E leai se tausaga e le oo ai ile malae o Samoa ise tulaga maualuga o mea tau faafiafiaga i totonu i lona lotoā pe a oo ile taimi o polokalame ole Pasifika Festival i tausaga taitasi. E le gata ile matagofie ma le fesuisuiai o ana faafiafiaga i tausaga uma ae o vaaiga eseese foi e ala i ana oloa oloo faatauina ai oloo auina sa‘o mai Samoa ae faapea foi i faleaiga ma kuka eseese mai ekaleisa ma faalapotopotoga.
Ole measina a Samoa lea ole pe‘a poo le malu a tamaitai ose tasi lea vaaiga sili ona maofa ai le toatele o tagata maimoa i totonu ole malae o Samoa ile Pasifika Festival ile tausaga ua tuanai ma le tausaga nei.
Ole matamata tuusa‘o lea o tagata palalagi ma isi tagata ole Pasifika a‘o momo‘e le au ale tufuga ta pe‘a ile faatinoina o lana galuega ile taina ole sogaimiti ale alii ma le malu ale tamaitai. Ma ose galuega ua siitia maualuga ai pea le tele o tagata ua mafai ona maimoaina le malae o Samoa e pei ona iai tausaga taitasi, ae le gata i lea ole tele o faafiafiaga i tausaga uma e fesuisuiai pea ausiva ma nisi o aufaafiafia.
I polokalame ile tausaga nei o lea sa mafai ona maimoa tuusa‘o ai foi le toatele ole atunuu ile taina o malu a tamaitai faapea pe‘a a alii ele agaitoupu ia Su‘a ma le falelua ole aiga ile taeao ole Aso Toonai faatasi ai ma le ausiva malaga mai Ausetalia le Nesian Pearl Dance Group lea sa faafiafia ai i lona taimi muamua.
Na tatala aloaia polokalame ile Aso Toonai ile sauniga lotu na taitaia ele susuga ile faafegaiga ia Faamanu Alalatoa mai le ekalesia AOG i Glen Eden, aemaise ai o lana faamalosi i lea taeao e faapea, A lē atinaeina e Ieova le Fale e galulue fua i latou o ē atinae, a lē leoleoina e Ieova le aai e mataala fua o ē leoleoina.
Na sosoo ma le saunoaga ale fofoga ole aso le tofa ia Lemoa e faatulima ma faafeiloai le mamalu ole auvalaaulia, ona saunoa lea ole Miss Samoa Niu Sila ia Naomi Fruean ile saunoaga faapitoa ma tatala aloaia ai loa faafiafiaga i lana sausaunoaga.
Sa asia foi e nisi o sui ole malo le vaega faaupufai ale National lea aso ma saunoa ai le afioga ile Palemia ia Bill English faapea nisi o sui faipule o lea pati, sa mafai ona asiasi atu iai le pati ale Labour le latou taitai ia Andrew Little faapea nisi o sui faipule faatasi ai ma sui o Local Boards a lea foi pati.
E pei ona faailoa ma faamanino ele afioga ia Ulalemamae Teeva Matafai ose suiga fou lea ua iai le malae o Samoa talu ona faavae mai, ile tele o faafiafiaga eseese ua iai ae ua lē lava le taimi e faatino ai, ona ole toatele o aufaafiafia oloo iai lo latou naunautaiga ile fia fai o so latou sao i polokalame ole Pasifika Festival i lea tausaga ma lea tausaga.
Ole tele foi o malae a isi atunuu o lea ua mananao e faaaogaina nisi o aufaafiafia a Samoa i luga o a latou stage ona ole lelei ma le matagofie o a latou sauniuniga ma tapenaga.
E lua aso sa faatinoina ai lea faamoemoe ile faaiuga ole vaiaso ma sa matauina ai le toatele ole mamalu ole atunuu sa maimoaina ia polokalame eseese faatasi ai ma tagata mai isi atunuu.
Ua le gata ile faaauauina o polokalame ole Pasifika Festival e pei ona masani ai tausaga taitasi ae ua faamanatuina ai foi le 25 tausaga talu ona faatuina mai lenei polokalame.
Manatu o Tagata Faatauoloa
E faageetia lagona o tagata faatauoloa mai Samoa sa mafai ona faatauina a latou oloa i ia aso e lua, (1) ua mafai ona faatauina ai le tele o oloa oloo mafai ona gaosia ma mamanuina lava i totonu ole atunuu, (2) ua faalauiloa ai le tele o measina ale atunuu ma taleni ma meaalofa oloo nonofo ma o tatou tagata i Samoa, auā ole tele o nei oloa oloo mafai ona maua ai tupe e tausi ai aiga ma faatino ai mea e fai i totonu ole atunuu.
E ui e iai nisi o tagata faipisinisi oloo totogi lava e latou tupe e malaga mai ai ma faapasese mai ai oloa ae ole fiafiaga tele o lea ua mafai ona maua le avanoa e faatau ai a latou oloa i Niu Sila nei.
E eseese lava oloa sa fai agai iai filifiliga ale mamalu ole atunuu, o lavalava, o mea taulima e aofia ai sei, tautaliga, o ula fala, faapea ma nisi o oloa e iai siamupopo, fagu vai juice ma ato.
E talitonu nisi o faatauoloa ile lelei ole tupe maua i ia aso auā sa lelei lava le faatau a tagata ile matagofie o oloa sa auina mai. Ma e momoli ai lo latou agaga faafetai ile Pasifika Festival ile itu Samoa ona ole avanoa oloo auina mai ai le tele o oloa.
Finagalo ole au fai faleaiga
E ui ile fai ma toulu timuga ae leai se faavaivai ole au fai faleaiga i nei aso e lua, e pei ona latou ta‘ua le tele ole tupe maua i meaai sa faatauina. Ole tasi o ekalesia ole AOG i Glen Eden e le misi le latou faleaiga i totonu o lea faamoemoe, ae tupe lelei tele e maua mo le ekalesia, e fai saosaoga ale aulotu ona tuufaatasi lea ona fai lea o nei gasesega auā taumafataga faatau, ma e mae‘a ane le polokalame ua silia foi ile $10,000.00 le tupe maua.
O nisi e faatau asikulimi, o niu, o faguvai ma e vaaia lava le faatau o tagata. Ose faafetai foi a tagata fai faleaiga i lenei faamoemoe i tausaga uma ona oloo mafai ona faatau ai a latou ‘aiga e maua ai tupe mo aiga aemaise ole galuega ale Atua.
Ole tausaga fou lea ua olioli mai ai le ausiva a Le Taupou-Manaia e faafiafia ai ile malae o Samoa pe a aulia ile alofa ma le agalelei ole Atua.
