Tumau le Laulau a Fono a le Ekalesia Metotisi i lana Koneferenisi 2013-2014

O le mae‘a ai o le usuia o le Koneferenisi a le Ekalesia Metotisi i lenei tausaga e pei ona tumutumu ai le laumua o le Ekalesia i Fogaa, ua toe faatumauina ai le laulauafono a le Ekalesia 2013 – 2014 ina ua mae‘a faigā filifiliga a le Ekalesia e ala i lana Koneferenisi.
O le Susuga Aisoli Iuli Tapa ua toe filifilia nei e avea ma Peresetene o le Ekalesia, o le Susuga Apineru Lafai ua toe filifilia foi i le tofiga o le Failautusi Aoao o le Ekalesia, ma le Susuga Ropeti Faleatua ua toe tofia foi e avea ma Teutupe a le Ekalesia.
Ua mae‘a foi ona faia nisi o fesiitaiga e ala i Sinoti taitasi lea e aofia ai Amerika ma Hawaii, Tutuila, Ausetalia ma Niu Sila faapea ai ma Samoa nei e ala i Sinoti e lua i Savaii faapea ai ma le tolu fa i Upolu nei.
O Faiga Faavae a le Ekalesia Metotisi e 7 tausaga e galue ai le Faifeau i se Matagaluega ma o se faifeau foi ua maea ona faauuina.
Peitai e i ai faifeau e mafai ona sii i le 5 tausaga,  e  fua lava i le finagalo o le Koneferenisi faapea ai ma le Komiti a Faifeau.
O le fono lenei a le Ekalesia Metotisi e usuia i le masina o Iulai i Tausaga taitasi ma e vaiaso atoa e usuia ai lea fonotaga.
E momoli atu ai moomooga alofa o le Nusipepa a le tatou Malo i le Ekalesia Aoao i le maea ai o lana Fonotaga malo le onosai ua faamalo le faatoatoa.
Lilifa ane ia manū mai lagi aua tiute ma faiva faaauau o lau Afioga i le Pertesetene ma le Laulau, ae a le Ekalesia Aoao i ona Vaega uma.