O le tausaga e 2012 na uluai faavae ai le Ekalesia Papatiso i Nuu Fou i le nofoaga o loo iai nisi o atinae e pei o le fale suauu mai le popo ma le nofoaga mo suesuega tau faatoaga i Nuu.
E lē mamao le ekalesia Papatiso ma ia atinae aemaise e lē mamao foi ma fanua faatau i se vaega i Tafaigata lea ua nofoia e le toatele o aiga ua faatau ma umia fasi fanua i lea vaega o le motu o Upolu ma le lio o le taulaga o Apia. Ua toatele foi aiga o le pitonuu o Sogi ua siitia atu i ai i le fuafuaga a le Malo, e faaaogā eleele sa nonofo ai i Sogi mo nisi o taumafaiga tau ile atina’e o le atunuu.
O nisi o ia aiga ua tapuai nei i le ekalesia Papatiso i Nuu Fou ma o i latou ia faatasi ai ma nisi o aiga ua faavaeina lea ekalesia ma ua tupu ai ma ola le galuega e pei ona faaalia e le taitai Toeaina le susuga i le faifeau o loo faauluulu i ai ekalesia Papatiso Samoa i Niu Sila, ae faauluulu foi i ai Ekalesia Papatiso uma i le Pasefika, le susuga Faasooletalalelei Auvaa.
O le galuega o le Malumalu o loo faagasolo o se isi lea o pine faamau o le ola o le ekalesia ma ua togi maa i ai le aulotu faaopoopo i ai ma fesoasoani mai le ekalesia aoao ma ua vave ai le galuega ma le faamoemoe e tatala ma umusa pe faaulufale foi, i le masina o Setema o le tausaga nei.
I se feiloaiga ma le susuga i le taitai Toeaina o le ekalesia na ia faailoa ai, o se tasi o manulauti o aoaoga a le ekalesia Papatiso i le lalolagi e sili ona tāua ma o le fatu foi lea o le aotelega o ana aoaoga faakerisiano, o le faataua lea o le tagata soifua i ana galuega ma atinae.
“O le tasi lena o sini autu o aoaoga a si a matou foi tapuaiga o le tagata ia ave i ai le faamuamua, ia lē gata o lona ola faaleagaga ia faitau i le Tusi Paia ma malamalama i ai, ae ia iloa foi ma silafia ona savali ai.
O le vaiaso ua mavae na taunuu ai i Samoa le susuga i le taitai Toeaina e le gata i le fia asia o le galuega a le aulotu i Nuu Fou, ae o le auai atu i se fono tāua a le ekalesia sa usuia i Amerika Samoa mo le sailia o se faifeau faatamā o le ekalesia i Samoa.
Faaalia e le susuga Faasooletalalelei Auvaa o le susuga i le faifeau sa avea ma faatamā le susuga Lototau Alofa Seumanu o loo tausia le aulotu i Salelologa i Savaii, ua gasegase ma ua matua foi le soifua ma ua faia ai le faaiuga e faasee tuagalu ma le tofiga ae saili se tasi e faaauauina.
E tusia lenei lipoti e lei mae‘a mai le fonotaga i Tutuila e iloa ai se faaiuga ua taunuu i ai. O le malolo penisione ai o le susuga Lototau ua ave ai le faamalo a le taitai Toeaina i lea auauna, ona o se tasi sa finau malosi mo le galuega i Samoa aemaise o se tasi o ana galuega tāua o le faaofi atu o le ekalesia Papatiso i le Fono a Ekalesia Soofaatasi poo le Samoa National Council of Churches, lea ua avea ai nei ma se tasi o sui auai.
“E lē galo le sao o lenei auauna auā o le a avea ma ona ‘ai tāua lea taumafaiga mo le sologa lelei o le galuega tala‘i i Samoa”.
