‘A e taalo ane i se kirikiti, Pei oe o se moamoa Fiti, I lau mulumu mo‘emo‘e, Ma si au faatea taavili’…. O upu ia e pepese ai Malia ma Alapati o le Penina o Tiafau. O auga na ma saafiafiga o le taaloga i le sipili faa-Samoa. Ae ano ane la i le taaloga a palagi, lea o loo taalo ai le alo o le atunuu, o Ross Taylor mai Anoamaa i Sasae i le afioaga o Saoluafata.
O iina, e lē mamao ma Saoluafata na amata ai e misionare i Piula le taaloga i lena itu o le motu. I evaga o lea taaloga ua masani ai le atunuu, e o lua lava le malo ma le faia‘ina. A o le mea e pito sili ona tāua, o le ‘ata, ma le fiafia.
O pesega o le lape ma le faaili e ili i taimi uma a le vaega lea e faatea – o le sipili tonu lena o lenei faagatama. A maua foi ma se ta laitiiti i totonu o le malae e maua ai ni ‘ai se lua pe leai foi, ona matuā ova loa lea ma sikuea le taimi na alu ai i taaloga a le autalavou.
Lipi ma na mea i taaloga o le T20, le Ipu a le Lalolagi o loo fai nei i Initia. O le ‘au a le tamalii lauiloa, ma leva foi i le taaloga, le alii o Ross Taylor ua na o latou ua maua le matuā fiafia tele. Auā o lea ua taunuu i le taamilosaga o le semi – ua malolo uma isi ‘au matautia i le Kiwi.
O ‘au ua faalele e le Kiwi e iai Initia, Ausetalia, Bangladesh ma Pakistan. O ‘au uma nei e lē solomuli le latou taaalo. Aemaise Ausetalia e lilivau ia Niu Sila i taimi uma.
A o Initia foi. O le atunuu lea o loo talimalo i le taaloga. E tatau lava i le atunuu talimalo ona manumalo ia latou taaloga. Aisea? Auā e masani i tulaga o le malae, i le susū o le ‘ea, ma le vevela o le aso ma mea uma faapena.
O le latou malae foi e tatau lava i ‘au talimalo ona masani i lo latou lava tuāfale. Peitai! Peitai! Pigi lava e Niu Sila Initia fai le faatoesega a le ‘au i lo latou atunuu. Na ta muamua Niu Sila maua le 126 o ‘ai. Ae ta Initia pepē uma le ‘au i le na o le 79 o ‘ai.
E lei taumate e le aufaasalalau e oo i se tulaga faapea. Auā o Initia lava o loo ave i ai le faamoemoe e manumalo i lea taamilosaga atoa. A o lea ua malolo ma faamalele e le manu e leai ni apaau. E 10 ‘ai a Taylor i le taaloga lea ma Initia i polo e 14.
Sosoo ai ma Ausetalia, ne‘i faapea o se mea mao. Ta Niu Sila maua le 142 ‘ai. Ae ta Ausetalia e na o le 134 ‘ai. E pei a la e mo‘i le mimita a le Kiwi. E 11 ‘ai a Taylor i le taaloga ma Ausetalia i polo e 11. Mea sili lea ua faatea muamua ‘au malolosi ia o Initia ma Ausetalia.
Sosoo ai ma Pakistan. Ta Niu Sila maua le 180, ae na o le 158 a Pakistan na maua. E matua mo‘i mo‘i lava faiga a Niu Sila. E 22 ‘ai na manumalo ai. E 36 ‘ai a Taylor i le taaloga ma Pakistan i polo e 23.
Sosoo ai ma Bangladesh. A malo i le taaloga lea le Kiwi ona lele sa‘o lea i le semi. Ta Niu Sila maua le 145 o ‘ai. Ae na o le 70 ‘ai a Bangladesh. Se, e matuā matautia faiga a le Kiwi. Ua sao i le semi, ae toe tasi le taaloga. E 28 ‘ai a Taylor na maua i le taaloga i polo e 24.
O loo sauni atu nei loa la Niu Sila i le la feiloaiga ma Egelani i le isi Semi, a o West Indies ma Initia i le isi Semi.
O le mea tāua i taaloga ua uma nei a Niu Sila, na tata muamua le ‘au i taaloga uma nei. E foliga e pito sili atu ona lelei le ta muamua i lo le tea muamua. O mea la ia ua mataina e Egelani ma Initia. A malo i laua i le togi o le siliva, o lona uiga o le a ta muamua ae faatea Niu Sila. Pe a malo i le togi o le siliva.
I talanoaga a Taylor ma le ‘au faasalalau na ta‘ua ai e ia, “O le taaloga lenei o le T20 e fefiloi ona uiga. Tusa pe o le ā le lelei o le ‘au ma le tele o ‘ai, ae a pigi e le tagata e lelei le ta le ‘au faatea, e tele foi ‘ai a lena ‘au e maua ma matuā suia ai ma le taaloga.”
Ae e lē o mamao ma ona mafaufauga le alii ta‘uta‘ua a Niu Sila lea ua maliu, o Martin Crowe.
“E telē la‘u mea aogā na maua mai ia Martin. E lē o galo i le ‘au lenei taimi faanoanoa i le taaloga i Niu Sila i le tuumalo o lenei alii tulimanu i le taaloga i le atunuu. Ae se‘i faauma le taamilosaga ona fai lea o se isi fuafuaga i le faamanatu o le aogā foi o Martin Crowe i le aufili a Niu Sila.”
O le isi faigata ia Niu Sila o le faamavae lea o le latou Kapeteni sa iai, le alii o Brendon MacCallum.
“O le ritaea o Brendon o se mea telē lea i le ‘au ona o le lelei o le ta a lea alii. Peitai, ua tofu lava le tagata ia ma le tiute e fai i le taimi e taalo ai, ma o loo faapea ona tauave ai lava e tagata uma le faamuamua o le ‘au.”
