Ua tofia le Afioga Tuala Matthew Vaea e avea ma CEO ale Asosi Olimipeka a Samoa (SASNOC). Ole faaaliga lea mai le ofisa autu a SASNOC ile vaiaso na tea nei.

Na maua mai lea ile tusi aloaia ale Susuga ile Failautusi Pauga Talalelei Pauga, na ia faafesootaia ai ulu o faalapotopotoga eseese i totonu ole atunuu. Ile tusi a Pauga, na ia ta’ua ai le fiafia tele o SASNOC e faailoa le tofiga fou.  Na ta’ua e Pauga le agavaa o Tuala mo lenei tofiga mai ana galuega na fai i totonu ole SRU, ma le SASNOC ma le tele o isi matagaluega i Niu Sila ma Samoa. O Tuala na galue malosi i totonu ole Iuni Lakapi ale atunuu ile High Performance Unit (HPU). Ile 2010 ile 2012, na avea ai o ia ma taitaimalaga ale Manu Samoa.

O Tuala na taitaimalaga ile ‘au ile Rugby World Cup i Niu Sila ile 2011. A’o lei galue o ia mo le SRU, na avea ai Tuala ma se tasi o tagata taalo malosi ale Manu Samoa. Na amata mai ile 1991 ile 1995. E aofia ai ma Ipu ole Lalolagi e lua, 1991 i Egelani ma le 1995 i Aferika i Saute. O ‘aufili ia a Samoa e lei toe ausia le malosi.

O ia ole tama tuai ale a’oga a Sagato Iosefo i Apia le nuu na fanau ai. Mai Sagato Iosefo na ia agai atu ma aoga ile kolisi maualuga ole Whanganui Collegiate i Niu Sila ile 1984. Ole tofia o Tuala e fai ma CEO ale Matagaluega ose galuega faigata lea na feagai ma le asosi ile sailia ose tasi e sui ia Faamausili Tauva Ah-Young lea na faamavae ile 2017. Ua atoa le tausaga o tau saili se taitai fou a SASNOC lea ua faaeaina ai Tuala.  Ile tusi a Pauga na ia faapea ai, “Ua ou matua fiafia tele e faailoa ma faafeiloai ile CEO fou a SASNOC le Afioga Tuala Matthew Vaea.” “Ua fai lava si umi o tau saili se tasi e tauaveina le tofiga i totonu ole matagaluega. Ae ua tasi ia Tuala le faamoemoe a SASNOC o ia ose tagata e agavaa tele i galuega i totonu o taaloga.”

“O ia ole tagata sa’o mo lenei tofiga, ma ole ala manuia foi lea mo le Asosi ile taimi nei.”

Na ta’ua e Pauga o Tuala ole “Master Educator” poo se faiaoga sili ale Oceania Sports Education Programme (OSEP) ma ose tasi na taitaia Suesuega faapitoa ale Regional Sports Research Program.

E tāua tele lenei tofiga mo Samoa, aemaise ai le nofo tapena ole atunuu mo le Pacific Games ile 2019. Ae le gata i lea ole sauni atu o Samoa ile Commonwealth Games i Ausetalia ile masina o Aperila. E ova ma le 30 le aofai o taaloga oloo i totonu ole li’o a SASNOC ole a i lalo ile vaaiga a Tuala Matthew Vaea.

O tofiga lenei ale Laulau-a-Fono a SASNOC

Peresitene – Fepuleai Patrick Fepuleai (Golf)

Failautusi – Pauga Talalelei Pauga (Basketball)

CEO – Tuala Matthew Vaea (Rugby)

Sui ole Komiti Faafoe (Executive Members): Tuaopepe Jerry Wallwork (Weightlifting), Kerrie Punivalu (Swimming), Sala Stella Siale (Cricket), Vaea Tangitau (Netball).