Aiga Tusani Le Faiaao i Savaia Lefaga

Aiga Tusani Le Faiaao i Savaia Lefaga

O le tagata ma lona fasinomaga o le tagata foi ma lona tupuaga.

O le autu lea sa faamamafaina i le mafutaga poo le lotu faamanatu a le aiga o Tusani Le Faiaao i le faaiuga o le vaiaso ua tuanai lea sa mafuta ai i le community hall i Pakuranga i le aoauli o le Aso Toonai 28 o Iulai.

O le manulauti na toe fafagu ma faamanatu ai i fanau talavou i totonu o le aiga le tāua o le tupuaga o le tagata mai lona laitiiti seia oo lava ina matua.

Ua faailoa foi i lenei mafutaga le loto o mātua ua fai i lagi le folauga sa latou asaina le gasū o le taeao ina ia faia nei lotu faamanatu e talosia ai tamafanau o le aiga ina ia maua so latou lumanai manuia, ia iai ni fanau o le aiga e faaaogāina lo latou ola mo le Atua ma lana galuega poo ni lupe faalele a le aiga ina ia sooa ai mātua sa tautuaina le finagalo o le Atua i isi fata faitaulaga.

Ia foai foi le ‘oa o le mafaufau ma manatu i matai o le aiga ina ia taitaiina ai le aiga, ia tatalo foi ia manuia lauelele ua faasinoina mo le aiga faatasi ai ma le nofo fealofani o le aiga. O nei vaega uma o loo mafai ona faaauauina pea e augatupulaga o le aiga o loo soifua mai pea i le taimi nei ma ua avea o se mafutaga ua faigata ona momotu ona ua uluola ma tupu le aiga.

O tausaga taitasi e faamanatuina pea lea lotu faamanatu ma ua maitauina ai pea le sagisagi fiafia o tagata matutua o loo tausia le aiga aemaise o fanau lalovaoa.

O loo faatinoina pea le lotu i Niu Sila nei e pei ona taitaiina e nisi o Sa’o o le aiga ia Tusani Toma Taito, ma Tusani Elia Tufue faatasi ai ma le lagolago a nisi o tino matutua i totonu o le aiga, ae o loo faaauau foi le lotu i Samoa.

E sui lava faiga ae tumau faavae. O le lotu i lenei tausaga na faatinoina ai e tina le taitaiina o le sauniga lotu e amata ai le faamoemoe, ae o le komiti sa gafa lava ma le faagasoloina o polokalame, ma o se suiga fou lea ua vaaia i lenei tausaga. Ua vaevaeina le aiga i tagata matutua, o fanau talavou, fanau laiti faapea ulugalii laiti e talatalanoa i kulupu poo ā ni vaega tāua e tatau ona faasoa mai ai auā le lelei ma le manuia o le aiga i le lumanai, faatasi ai ia iai se leo o nei vaega taitasi i totonu o polokalame fai.

O le autalavou sa tuuina mai lo latou manoga e lē lava le ‘afa aso e fai ai polokalame o le lotu, e tatau ona aso atoa ma umi, ma e tatau foi ona mafuta soo.

O le naunautaiga o fanau ia mafuta le aiga i taimi uma auā o le tumau foi lea o le nofo lelei ma le nofo fealofani, aemaise ai o loo fiafia ai o latou talavou.

Na faaiuina polokalame o le aso i aitema a aiga taitasi ma faafiafiaga eseese lea sa maua ai foi le ‘ata ae ua faailoa ai foi le taleni o loo i fanau.

O le aiga e iai Iesu o se aiga e fiafia ma fealofani, ma o le tāua foi lea o le mafutaga e feiloai ma mafuta ai le aiga i tamā ma tina faapea le fanau, e pei o upu a le tusi, se mea ina matagofie o uso ae nonofo fealofani ma mafuta faatasi.

O le komiti o le aiga o loo faatinoina ana polokalame o le susuga ia Taito Tala, o Tuimatavai Rosetta ma Iva Wong Chiu i lalo o le taitaiga a Sa’o o le aiga ma le nofo a suafa. 

O le tausaga fou o lea ua toe taoto atu ai le isi lotu faamanatu o le aiga i le masina lava lenei o Iulai.