O le tatou mataupu i lenei vaiaso e pei ona ta‘ua i luga o se mataupu o loo afaina ai le tele o tatou tagata, aemaise lava i latou o loo fai a latou pisinisi, faapea ma nisi sa faigaluega i lalo o ni konekarate (contracts) ae lei totogiina lafoga, pe lei lava foi lafoga na totogi i le ofisa o lafoga (Inland Revenue) e talafeagai ma le tulafono. O le tulafono e faaaogā, ma mafai ona maua atu ai se fautuaga, o le “Tax Act”.

Tax Act:

O le tulafono lea e ta‘ua i luga o le tulafono lea e faaaogā i mataupu tau lafoga ia e tatau ona totogi i le malo tupe e maua mai i lau pisinisi poo tupe e maua mai i lau galuega. Afai o e faigaluega mo se kamupani (employee) o le tiute o le kamupani lea e te faigaluega ai, e tipi ese e latou lau tupe o lau Tax ona totogi lea e le kamupani i le malo le Tax e tatau ona e totogiina (Employer).

Afai o oe o e faigluega mo se isi, i luga o se feagaiga osia i luga o le tulafono, lea e ta‘ua o le konekarate (contract), e totogi atu e le tagata lea e te faigaluega ai lou totogi atoa, ae o lou tiute o le totogi lava e oe lau Tax i le malo. Afai o oe o se tagata faipisinisi, e totogi le Tax a lau pisinisi, ma Tax a tagata faigaluega i lau pisinisi, e oe le tagata e ona le  kamupani i le Inland Revenue.

Ina ia manino ma aua le iai ni feseta‘iga i tiute o loia ma tiute o tagata e galulue i vaega o tupe (Accountants), afai e te fia silifia le aofai o le tupe e tatau ona e totogia i le malo, i le faaiuga o le tausaga faaletupe (end of the financial year) o le tagata e maua ai lau fesoasoani, o le Accountant.

Afai e iai se vaega o le tulafono lea e ta‘ua i luga le Tax Act o e fia malamalama ai, o le matafaioi lena a se loia, e iai lona tomai i le tulafono o le Tax Act. E lē o loia uma e malamalama i lea vaega o le tulafono.

Manatua, e eseese vaega o le tulafono e galulue ai loia. Aua le ta‘ua loa le upu “loia”, faapea loa e iloa uma e loia tulafono i vaega eseese e afaina ai tagata. E eseese matafaioi a loia, fesili muamua i le loia e te faafesootaia, pe na te faia galuega tau Tax Law.

O faataitaiga nei o vaega o le TAX ACT e mafai ona faaaogā:

1. I lalo o le Tulafono o Lafoga (Tax Act) o loo iai se vaega e mafai ai ona talosaga se tagata i se fesoasoani a le Ofisa o Lafoga, Inland Revenue, e faamagalo uma se aitalafu e lei totogiina, pea afai ua matuā lē mafaia lava ona totogi e oe le aitalafu i le ofisa o lafoga, ona ua matuā leai lava se auala, e te maua ai se tupe e totogi ai lea aitalafu (serious hardship). Ae o se talsoaga fai faapea, e manaomia ni tusitusiga e faamaonia ma lagolago ai lau talosaga, ma faamaonia ai le ala tonu, ua matuai e lē mafaia ai lava ona totogi le tupe lea e te nofo aitalafu ai i le Inland Revenue. O le faataitaiga, afai ua leai sau galuega, ae na o se tupe mai i le malo (benefit) o oe ola ai, totogi ai se fale totogi o tou nonofo ai ma sau fanau laiti ae na o oe sa faigaluega, ae ua leai la se isi o le tou aiga atoa o fagaluega, o ituaiga faafitauli faapea e tatau ona aumai i le loia ni faamaoniga, e taumafai ai ona talosaga i le malo e faamagalo (write off) le aitalafu.

2. E lē gata foi i lea, i lalo o le Tax Act e mafai ona fai sau aioiga i le ofisa o lafoga, pe mafai ona tuu mai ia te oe se avanoa e togi togi atu ai i vaiaso taitasi se vaega tupe, e gafatia e oe, e tuu i le aitalafu a oe i le ofisa o lafoga. E pei lava ona ta‘ua i luga i le numera (1), e tatau foi ona iai ni faamaoniga tusitusia e ave e oe poo sau loia, pe afai o le loia lea e fesoasoani ia te oe, e ave i le ofisa o lafoga e faamaonia ai, e te gafatia le tino i tupe lea ua e ioe, e totogi i vaiaso taitasi i le ofisa o lafoga mo lau aitalafu.

