“Talofa e, ua leai se faamoemoe. Maimau pe ana pupula, savali, pe tautala foi.” E tilofia e ulagia foi nisi. O la‘u galuega o le faamalosiau i o‘u sui auai, ina ia ola finafinau”
O le tausaga e 2001 na muai faatu ai le faalapotopotoga o le Nuanua o le Alofa o se faalapotopotoga na taumafai e saili avanoa tutusa uma mo tagata e iai manaoga faapitoa i Samoa.
O se tasi o a latou galuega o le finauina o le faatāua o aiā tatau o tagata e iai manaoga faapitoa ina ia maua ai lo latou fiafia ma le saolotoga e tutusa ai ma tagata e atoatoa le malosi o le tino ma le mafaufau.
O se miti lea a le Nuanua o le Alofa e pei ona saunoa se tasi o ona sui tamaitai, o Faaolo Utumapu i le aso faailogaina o tagata e iai manaoga faapitoa i le lalolagi. O le finafinau pea o le faalapotopotoga ua a’e manuia ai ile sainia e Samoa o le feagaiga faavaomalo e puipuia ma amanaia ai aiā tatau o tagata e iai manaoga faapitoa.
“Ma o se avanoa faaauro lenei, matou te momoli ai le faamalo i le malo, ona o lenei faaeaea maualuga, ua o outou faatietie ai i latou e iai manaoga faapitoa i luga o le maa Salafa. Faamalo i lau afioga i le minisita, ma le matagaluega o tina ma tamaitai le finafinau i mea lelei, lele ua tafa ata o taulelei, ua sina le galu, ua tatou vaaia se Amataga fou i fua lelei o galuega sa outou fitaituga ai, a o si a matou foi finau ma le tuualalo, ina ia ausia aia tatau ma avanoa tutusa mo tagata uma”.
“O le upu moni, O le feagaiga lenei o se tulaga ua leva ona moemiti i ai le faalapotopotoga a le nuanua o le alofa. Ma o se tasi lea o fu’a taualuga o ana galuega finau talu ona faavae mai i le 2001 e ni tagata e i ai manaoga faapitoa ua maua’a lo latou talitonuga, e tatau lava ona i ai se faalapotopotoga a tagata e i ai manaoga faapitoa e faaleoina o latou lagona o soo se atinae e aafia ai o latou soifuaga”, o se vaega o le saunoaga aa Faaolo Utumapu.
O le tasi o vaega o nei fuafuaga na faaalia e Faaolo sa taumafai ai e saili se ofisa mo ana galuega ona sa le faigofie, peitai ina ua mautu le ofisa sa mafai loa ona tapuvae tasi uma iai tapenaga mo le finauina o vaega uma sa latou manao e faatino ina ia maua e tagata e iai manaoga faapitoa i Samoa ni avanoa tutusa.
“O le talitonuga i lea taimi, e oo mai lava i lenei aso, e sili atu le malamalama o tagata o loo iai manaoga faapitoa, i o latou lava manaoga ma luuitau, ma o ni fuafuaga foi mo le faafaigofieina o ia luitau, e tatau lava ona taulamua ai tagata e iai manaoga faapitoa, i lona talanoaina, fuafuaina, ma mataitu.”
“E ui ina sa leai se ofisa mautu, sa leai foi se alagatupe e faamoemoe i ai nei galuega uma, ae sa talitonu le to‘a 12 o tagata e iai manaoga faapitoa, ma ē sa lagolagosua i lea taimi, e lē faatali le faavaeina o se leo o tagata e iai manaoga faapitoa, i ni tupe poo se ofisa mautu.”
“E mafai e le loto gatasi ma le finau, ona faatino mea uma.
E lē iloa lava e pule a o matou falefaigaluega, o le tele o taimi, o loo topetope ai lima i le taina o tusi aisi i le minisita poo kamupani, mo seleni e faatino ai polokalame faalauiloa, i afioaga ma nuu i tua, poo ni meaalofa foi e mafai ona faia ai se vaimalu a le mafutaga”.
