aukilani i le amataga o le vaiaso nei lea sa faapaiaina ma tatalaina e le Susuga i le Toeaina o Rev. Elder Mafutaga Faaleaogā i le Aso Sa, 12 o Iulai 2015 i le ekalesia EFKAS a Wiri.
E tolu vaega o lenei tusi
I le Vāega Muamua, o nisi o ‘Upusi’i mai le Afioga Pa’ia a le Atua ma lo lātou fa’aaogāina i le gagana. E silia ma le 900 Alagā’upu ma Muāfetalaiga o lo’o maua i le Vāega Lua. Ma le VāegaTolu, o ‘upu Sāmoa e pei ona fa’aaogāina ai i Sāmoa ma AmerikaSāmoa.
‘Olo’o fa’amatalaina uiga o ‘upu, ma lo lātou fa’aaogāina i le gagana Peretānia ma le gagana Sāmoa. ‘O lo’o fa’aogāina fo’i i lenei tusi le fa’amamafa (macron) ma le komaliliu (glottal stop) e pei ona sā iai i le ‘āmataga. O le naunautaiga o le tusitala, ia faaolaolaina pea le gagana Samoa, aemaise le faaosofia o loto o nai o tatou tagata ia fiafia pea e faitau le Tusi Paia, o le Puna o le Poto ma le atamai silisili.
E faafetaia e le tusitala lona tamā faaleagaga o Rev.Elder Mafutaga Faaleaogā (EFKAS – Wiri), le Afioga i le Sea, Superintendent Masunu Utumapu (Ekalesia Metotisi – Manukau), ma Rev. Elder Malaki Tuimua‘i‘ava (EFKAS – Wainuiomata) mo le lagolagoina o le faamoemoe.
