Tulaga lua Nyssa Collins i le X-Factor NZ ae Manumalo i loto o lana autapuai

E lei faigofie ona talia e le au tapuai a le tamaitai o Nyssa Collins le iuga o le tauvaga ua tuuina mai, e ui lava sa vaaia pea le fiafia ma le toamālie o Nyssa ina ua lau mai ua ia lē ausia le tulaga muamua sa faatini i ai ana taumafaiga mo le 10 vaiaso ua tuanai.

I luga o fesootaiga a le social media aemaise lava le facebook, ua amata foi ona tau felavasa‘i ai lagona faaalia o le autapuai a suitauva e toalua, le tamaitai Samoa ia Nyssa ma le alii Cook Island o Beau Monga. Ua tuua‘ia le toaitiiti o le faitau aofai o tagata Samoa i Niu Sila sa mafai ona palota, pe a faatusa i le aofaiga toatele o tagata Cook Island lea ua tele ina nonofo i Niu Sila.

Sa faasinosinolima nisi i le taugata tele o le tau o le text message lea e momoli ai le palota, fai mai ua atoa lava le $1 i le text message e tasi. Lona uiga o le toatele o nai au palota Samoa e oki ai i le va lea, e lē lava ni credit e text ai. O lagona faapea e masani lava ona aliali e pei o se mea e tau ina tua i ai le lē fiafia.

Peitai mo Nyssa lava ia, i le silasila a le lautele o le atunuu e aofia ai ma faamasino, poo ai lava o laua ma le alii Cook Island o Beau e manumalo, sa matuā taufai malilie lava i ai auā na taufai tutusa foi le maoae o taleni pese ua iai i nei talavou e toalua o le Pasefika, tainane o tamaiti uma o Aukilani i Saute….e faimea mafai tele Saute.

O Nyssa Malo Collins, ua 23 tausaga o lona soifua, e mai le pitonuu o Magele i Aukilani i Sisifo. O ona mātua o loo galulue faafaifeau i se ekalesia i Samoa ma faanofonuu ai. A o lei tauva Nyssa mo le X-Factor NZ, sa amata lava ona maimoa ma fiafia tagata i nisi o ana pesepesega sa pue lava e ia ma tuu i luga o lana itulau i le Facebook, ma o ina na amata talitonu ai le toatele, o se siufofoga ua matuā talafeagai ona tausinio i tauvaga tetele faapenei.

Mo le alii talavou o Beau Monga, o se alii mai tupuaga o le Atu Kuki lea ua sola ma le manumalo o le X-Factor New Zealand o lenei tausaga 2015. Na iloga foi le tulai mai o lenei alii talavou i le faatinoga o lana ia foi taleni pese lea e tutasi (unique) e pei ona ta‘ua soo e faamasino, ona e lē o se ituaiga faiga e faigofie, ae na matuā siamu ai le alii mai Manurewa o Beau Monga.

O nisi o mea e patino i ai le tamaitai o Nyssa e pei ona ia faamaumauina i sona tamai talaaga na ia tusia, e fiafia tele e pese. Fai mai Nyssa, ana faapea e lē pese, semanu e na te tuliloaina le isi taleni e fia lelei ai foi, o le avea ma se tamaitai e agavaa i le kuka (chef).

I se tasi o fesili sa iai i le pepa na tusitusia ai lagona o Nyssa, o loo fesiligia ai poo le ā se mea e muamua lava ona faia pe afai e na te maua se aofaiga o se tupe e tasi le miliona tala? Na tali Nyssa, e muamua lava ona faaaogā lena tupe, e faatau ai se fale mo ona mātua. O lagona o se talavou e na te faatāua lona aiga ma ona mātua, e tāua ia te ia lona faasinomaga.

O le alii faamasino o Stan Walker sa avea ma faufautua poo se faiaoga mo le faagasologa o pese a Nyssa i le tauvaga; peitai o le tele o vaiaso e pese ai Nyssa, e vaaia ai lava ma lagonaina le taufai viiviia o ia e faamasino uma e toafā e ui sa iai foi isi sa galulue patino i ai nei faamasino taitoatasi mo le faaleleia o a latou pese.

O se tamaitai sa viiviia i ona uiga tauagafau a o faagasolo le tauvaga; o se tamaitai e fiafia lava ia i taimi uma, e lē o se sui tauva e iai ni uiga faigata pe ma‘ale‘ale e pei ona vaaia i nisi taimi i isi sui tauva, aemaise lava pe afai ua tau mafamafa atu i ai ni faitioga a nisi o faamasino.

Peitai mo Nyssa lava ia, sa iai foi nisi o faatinoga o ana pese, sa iai ni nai faaletonu na faailoa atu i ai e nisi o faamasino, ae sa vaaia lava foliga fiafia ma le agamalu o lenei tamaitai e talia na faitioaga faafautuaga, ma o ina na vaaia ai le toe fotuai mai o Nyssa i le isi vaiaso e sosoo ai, ua matuā malosi ma atili siisii pea i luga le lelei o ana taumafaiga, lona uiga sa ia faaaogā le faitioga e toe faaleleia atili ai ana tapenapenaga; o se uiga lelei na matauina uma e faamasino e toafā ma latou alofagia ai lenei tamaitai talavou.

E ui lava la ua lē manumalo Nyssa i le tauvaga aoao, ae o lona tulai mai i le tulaga lua, ua peiseai ai lava o loo manumalo Nyssa i lagona ma mafaufau o i latou uma sa lagolagoina o ia ma ana pesepesega poo ana fans. Ma e mautinoa o se faitotoa lautele foi lea ua tatala mai mo lenei alo o Samoa, e agai atu ai mo nisi mea tetele auā le faalauteleina o lana taleni pese.
Photo Credit: www.tv3.co.nz

Photo Credit: www.tv3.co.nz

Photo Credit: www.tv3.co.nz

Photo Credit: www.tv3.co.nz