Tuliloa faamanuiaga mai tuaa ua mavae

A faamanuia mātua i le fanau e manuia lava, aua lava nei masalosalo le loto ma le mafaufau. O le taofi ma le lagona lava lea mai le tele o tausaga ma le tele o augatupulaga o Samoa. E matamata tetele pea lava i le loto ma le mafaufau saunoaga ma upu tuutaliga mai a mātua i aso ua mavae a o lei maliliu ma lagomau i tia sa.

O le molimau a le tina o le tamaitai o Rita Teulevalasi Tuimalealiifano-Nanai, sa faamanuiaina i le faailoga o le Bachelor of Science i le vaiaso talu ai i le Iunivesite o Aukilani. Sa ia ta‘ua ai ma manatua le faamanuia ane o lona tuaa ia te ia ma lana fanau a o lei maliu ma tuua le malo e le afioga i le Tama Aiga Tuimalealiifano Suatipatipa i tausaga ua mavae.

O le ausia e le tamaitai o Rita Teulevalasi ua ia talitonu ai lava o se faamanuiaga sa tulitulioa mai tausaga e tele, auā sa faalogo lava i ai a o saunoa i ai lona tuaa. E auai faatasi ma le tatalo sa tuuina ai i le Atua mo le tele o taimi ina ia manuia le taumafai o le fanau.

O Rita o se alo o le afioga ia Nanai Panapa ma le faletua ia Mina Tuimalealiifano-Nanai o Leulumoega ma Falelatai.

O se avanoa e momoli atu ai faamanuiaga mo oe le afafine mai ou mātua peleina. Malo le tauivi ma le finau ua iu manuia ai lou taumafai, ae manatua e lei gata le olaga aoaoina, e iai foi isi sitepu o muamua e mafai ona faalauteleina ai pea le atamai ma le poto.

Faamoemoe i le Atua e manuia ai laasaga uma o le olaga taumafai. Alofaaga mai ou mātua ia Nanai Panapa ma Mina faapea uso ma tuagane. Alofaaga foi mai ou mātua faaleagaga, Pastor Isaia ma Lisa Lameta o le Peace Chapel West.

O Morgan Tuimalealiifano, Lanuola Vaosa, Pinelo, Iuni, Fiapia, Suatipatipa, Vaivase ma Tone, faapea le Nanai family.

Ia manuia le taumafai mo le lumanai