3. O le isi ituaiga fesoasoani i lalo o le Tax Act, o le faatalanoaina lea e sau loia (negotiate) ma se isi o le ofisa o lafoga, Inland Revenue, se vaega tupe atoa (lump-sum payment) e mafai ona e totogi ina i le taimi e tasi, e faamamā atoa ai lau aitalafu. I le negotiation, e mafai ona talosaga le tagata lea e fesoasoni ia te oe, i le ofisa o lafoga, Inland Revenue, e faapa‘ū pe faamagalo mai se vaega o le aitalafu, ia mamā atoa le aitalafu i le tupe lea o le a e totogi ina i totonu.

Afai ua e oo i se faafitauli ona o sau aitalafu o lau pisinisi i le ofisa o Lafoga, fai se laasaga e fofo ai le faafitauli. E pei ona ta‘ua i luga, o loo iai auala o le Tulafono e mafai ona talosagaina ai se fesoasoani – ae lē mafai ona na ona fai ni talosaga ae leai ni faamoniga.

O Vaega Tāua nei e Tatau ona Faia:

  • Ia faamaopoopo faamaumauga o tupe maua (income) ma tupe faaaogā (expenses) o lau pisinisi, poo lou totogi foi ma au mea totogi (pe afai o oe lea e iai le aitalafu, ae lē o se pisinisi). I tulaga tau tupe, e tatau ona e saili se fesoasoani a se (Accountant) e na te faamaopoopoina mea tau tupe, ma aumai se faamaoniga e talafeagai ma le tulafono, e ave i totonu ma sau talosaga, lea e fia fai. E aogā lou alu i se Accountant ona e saini e ia, ia pepa ua uma ona ai auiliili, suesue, faaopoopo ma toese, ona o ia o se professional (o se tagata ua maua faailoga i lea matafaioi), ma e taliaina e le ofisa o lafoga ni faamaoniga e saini ai Accountants.
  • A uma loa galuega fai e le Accountant, ona e saili lea o se loia  (Tax Lawyer) e talanoa atu ia te oe i le auala i luga o le tulafono, o loo avanoa e te faia, e totogi ai lau aitalafu. O le tiute o le loia, o le ta‘u atu ia te oe vaega o le tulafono e mafai ona e uia (options). E lē gata i le talanoaina o options poo auala, ae fautua oe i vaega o le faaaogāina o le tulafono (procedures). O le taimi foi lena e talanoaina ai ma le loia nisi faamaoniga e manaomia mai ia te oe e lagolago i lau talosaga i le Inland Revenue. Afai sa e ma‘i, e manaomia ni faamaoniga mai i le fomai. Afai sa e faigaluega ae ua tapuni le fale faigaluega na e faigaluega ai, ae ua e fiu e apalai i nisi galuega, e lē o maua lava sau galuega, e manaomia ni faamaoniga o ni mataupu faapea. E lē lava le tatou column e talanoa auiliili atu i vaega lautele e manaomia e le loia e fesoasoani ai mo oe.
  • O loo ia te oe lau aiātatau e te sailia ai se isi fesoasoani agai i le faalapotopotoga ua ta‘ua o le Taxation Review Authority. O le matafaioi a lenei pulega latou te toe iloiloina lau mataupu pe na lelei ma sa‘o le faafoeina o lau mataupu e le Ofisa o Lafoga e tusa ma le tulafono (Tax Laws).
  • Ae afai foi e aumai le faaiuga a le Taxation Review Authority, ae lē talafeagai ma se tulaga ma lou talitonuga, ma le fautuaga na ave atu ia te oe e lau loia i luga o le tulafono, e mafai ona e apiliina le mataupu i le High Court, Court of Appeal, poo le Supreme Court e iloilo ai se faaiuga a le ofisa o lafoga, Inland Revenue, e lē talafeagai ma le tulafono, o le  (Tax Laws) i totonu o Niu Sila.

E sili lava le puipuia i lo le togafitia. Aua le faatamala i mataupu faapenei ona ua tele o tatou tagata ua aveesea faamalosi o latou fale ma meatotino, ma ua iai foi tagata ua falepuipui ona ua lē osi feagaiga e totogi aitalafu i le ofisa o Lafoga.