Na toso i le pogisa, pupuni le gutu ae faamalosi
O Tupe Felise o se alii ua fai lona toalua ma lana fanau. O lo latou fale e sosoo ma le fale o se aiga e masani ona asu vai i ai i lo latou paipa le teineititi na ia faia i ai se faiga faamalosi.
O le ono i le afiafi o se tasi o aso na tuli ai foi le teineititi e lona tina e asu vai mai le paipa o lona uncle lea e sosoo fale ma le alii o Tupe.
O le afiafi lea na maua ai le avanoa o lea alii e faatino ai se soligatulafono tau feusuaiga sili ona matuiā ma ogaoga.
Faaalia e leoleo na popō ma toso e le alii le teineititi i se mea pogisa, ona pupuni lea o lona gutu ae faatino loa i ai se faigaaiga faamalosi (rape).
Na fiu le aiga o le teineititi e tatali le asuga vai ma tau valaau ai loa se tasi o uso o le tina o le teineititi poo fea o iai.
Na sola ese le alii o Tupe ae alu ane loa le teineititi ma faamatala i le uso o lona tina le mea na fai ia te ia.
O le lipoti a le fomai na siakiina le teineitiiti na iloa ai ni totolia i le fatafata o lē na aafia, ma se masae i lona itutinosā, o faailoga ia sa faatino se faigaaiga faamalosi.
Sa molimau le teineititi i luma o le faamasinoga sa faasuaava le tagata na faia le gaioiga ia te ia, ma na saga faamaonia atili e Tupe i leoleo o ia sa onā.
Peitai e ui i molimau a leoleo ma le molimau a le teineititi ae sa teena pea e le alii lona faia o se solitulafono e ui na faamaonia lona moliaga i se faaiuga a se laulau o faatonu na iloiloina molimau.
O lona tetee foi na faailoa i le lipoti a le ofisa o le faanofo vaavaaia lea na faaalia ai e le faamasinoga o se faailoga o le leai o se salamō moni o Tupe i lana gaioiga na fai i le teineititi.
Ua aliali mai pea solitulafono faapea e aafia ai le itupa o tamaitai laiti, ma e lē o alo tamala ai foi le faamasinoga i ana faaiuga e pei ona tuu atu le ono tausaga e nofosala ai lea alii i le falepuipui.
Ua tapu ma faasā mai e le faamasinoga ona faailoa le suafa o le teineititi lea e 15 tausaga o lona matua i le taimi na faia iai le solitulafono.
E oo lava i se faamatalaga e iloagofie ai le teineititi e matuā tapu e lē mafai ona faailoaina.
O le tasi lea o solitulafono tau faigaaiga faamalosi ua tele tausaga ua faasalaina ai se tasi ma o le faailoga lea o le mamafa i le faamasinoga o le faatupulaia o moliaga tau feusuaiga e aafia ai fanau teine laiti.
