Ua mae‘a le fonotaga faaletausaga a faauluuluga o matagaluega o tagata tafafao a le Pasefika i Saute e pei ona tauaofia ai i le Aso Tofi o le vaiaso na tuanai atu aso 18 o Iuni i le aai o Melepone.
E sefuluono atumotu o loo i totonu o le lio lea talu ona faavaeina mai i le tausaga e 1983 ma e latalata i le luaselau faletalimalo ma kamupani o loo galulue faatasi i le faalapotopotoga.
E mae‘a le tausaga o le nofoaiga ma sailia ona laulau fou. I le mae‘a ai o le palota i le Aso Tofi mo le sailia o se laulau fou mo le isi tausaga, ua toe tulai mai ai le tamalii iloga o lo tatou atunuu i lea matagaluega le afioga a Papalii Matatamalii Sonja Hunter i le tofi Taitaifono.
O le sui mai le atu Solomona le susuga ia Josefa Tuamoto ua avea ma sui taitaifono, lea ua suitulaga mai ia Linda Kalpoi o Vanuatu sa iai.
O le fā ai nei o tausaga o lafo pea le faatuatuaga a le faalapotopotoga ia Papalii, e pei ona ia saunoa ai ma momoli lona agaga faafetai i sui o atumotu uma i lo latou faatuatuaina o ia aemaise o la latou lagolago i le faataunuuina o fuafuaga faataotooto mo atunuu uma.
Na maua se feiloaiga a la tatou pepa ma le susuga Papalii ma ia faaalia ai lona agaga faagaeetia i le tofi ona e iai foi lona tāua ma le aogā mo Samoa ma ona tagata aemaise lava o le matagaluega o tagata tafafao.
E pei ona silafia o Papalii o loo faauluulu i ai le matagaluega (CEO) o tagata tafafao a Samoa, ma e lē o toe po malaē i le tāua ma le siitia o le tulaga o le matagaluega talu ona ia tauaveina le faauluuluga.
Tau ina ia utupupuina pea e le Atua lona soifua tautua ma faatamaoaigaina pea auā faiva ma tiute.
