Tulai mai Perofeta pepelo, o se fafagu mo Kerisiano

E faaatata lafoga le valoaga ma le lapataiga sa soo ai le kelope, o le aso 21 o Me e toe afio mai ai Iesu e amata le faamasinoga ma faasolosolo ona siitia le au Kerisiano, a o le aso 21 o Oketopa o le a uma ai loa ma faaumatia atoatoa le lalolagi, ae o le mea moni o se fafagu ma se faamantu tāua tele mo soo se tagata lava e faatuatua ma talitonu ma le faamaoni i le Atua.

O nisi sa lē talitonu, ma sa lē taofimaumaututu foi i lea valoaga. A o nisi lava foi sa leai ma se manino ma se malamalama e iai aso faapea, ae toatele foi i latou sa faataetaealuga lava finagalo ma lē manatu mamafa i ai.

Peitai o le osofai mai o lea foi tala, e lē gata ina sa faateia ai, ae na amata toe manatunatu loloto ai, atoa ai ma le toe fia manino atili i folafolaga a le Afioga a le Atua. E tele foi finagalo ma manatu faaalia o nisi, e lē gata i leitio faasalalau, televise, nusipepa ma luga o upega o fesootaiga a Samoa ma le Pasefika, ae faapea ai ma le lalolagi atoa.

O nisi lava sa faaalia finagalo i le ita ma le loto tiga, o nisi sa faaalia finagalo ma le lē manino, a o nisi foi sa faailoa i le fia malamalama ma le fia silafia atili. Ae o le toatele foi, sa faaleo finagalo lē talitonu, ma le lē fia faalogo i ai. Ua mavae atu le aso na ta‘ua ma vavalo i ai le Perofeta Amerika o le a tupu ai le Siitiaga (Rapture), atoa ai ma se mafuie tele o le a luluina ai.

A o loo tulimataia pea le aso 21 o Oketopa o le isi vaega o le valoaga lava lea, e faapea o le a uma ai le lalolagi. Peitai o le toatele, ua matuā soli lava i vae lea talitonuga, ma ua lē toe fia faafofoga foi i ai i le agai mai o le aso 21 o Oketopa.

Ae ui i lea, o le manatu o nisi, o le oo mai o nei valoaga, o se mea ua leva lava ona molimauina ma ta‘u mai e le Tusi Paia i le 2000 ma ona tupu o tausaga talu ai. O le a tulai mai Perofeta pepelo, ma faaaogāina le suafa o le Alii ia latou valoaga, ma taumafai ai ina ia tatai i ai tagata e toatele ma talitonu i ai.

E lē tatau la ona faateia tagata talitonu ma faatuatua i le Atua. E lē tatau foi ona gaoia ma avaga gofie i ai finagalo o i latou o loo mautu, ma mausali le mafutaga vavalalata ma le Alii i aso uma.

Na pau le tulaga sili ona tāua i le oo mai o valoaga faapea, o se avanoa e toe siaki ai ma toe silasila toto‘a ane le tagata ia te ia lava, po ua sauni ma lava tapena mo lea itu aso pe a oo mai.

E lē o le mulimulitai i a‘oa‘oga ma valoaga sese faapei ona tulai mai, ae o le saga faamautu ai ma tepa a‘e mata faaleagaga, ma faaeaea i luga ulu i le Alii Faaola o Iesu Keriso, ma le agaga faafetai ona o le faataunuuina ma le faamaonia o ana fetalaiga sa saunoa i ai i le faitau afe o tausaga ua mavae.

O le oo mai o mafuie, lologa, sii taua le isi malo i le isi malo, misa ma fevaevaeaiga i totonu o aiga ma nuu, tupu tele le amioleaga, fetaufetuliai solo tagata, televave le faitauina o aso o le olaga, tulai mai Perofeta pepelo, o mea uma ia sa fetalai i ai Iesu ma faailoa e oo mai ona aso ma ituaso faapea.

A o le aso ma le ituaso o le Atalii o le Tagata, e lē iloa e se tasi e oo lava i Agelu o le Lagi, ua na o le pule faitalia lava a le Tamā o i le Lagi. O lea aso foi pe a oo mai, e sau faapei o le gaoi i le po e leiloa lava e se tasi. Atonu ua tatou iai i le taimi e tapenapena ai, ma sauniuni faaleagaga, ma vaavaai pea i le Atua. O loo galue malosi foi le alii o le lalolagi, poo le tiapolo auā ua ia iloaina ua puupuu ma saasaa ona aso.

Ua lē toe tamoe foi Satani, a ua lele ina ua ia iloa ua lē o toe mamao ona faataunuuina loa lea o le polokalame a le Atua. O le tele o falesa, ma malumalu o le Atua sa tapuai ai le au Kerisiano i le Aso Sa ananafi i le mavae ai o le aso 21 o valoaga pepelo, sa matuā toe lapatai ai, ma faamalosia e le aufaigaluega a le Atua e ala i le folafolaina o le mea moni, ma toe faamausali ai le finagalo moni o le Atua i loto ma finagalo o lana fanau, ma le lafu mamoe.

O nisi o faamatalaga o loo atagia ai osofaiga a le tiapolo e ala ia i latou e lē talitonu i le Atua, ma ua taumamaina ai, ma foliga o le a ulagia le au Kerisiano ona o le sese ma le lē sa‘o o folafolaga ma valoaga a le Perofeta pepelo a Amerika.

Ua amata ona tusitusilima ma fuatia le agai i tapuaiga ma lotu o tagata Kerisiano, ma ua taumafai foi ina ia faaleaogāina talitonuga o lotu ma Ekalesia Kersiano.