Ua liua le faanoanoa o le atunuu i mafatiaga o le sunami o le tausaga ua mavae i le fiafia tele ona ua a‘e manuia taumafaiga a alo ma fanau a le atunuu i lana au lakapi fitu sa tausinio i nisi o vae o le taamilosaga a le pulega o le lakapi iuni a le lalolagi, lea ua tolu ipu o siamupini ua latou umia.
O se fiafiaga tele lea i le tapuaiga a aiga ma le atunuu ona o se taimi muamua ua oo ai le taitoafitu a le atunuu i le tumutumu o le taamilosaga talu ona ulufale Samoa i le lakapi faavaomalo.
E lei talia i ni vai le agaga fiafia ma le mimita o le tapuaiga a le atunuu aua na faatino vaega uma e faatali ai le taunuu o le au mai lava i le malae vaalele i Faleolo seia oo i le solo tele na auai le silia i le 5 afe tagata i le afiafi o le Aso Lulu na tea nei, 31 o Mati 2010.
O le taunuu ai o le solo a le au i luma maota o le Malo i le eleele fou, na saunoa ai le taitai o le Malo le afioga i le Palemia, o ia foi o le taitaifono o le Iuni Lakapi a le atunuu, susuga Tuilaepa Lupesoliai Sailele Malielegaoi.
O lana saunoaga na ia faailoa ai le tuuina atu o le $190,000 mo le au lakapi fitu a le atunuu e tufatufa ma vaevae mo i latou.
O lona uiga e maua le sefulu ma ona tupu afe a le tama e toatasi e aofia ai le pulega o le au ma le faiaoga. Ua faailoa ai foi e le alii Palemia le toe maua o le isi $145,000 e le au taitoafitu pe afai e toe manumalo mai vae e lua o le taamilosaga o loo totoe o le a faia i Egelani ma Sikotilani i le masina fou.
O le molimau i le agaga fiafia ma le mimita o le atunuu i le maualuga o le taumafaiga a le au lakapi fitu a le atunuu, ua le mafai ona faamatalaina ona faatoa vaaia lea o le laufofoga ataata ma le fiafia o tagata uma, mai lava i fanau e oo i le au matutua.
O le po o le Aso Lua poo le vaveao lea o le Aso Lulu na tea nei na taunuu ai le au. Na tuua le malae vaalele i Faleolo ma agai mai i le taulaga, ma sa vaaia i magaala uma o le alatele mai Faleolo e oo mai i Moataa ma Vailele le tumutumu o autafa o le auala i le toatele o tagata sa faatalia le au.
O le afioaga o Leauvaa na tutu faaituala lua i le tuneva o le po ma moli ga‘o ma feei ane ma talotalo faamalo i le au. E faapena le nuu o Moataa sa tofu ma sulu aulama i luma o le faitotoa o le malae taalo o le Apia Park.
O uiga tausaafia o le atunuu na faaali auā e le tupu soo se manumalo faalausoo o le tatou au lakapi fitu lea ua faalima ona ia olopalaina le au malosi a Niu Sila. Talosia le taumafaiga o loo totoe i Egelani ma Sikotilani, ia a‘e manuia faamoemoega o le au a le atunuu.
O le a avea nei le isi ofo latou te toe maua le $145,000 e vaevae foi mo latou pe a foi mai ma Ipu e lua o vae o loo tooe o le taamilosaga. Malo Manu! Go le Manu!
