Tulai i le moliaga o le lē avea o le fanau i le aoga

“Telē le faamāmā avega a le Matagaluega o Aoga i le faaaooga fua o le fanau ae matau atu e lē o tu malosi ai lava mātua e ave fanau i le aoga,” saunoaga a le Afioga i le Faamasino

O le faafaigaluega o le fanau ae lē ave i le aoga ua amata nei ona molia ai nisi mātua i luma o le Faamasinoga. Na molia se tina e suafa ia Tusipasi Patolo o Levi Saleimoa ma Safotu i Savaii ina ua maua i suesuega e toafā lana fanau e lē o aooga.

Na faailoa e leoleo i luma o le Faamasinoga Faaitumalo e faapea, o loo galulue faatasi nei le ofisa o leoleo ma le Matagaluega o Aoga i le faatautaia lea o se asiasiga i le taulaga, ina ia faamalosia le tuuina atu o fanau i le aoga i lo le ave e faafaigaluega ina ia maua ai tupe.

Na ta‘ua ai foi i le ripoti a leoleo, o lē ua molia na agai ane i le maketi i Fugalei ma lana pepe e fitu masina faatasi ma lana tama teine 9 tausaga le matua e aoga i le aoga tulagalua o le Manumalo Baptist School i Leone.

O le tama teine e 9 tausaga na avatu e vaai si ona tei laitiiti ae alu lona tina poo lē ua molia e faatau oloa auā se seleni i le tausiga o lana fanau.

Na faia le gaioiga a leoleo ma ave loa lē ua molia i le ofisa o leoleo i le aso 19 o Fepuari 2015 ma faia ai suesuega o le vaega o le Community Service Unit ma maua ai e lē o faaaoogaina le fanau e toafā a le tina o Tusipasi.

Faaalia i le saunoaga a lana Afioga  i le tamaitai faamasino o Mata Tuatagaloa, e tatau ona malamalama lelei o lea ua amata ona faamalosia le tulafono o le ave o le fanau i le aoga. E molia foi mātua pe a maua atu o latou alo ma fanau e lē o toe aooga.

Ta‘ua i le saunoaga a le tina ua molia i luma o le faamasinoga, ua lē mafai ona ave lana fanau i le aoga ona e lei totogiina le lesitala. O lea na faanonofo ai e vaai lana pepe ae agai ia e faatau oloa auā le sueina o se seleni e totogi ai latou lesitala e $10.00 i le tamaititi e toatasi.

Peitai na toe saunoa le Afioga i le Faamasino, sa tatau ona leva ona sauni le tina poo lē ua tulai, e totogi le lesitala auā na o le $10.00 i le tamaitiiti e toatasi. O lea ua faamāmā avega ai le Matagaluega o Aoga i le Faaaooga fua o fanau a o lea e matau atu e lē o tu malosi lava matua e ave a latou fanau i le aoga.

O lea ua tuu avanoa ai le Faamasinoga i le faapafala o se faasalaga faasaga i lē ua molia ma le lē faamauina o lona moliaga. Ua ta‘ua lea faasalaga i le gagana peretania o le discharge without a conviction.

Ua fautuaina foi le tina ia Tusipasi ina ia ave lana fanau i le aoga ma ia aua ne‘i toe tulai i le Faamasinoga. “E feololo le lē totogiina o le lesitala o le fanau i le sala tupe e ono tuuina atu pe a toe molia mai oe i le mataupu lenei”, o le saunoaga lea a le tamaitai faamasino.

Le tina o Tusipasi ina ua ia tuua le faamasinoga faaitumalo i Mulinuu