Faamalo atu le soifua manuia i le tatou atunuu, aemaise o le aufaitau, i galuega o le vaiaaso ua tuanai, ae iai le talitonuga o le a manūteleina foi lenei vaiaso fou ua savalia i le alofa ma agalelei o le tatou Tapaau i le Lagi. Ae alo maia o le faamae‘aina lenei o faamatalaga e uiga i le afioga ia Tunumafono Avaula C Faamoe, e pei sa amata atu i le vaiaso talu ai
A o le‘i see atu i le vaega faaiu mo le afioga ia Tunumafono, e muamua lava ona ou faamālūlū atu ma faamalie atu i le paia i aiga, aemaise ai o le afioaga i Sataoa, i le Afio o Taoa ma Afemata, Afio Seuli ma le Maopu, Tama a le Uso ma le Igoamatua ia Faleafulunono, ma upu i le Faletolu, aemaise ai le paia i Aiga Sa Tunumafono o le aiga malosi, ona o le sasi ma le faaletonu i le vaiaso talu ai ona o feeseeseaiga i le suafa Tunumafono ma lona faalagiina.
O le upu masani a le atunuu, E leai lava se faiva e ‘asa ma se maumau. E poto lava foi le tautai, ae iai lava le atu e sese i ama o lona sa. E iai le talitonuga o le silasila i le Atua ma lona finagalo, o le a ufiufi ai a manugase se sese, ma se lape o le tusitusiga, ae laei i le finagalo faamagalo ma tuli pea so tatou ‘ai mo le lumanai.
Tunumafono Avaula C Faamoe
O se vaaiga lenei i le soifua tautua ma le soifua galue o le afioga ia Tunumafono, e maoa‘e lava le sailimalo o lenei tamalii o le atunuu. E ui ina po le silasila, peitai sa ia talitonu ma iai le tofa mamao e lē o le iuga lea o le tausinioga, ae o le auauna i le Atua e mafai ai ona ia tuu faavasegaina mea uma o lenei olaga.
Soifua galue ma galuega
Ina ua mae‘a le tele o a‘oa‘oga sa feagai ai ma le tamalii, ona ia filifili ai lea poo fea tonu le galuega e talafeagai, o le a amata ai lona soifua galue. Na iu le filifiliga ma ua ulufale ai loa ina ia faia lava sana auaunaga e pule ai lava ia, ma o se tautua foi e fetaui lelei ma le tulaga o le soifua ua iai.
Na lesitala le kamupani a Tunumafono i le tausaga e 2003, o se auaunaga e fesoasoani ai mo le tulaga tau faufautua mo pisinisi. O le kamupani ua faaigoaina o le First 5 Enterprises Limited, ma o ia lava o le pule sili o lea tautua.
E pei ona ta‘ua, o lona tomai faapitoa lava lea sa mafua ai ona suia le faamoemoe i le taimi o a‘oa‘oga. O le naunautaiga lava o le fia fesoasoani lea mo tagata lautele i faafitauli ma manoga faapitoa mo le saogalemu ma le aga‘i i luma. O le First 5 Enterprises, e lē gata i le fautuaina mo i latou o loo tau fuafua ma amata pisinisi, ae faapea foi le taimi o le a faatauina ai pisinisi, pe suia foi lē e ona le pisinisi. O loo faaauau pea lea auaunaga e oo mai i le taimi nei.
