Ua soloia ele Faamasinoga Apili le faasalaga ale Faamasinoga Maualuga faasaga i moliaga e lua ole faia oni teuga tupe taufaasese se lua faasaga ile alii mai Eleni, o Nico Gianno.
O lea faaiuga na faia ina ua mae‘a ona silasila le Faamasinoga o Apili i taualumaga ole faamasinoga, lea sa faatautaia ele afioga ile Faamasino Sili ia Patu Tiavaasue Falefatu Sapolu. I lea faamasinoga, na faamaonia ai e Patu moliaga ia e lua faasaga ia Gianno.
E tusa ai ma mau na folasia ile faamasinoga, e faapea, ole masina o Me 2015, na faatoa aunuu mai ai i Samoa le alii o Gianno ma le paaga faapisinisi, le tamaitai o Rosita Standfield.
Na taunuu mai loa i laua, amata loa ona faalauiloa le kamupani oloo galulue ai i laua i Lonetona, le UFUN Group. Na faalauiloa ai male polokalame ole UToken, lea sa laua faatosina mai ai tagata, ina ia avatu a latou tupe e teu i totonu ole polokalame.
Sa laua faamamafa i tagata e faapea, a teu lau tupe ile polokalame ole UToken, e faasefuluina le seleni latou te maua, pe a oo atu ile aso 21 Iulai 2015, ma ole vaega tonu lea na amata tosina ai loa tagata e ave a latou tupe e teuina i totonu ole polokalame ale UToken.
E tusa ai ma mau ile faamasinoga, o tupe ia na oo atu lava lona aofaiga ile $130,000.00, ma o tupe foi ia lea na teuina e Gianno ma Rosita i totonu ose teugatupe sa faia i lalo ole suafa o Gianno e tusa ai o mau sa tuuina mai ele faletupe ale ANZ, e faatolu ona oo atu Gianno e lafo ni tupe mai lea teuga tupe i lana teuga tupe oloo i Lonetona.
Ole taimi muamua, ile aso 18 Me 2015, na aveesea mai ai se vaega tupe e $20,000 mai le teuga tupe ile ANZ, ae lafo ile teuga tupe a Gianno i Lonetona. Ole aso 19 Me 2015, na toe o’o atu ai foi Gianno, ma aveese mai le isi $20,000.00 mai le teuga tupe i le ANZ, a eave i le teuga tupe o lo’o i Lonetone. O lafoga tupe ia e lua, na fesiligia ai e le faletupe po’o le a le mafuaaga e ave ai ia tupe tetele i Lonetone, ae o le tali a Gianno, e tausi ai lona toalua ma lana fanau. Ae o lo’o faamauina foi i le faletupe, e ala i faamaumauga na tuuina atu e Giano, na mafua ona faia le teuga tupe i Samoa, ina ia mafai ona sau sa’o iai lona totogi mai Lonetone.
O le aso 20 Me 2015, na toe oo atu ai foi Gianno e toe ave se isi $20,000, ma o ina na masalosalo ai loa male faletupe, ma logo loa le faletupe tutotonu a Samoa, le Central Bank of Samoa. Na poloaina loa ele CBS le ANZ, ina ia taofi loa le teugatupe a Gianno, e aua ne‘i toe faatagaina le aveesea ose tupe, ae amata ai loa ma suesuega ale faletupe CBS.
Na maitauina ele Faamasinoga, o tupe ia na teu ile teuga tupe ile ANZ, o tupe a tagata e toaono ia sa faalauiloa iai le polokalame ole UToken, male faatosina e faasefuluina lana teuga tupe pe a oo ile aso 21 Iulai 2015. Ae o lea foi e ese le tala ile faletupe, o le tusitupe lea na fai ina ia sau sa‘o iai lona totogi.
Na faamaonia ele Faamasinoga le faia oni faamaumauga ma faamatalaga sese e Gianno i luga o pepa ia na faavae ai lana teuga tupe i Samoa, faapea ma pepa o tupe sa lafoina i Lonetona.
Peitai, ile silasila ale Faamasinoga Apili, e atagia mai le molimau ale tamaitai ole ofisa ole faletupe ale ANZ, e ui lava e iai vaega e tatau ona faatumu ele tagata e lafoina se tupe, ae e lē faalagolago tele faletupe i pepa nei poo telegraphic money transfer document.
Tumau le faasalaga faafalepuipui 3 tausaga
E ui ile taliaina ole talosaga apili a Gianno mole toe iloiloina o ia moliaga e lua, peitai e lē o avea lea vaega e faaitiitia ai le faasalaga tolu tausaga lea ua faafalepuipuiina ai o ia ile 3 tausaga. E ono moliaga ole mauaina o tupe ini auala taufaasese (obtaining by deception) na molia faatasi ai Gianno ma Rosita, ma na faamaonia uma ia moliaga.
Ole faasalaga ale afioga ile Faamasino Sili, e 15 masina e faafalepuipui ai Rosita, ae 3 tausaga e nofosala ai Gianno.
E mafua le eseese o tausaga e nofo ai i laua ile falepuipui, ona e manatu le faamasinoga, o Gianno lea sa taulamua i mea uma sa tutupu.
Ile taimi ole suesueina o ia moliaga ile faamasinoga, sa tāpā ai se sui mai le ofisa o leoleo i Thailand, le nofoaga tutotonu ole kamupani ale UFUN, lea e faigaluega ai Gianno ma Rosita.
Ole molimau a lea alii leoleo, ole aso 10 Aperla 2015, na osofaia ai e leoleo Thailand le nofoaga ole UFUN i Bangkok, ma taofia mai ai i latou sa faauluulu iai lea kamupani.
Sa faapea foi ona taofia mai ai ma komepiuta ma faamaumauga ma tusitusiga uma ale kamupani i lalo ole vaaiga a leoleo.
Na ta‘ua e lea molimau, ole mafuaaga ole osofaiga, ona e masalomia e taufaavalea ma taufaasese auala oloo faatosina ai ele kamupani le auina mai o tupe a tagata e teu i lalo ole latou polokalame ole UToken.
Ole aso 10 Aperila 2015 le osofaiga i Thailand, ae aso 12 Me 2015 taunuu mai i Samoa Gianno ma Rosita.
Ina ua poloaina le CBS poo le faletupe tutotonu o Samoa, le taofia o tupe a Gianno mai lana teuga tupe i Samoa, na amata ai loa foi ma suesuega faasaga ia Gianno ma Rosita.
Na faapena foi ona mataituina uma gaoioiga a i laua ia, seia oo lava ile aso na oatu ai ile malaevaalele ole a toe foi, ae puevae ai loa e leoleo ma loka mai ai.
Ile silasila ale Faamasinoga Apili, oloo talafeagai ma alagatatau le faasalaga ua tuuina atu mo i laua ia, ma e tumau lea faasalaga.
O lea ua mae‘a le talosaga apili, ma e tusa ai ma tu ma aga o tulaga faapea, a lē manuia se talosaga apili, e tatau loa ona tuuina atu i laua nei e amata tuli o la faasalaga ole 15 masina ole isi, male 3 tausaga ile falepuipui le isi.
