Tulaga o Mafaufauga – Koneseti Faamusika tuufaatasia e Opeloge Ah Sam

O tulaga o mafaufauga poo le ‘State of Mind’, o se polokalame faamusika na tuufaatasia e se tasi o alo o le atunuu ua lauiloa i lenei taleni, le susuga Opeloge Ah Sam, lea sa faatinoina a latou tapenaga i le po o le Aso Gafua ua tea nei i le Aotea Center i Aukilani, e pei ona faatumulia ai le toatele o le atunuu aemaise i tama ma tina matutua.
O se polokalame faamusika mataina tele, tuufaatasia ai mea faifaili eseese e pei o failipu, vaiolini, selo, tigipalau, kitara, piano, ma isi mau mea faili. Sa auai faapitoa ma pepese ai nisi o alo o Samoa ua agavaa i le taleni pese faapolofesa e le gata i totonu o Niu Sila nei, ae o atunuu i fafo, e pei o Ben Makisi, Daphne Collins, aemaise le alii pese lauiloa, le Afioga Faanana Jerome Grey.
Na tatala le afa lona lua o le polokalame, i le pese amata, “We are Samoa” lea na pepese faatasi ai le aufaipese mai PIC Newton, ma le au pepese faapitoa aemaise ai na faateia le toatele, ina ua savali ane le susuga Faanana Jerome ma latou pepese faatasi ai.
O musika uma ma pesega o le polokalame, na tusia uma ma fatuina e le Susuga Opeloge, o se alo ua faamanuiaina i aoaoga maualuga o Iunivesite, i le taleni o le tusi pese a‘opese, ma le faatonu o pese ma musika.
Na faailoa mai e le susuga Opeloge, o le Aso Lua nei, aso 8 o Tesema, o le a tatalaina aloaia ai le latou CD fou o le Opera Nation’s Samoa, ‘We are Samoa’, i le fale o le Oceanikart Gallery i Aukilani, i le 6 i le afiafi. O lenei pese o loo pepese faatasi ai le Afioga Faanana ma le tamaitai o Daphne Collins.