“E momoli atu le agaga faafetai ile tatou Aukirikiti ole Malaka ona ua mafai ona ausia le tulaga muamua e pei ona manumalo ai ile taamilosaga ole Teuila ile talita faatasi ai ma le taamilosaga ale afioga ia Leilua sa manumalo ai ile ipu. Ma ose fiafiaga tele ia te au ua manumalo se aukirikiti oloo lagolagoina ele faletaavale ole Henderson Cars, ma ua iai foi le faamoemoe e toe lagolago malosi ele Henderson Cars le aukirikiti ale Malaka ile tausaga fou.”
Ole saunoaga lea ale alii pule ia Muliagatele Shiu Singh na ia saunoa ai i lona loto faafetai ma le faagaeetia ina ua suipi le Malaka i taamilosaga e lua e pei ona faia ile amataga o lenei tausaga i Otara.
Ole fiafia tele o Muliagatele Shiu i nei taumafaiga na ia toe ofoina ai ma ni faailoga tupe mo nisi ole ‘au sa maua le ‘ai silia ma le ‘olo silia faapea le tama taalo ole taamilosaga.
O nei faamanuiaga sa mafai lea ona tauaaoina ile aoauli ole Aso Toonai ile falefaafiafia ole Parataiso a‘o tauaofia ai le ‘au ale Malaka i lana tufatufaga faailoga.
Na amata le polokalame ile sauniga lotu lea sa taitaia ele susuga ile faafeagaiga ia Mapusaga Paila ona saunoa lea ole fofoga ole aso ia Safeau e faafeiloai le mamalu ole auvalaaulia, ma tauaao ai loa faailoga nei mo i latou ua lautogia i lea aso.
Ole susuga ia Etuale na ia mauaina le ‘olo silia ile taamilosaga, ae ole susuga ia Poni na ia mauaina le faailoga ole tama taalo ‘ai silia, ma le faailoga ole tama taalo sa maua lea ele alii o Tasi ma Iusi.
Sa faapea foi ona tauaaoina ai ma seleni mo tama taalao taitoatasi i faailoga tupe ale ‘au lea sa faamanuiaina ai i ana manumalo ile taamilosaga ale Teuila ma le taamilosaga ale afioga ia Leilua.
Na maualuga ma matagofie le faamoemoe ina ua mafai ona faatasi atu ai nisi o mātua o tama taaalo faapea le afioga ia Leota sa fai ma sui ole komiti ale PIMKA faapea nisi o valaaulia sa molimauina lea aso fiafia.
Na taualuga polokalame ole aso ile taumafataga na saunia e sui ole komiti ale ‘au, ma saunoa faafetai ai loa le fofoga ole aso ia Safeau e momoli le agaga faafetai ile susuga ia Muliagatele Shiu Singh e tusa ai ma lona lagolagoina ole ‘au i nei tausaga e lua, aemaise ai o lea foi ua toe tuu mai lona tau‘au e lagolagoina ai le ‘au ile tausaga fou, faatasi ai ma le faafetai tele i sui o mātua ma le mamalu ole auvalaaulia sa mafai ona faatasi atu e molimauina le faamoemoe ole ‘au ale Malaka.
Ole susuga ia Muliagatele Shiu Singh na ia ofoina le togiga taalo lea sa faaaogaina ele Aukirikiti ile taimi o taamilosaga, ae faapea foi ile togiga lea sa laeiina ele ‘au ile taimi ole tufatufaga faailoga.
