O le tala mulimuli mai le Komesina o Leoleo faatatau ile saogalemu o sui o Samoa i Sudan, atonu oloo saogalemu auā ana aafia soifua ua leva ona logo mai o ia ma le matagaluega o Leoleo i Apia e pei lava ona masani ai i vevesi e tulai mai i atunuu mamao e aafia ai fanau a le atunuu.
O lea malo i Aferika oloo toe fetaua‘i lava fitafita – ona ua vaeluaina ua ‘au nisi ile Sui Peresetene ua taumafai nei e faoa le faigamalo o Sudan ae o isi oloo tumau le lagolago i le Peresetene.
O le faafitauli ua soloatoa tagata ma leoleo mai i fafo i nei vevesi ma e toavalu lava leoleo tamaitai ma alii a Samoa oloo galulue i lalo o Puipuiga o le Filemu i totonu lea atunuu ile taimi nei. Na maua mai se telefoni ile amataga o le vaiaso na tea nei e le susuga ia Misa ma lona faletua ia Ferila o Vaitele mai si o la alo o le alii e suafa ia Johnny oloo ile ogatotonu o vevesi nei ile aai lea e ta‘ua o Jubah.
E iai le isi nofoaga o leoleo o Malo Aufaatasi ma na ia logo mai lona fefe male mata‘u ile lē taofiofia o fitafita ua soloatoa le tafana ma le tapomu o fale nei oloo faamautu ai ae oloo soifua pea ma sao mai ana fesootaiga i ona mātua – na asia mātua nei ona o le fia maua ose ripoti ma ta‘ua ai le tulaga oloo iai lo la alo ma na manino lava foi le mafatia o le ulugalii ile faamatala ai o le tulaga matautia o iai nea lea nofoaga.
Ua tatau ona see ese leoleo o le puipuiga a Malo Aufaatasi peitai e lē o iai se filemu ma oloo faatalitali lava ma taumafai e saili se nofoaga malu e faamautu ai ona faatoa mafai lea ona tuua lea itu o Sudan.
Faaalia e lea alii e na o ia le leoleo Samoa, le leoleo Fiti e toatasi oloo filo ai i isi leoleo o le puipuiga a Malo Aufaatasi i lea itu o Sudan, ae o le isi toafitu o leoleo a Samoa nei oloo ta‘ape i isi itu o le atunuu e lē o oo iai vevesi nei. Ta‘ua e tala mai i atunuu mamao a le ABC, ua toalua leoleo o le Puipuiga a Malo Aufaatasi ua uma ai soifua i ia fetauiga e aofia ai se sui o le Malo tele o Saina.
Na pue lelei faatalatalanoaga ma mātua o le alii leoleo Samoa lea ma le talosaga a si ona aiga i Samoa nei ina ia manatua lo la alo i talosaga a le atunuu. Na logo leoleo ma ta‘ua ai e fai lava si tele o tuatuagia o le Komesina o Leoleo e lē o maua atu ile ofisa.
Na logo ile failautusi le mataupu ae faapea mai atonu oloo saogalemu uma leoleo a Samoa ma e lē tatau ona faapopoleina fua le atunuu ma aiga o nei leoleo. Na faamatala iai o le tiute faatusitala le logo o faafitauli oloo ono iai tagatānuu o Samoa ma ia logo mātua ile tulaga o iai a latou fanau. Ae e toatasi lava le leoleo Samoa lea ua matou maua le tala o lea na aafia i fetauiga ae oloo faasaoina mai.
Faaalia e lea alii leoleo ile afiafi ua te‘i ile vili atu o le ofisa o Leoleo i Samoa nei pe aisea ua agai ai ona aiga ile ofisa faasalalau ma isi sui tusitala ae o lea e lei sau se tala aloaia mai ile Ofisa. Na toe talosaga mai Johnny e tuu ese ana tala na fai mai leaga e aafia sa‘o ai nei lana galuega ona e tatau lava ona sau se tala aloaia mai ile ofisa o Malo Aufaatasi poo i leoleo ma na toe logo mai lava lona tamā ia Misa e malilie ia tusitala e aua ne‘i faaalu le lipoti.
Na faaalu le lipoti ae ua tuu ese igoa o le aiga ma le leoleo ona o le manatu na ave ile aiga e onosai o le tiute a tusitala le logo o mataupu faapea ile atunuu.
O le aso na sosoo ai na lē maua atu foi le Komesina ae na toe maua i lana numera feaveai. O iina na faapea mai ai loa le Komesina e popole tele le matagaluega i fanau nei oloo i fafo ae e lē mafai lava ona sau se upu e faatatau ile mataupu talu ai o ala o mea, e sau le lipoti mai ile UN poo Malo Aufaatasi, sosoo ai lea ma le matagaluega o leoleo ile atunuu ma poo ā lava tala a lea alo o Samoa e ave i ona mātua e lē mafai lava ona avea ma faamatalaga aloaia.
Ma talu ai oloo tālia pea le lipoti a Malo Aufaatasi i lea faaalvelave, e lē mafai ona iai se latou tala e faia. O le mau a le Komesina, e leiloa poo ai o le a vili fua e otegia le alii leoleo ua toe vili mai ai ma taumafai e taofi le faaalu o le lipoti e ui o lea na alu lava.
