Ua fai le faaiuga ale Iuni Lakapi ale atunuu (SRU) e toe faasalalu le avanoa ole Faiaoga ole ‘au taitoafitu a Samoa. Ae faamuta le avea o Damien McGrath ma faiaoga.
E na ole pau lava le matatia (KPI) na filifilia ai McGrath e avea ma faiaoga a Samoa ina ia maua lea ose avanoa ale Samoa Sevens e ofi atu ai ile Olimipeka i Rio. Peitai e lei ausia lea, ina ua faia‘ina Samoa ia Sepania ile taaloga faaiu ole taamilosaga filifilia.
E ui na manumalo Samoa ile tasi o taamilosaga ale World Rugby Sevens, lea na manumalo ai i Falani, peitai ole tumutumu lava ole faamoemoe ole pine auro ile Olimipeka. E lei maua se avanoa a Samoa ina ua faia‘ina ia Sepania.
Ile saunoaga ale CEO ale SRU, Faleomavaega Vincent Fepuleai, na ia ta‘ua ai, “Na iai lo matou naunautaiga e alu le Fitu a Samoa ile Olimipeka. Ole lē ausia la o lea tulaga ole mafuaaga foi lea ose tofa ile Laulau ale SRU ia toe saili se isi faiaoga mole Samoa Sevens.”
Na ta‘ua foi e Faleomavaega, e iai le avanoa e toe apalai ai le pulega ale Samoa Sevens. E lē o taofia lea avanoa. O lea gaioiga ale SRU e lē o tutusa lea male lagona ole toatele ole atunuu i tusitusiga i luga ole Facebook.
“E uma a le olaga nei o tau sue se faiaoga ale Manu Samoa Sevens. Ole faaletonu, e lē lagolagoina le faiaoga poo ai lava,” ose finagalo lea a Faumuina Wayne Fong na faaalia i luga ole Facebook. E faapea foi se lagona a Sione Uluilakepa, “E lelei le tulaga ole taumafai a Damian McGrath. E manaomia se isi tausaga e tasi e tau faatonu ai le ‘au oloo iai nei.”
“Ole tagata sa‘o lea mole faiaoga ale Samoa Sevens. E lei fausia Roma ise aso e tasi. E ao ile Laulaufono ale SRU ona malamalama i lea tulaga,” ose lagona lea a Pati Mualia.
“E matautia faiga a Damian McGrath aemaise ole tulaga o tama oloo avanoa mole fitu ale atunuu. Na faapefea ona taunuu le SRU i lea filifiliga ile na o masina na tauave ai e Damian le ‘au? E ui e lei oo ile Olimipeka, ae na iai le manumalo a Samoa ile taamilosaga ale Lalolagi ile manumalo i Paris. Na‘o mea piopio mea ia e maua mai le SRU,” ose lagona faaalia lea a Mauga Tuioti.
E lē na ole pau lea o toatuga oloo feagai male Samoa Sevens. Ua faailoa foi ele SRU le alu ese ole alii kapeteni o Faalemiga Selesele lea ua taalo ile ITM Cup a Niu Sila. O lona uiga ole a lē avanoa o ia i taamilosaga amata ale World Sevens. Oloo iai foi ofa mai Europa mo Phoenix Hunapo-Nofoa ole isi tama lelei lava ale ‘au. Ile faitau ale SRU, ole ‘afa ole ‘au, poo le 50 pasene, ole a faamavae ona o konekarate lelei oloo maua mai Europa ma isi atunuu i fafo. Ua amata foi toleniga ale ‘au fou mole taamilosaga ole 2016/2017, e pei ona saunoa iai le alii faiaoga. Na ia ta‘ua e na ole toatolu tama ole ‘au ole tausaga ua tea oloo avanoa, ae ua “salalau” le toatele i isi avanoa fou mo i latou. Ose tulaga lelei lea mo ia tama taaalo.
“E iai le lagona e tatau ona taofiofi ile ‘au atoa ae ole manuia lea e maua e tama taaalo pe a manumalo le ‘au e pei ona iai ile tatou taaloga i Farani. Ole a toe saili atu i fafo i Niu Sila ma Ausetalia i isi foi tama taaalo auā le ‘au ale atunuu. Peitai, e foliga mai ua leai se avanoa e faatino ai tapenaga ale alii faiaoga auā o lea ua faamuta lana konekarate.
