O Ausia Paloa Ikani Aiafi o se alii inisinia o faasalalauga i pou faasalalau a televise ma leitio i Samoa ua silia i le 20 tausaga o galue i lea tomai aoaoina. Sa muai galue i le Televise Samoa ao pulea e le Malo, sosoo ai ma le galue i le TV3 i Samoa lava. O le taimi nei ua galue mo le leitio faasalalau o le 2AP. O lana molimau o le a’oa’oga muamua lea i Samoa ua auai e faapitoa mo e o loo galulue o inisinia o auala o faasalalauga ma fesootaiga. “Oute faafetai lava i le fesoasoani a Ausetalia ua maua ai lenei avanoa ua toe fafagu atoa ai le mafaufau i le faatinoga o le galuega, na saunoa ai Ausia.
O le vaiaso nei e maea ai lea a’oa’oga na amata i le vaiaso ua mavae o loo faatupe e le faalapotopotoga o fesoasoani a Ausetalia i auaunaga tau faasalalauga ma fesootaiga e ta’ua o le PACMAS.
O le alii inisinia mai le vaega o faasalalauga a le Malo o Ausetalia le susuga Alan Hubbard ma le susuga Greg Britton mai le televise ma le leitio a le Malo o Ausetalia o le ABC sa feagai ma le a’oa’oga ile vaiaso ua mavae. O le vaiaso nei ua toe foi le alii o Greg ae ua faaauau e Alan le a’oa’oga.
O le nofoaga o pou faasalalau mo televise ma leitio o loo i le mauga o Fiamoe ile alu i Afiamalu na oo iai le a’oa’oga lea sa silasila ai i masini ma pou faasalalau o loo iai.
“ E le faigofie le matou galuega, e faapea lava le atunuu faafofoga ma maimoa i leitio ma televise o se tautua faigofie, ae o lena ua silasila iai e fa’i o le faigata o le auala e agai mai ai i luga o pou pe a iai ni faaletonu e tutupu ma aliali mai, ae a oo loa i le taimi e leaga ai le tau e lamatia le saogalemu o matou ola pe a o mai i luga nei ona o le faaeteete gata o auala o feoa’iga.” O le saunoaga lea a Ausia Paloa Ikani Aiafi.
O le isi tulaga sa molimauina e alii inisinia mai Ausetalia o masini o loo faaaoga e Samoa mo faasalalauga oni masini o fausaga tuai. Na faaalia e Alan ua tatau ona silasila le Malo e faaleleia le auala o loo tau atu ile mauga o Fiamoe, o le isi itu ua tatau ona liliu loa faasalalauga i Samoa ile digital ona e le o toe mamao ae le toe gaosia e kamupani totoga faaleoleo mo masini faasalalau o le analogue o loo faaaoga pea i Samoa.
O le taua o le a’oaoina lelei o inisinia mo faasalalauga ona ua agai le lalolagi e faaaoga fesootaiga digital. O le tausaga fou o loo silasila le Malo e suia ai i lea vaega faasalalauga a televise ma leitio i Samoa ma ua talafeagai lelei le a’oa’oga ua ofo mai e le vaega fesoasoani a Ausetalia o le PACMAS ma tapenaga ua agai iai mo le digital.
O le taimi muamua lenei ua faia ai se a’oa’oga mo inisinia o faasalalauga poo transmission technician i Samoa ma ua faaalia e se tasi o sui auai o loo pulea le televise a le Katoliko o le Upu Mana, le tofa Tu’uu Taulima Tofaeono, o se avanoa e le au maua ma ua taua le aoaoga ua maua ai le mafutaga ua fetufa a’i ai tomai ma silafia.
“Ua manatu o le a faatu se matou mafutaga o inisinia o faasalalauga e unaia ai le taua o le faia o mafutaga faapenei e saga maua ai pea le tomai i lenei galuega”.
O le leitio o le 2AP, fale televise o le SBCTV1, Ofisa o le Pule Faatonu, leitio ma le televise katoliko o le Upu Mana, Televise a le ekalesia Worship Center, TV3, Leitio Polenisia, Power FM, ma le EFKSTV, o loo auai o latou inisinia i le a’oa’aoga e lua vaiaso e ma’ea ile aso Faraile o le vaiaso nei.