“E lei faigofie i nisi o matou uso e iai manaoga faapitoa, ona o ese mai le siomaga o o latou lava aiga, ona o le mā ma le maasiasi i manatu faaletagata, o le tusitusilima ma le tusiesea, Talofa e, ua leai se faamoemoe. Maimau pe ana pupula, Savali, pe tautala foi.”
“E tilofia e ulagia foi nisi. O la‘u galuega o le faamalosiau i o‘u sui auai, ina ia ola finafinau, ma ia lē avea le manaoga faapitoa ma papupuni, ae ia avea ma luitau ina ia ola finafinau ai i faamanuiaga, ma avanoa tutusa, e pei o isi tagata.”
“Ou te tuualalo foi i le atunuu lautele, le malo ma soo se atinae e faaaogā ai o matou sui auai e iai manaoga faapitoa, ina ia aua ne‘i galo afi‘a i si ona vao, i soo se atinae ma soo se taumafaiga, ia faaaofia tagata e iai manaoga faapitoa ma ia amanaia lo latou leo nothing about us without us.”
“O lenei ua sainia e Samoa le feagaiga, ua tatou sauni foi e faatino polokalame mo le faalauiloaina o le feagaiga, a o lei taliaina faaletulafono e Samoa.
Afai e iai lava se mea aogā na ou maua mai le Malaga umi a le Nuanua o le Alofa ma ana paaga seia oo mai i le feagaiga, o lenei, Tatou te ausia matatia maoae ma maualuluga mo tagata e iai manaoga faapitoa, pe a o tatou galulue faatasi, faapaaga.”
“Tatou te ausia foi matatia maoae pe afai tatou te amatamea, i tatou ua silafia le feagaiga. Tatou amatamea i le faalauiloaina o le feagaiga. Tatou amatamea i le faatāuaina o tagata e iai manaoga faapitoa ma a latou aiā tatau o latou manatu ma o latou leo ia tatou faaiuga, ona faigofie foi lea ona taliagofie e le lautele la tatou tuualalo i le taimi e faalauiloa ai le feagaiga.”
“E toe faaluaina le agaga faafetai i le malo, i lana faaaeaea maualuga, aemaise le matagaluega o tina ma tamaitai atinae o nuu ma afioaga, aga fesootai, i lo outou fitaituga i tapenaga uma.”
“E momoli foi le agaga faafetai ia tatou paaga uma, e pei o le malo mai fafo, ua tuu mai le tau‘au tatou te tulei faatasi galuega faalauiloa mo tagata e iai manaoga faapitoa i Samoa. Faafetai i lo tatou atunuu, mai lava i le aufaigaluega paia a le Atua o tupu ma ee e oo lava i le lautele, ona o lo outou fesoasoani ia i matou o tagata e iai manaoga faapitoa, o a outou tatalo ma tapuaiga ina ia manuia o matou faiva.”
“E fia momoli faapitoa le faamalo i o matou uso faalapotopotoga mo tagata e iai manaoga faapitoa. Loto Taumafai, aoga Fiamalamalama, Senese, Spinal Network, faalapotopotoga i latou e po le vaai, Special Olympics Samoa. Ou te lē fia ta‘u paagaina outou.”
“Ona o lenei le itu. O uo ma paaga mo aso uma, ae o uso mo aso vale. O uso foi e tasi le aluga, fala ma le ieafu, pei ona tasi ai lo tatou faasinomaga tatou te lagolagosua mo tagata e iai manaoga faapitoa. Malo fai o le faiva, malo le galulue i la tatou pito laau tausoa faatasi.”
“E lē galo le faamalosiau ma le lagolago lē faatuaoia a nai o matou aiga, o la outou faamalosiau lava e lē aunoa, e maua ai le lototetele i le tele o taimi, e faaauau le galuega finau mo aiā tatau.”
“E muliai le faafetai ia i latou e iai manaoga faapitoa. Malo le finau, lele ua iite fanua alalo, ua sauni le malo e uunai polokalame ina ia o tatou saofaga faatasi i faamanuiaga uma e pei o isi tagata.
O le faamalosi, ia aua ne‘i gata le soifua finafinau. E lē pule le manaoga faapitoa ia oe ma a‘u, e mafai lava ona e filifili e te soifua faatasi ma lou manaoga faapitoa, i se soifuaga fiafia, ma le saoloto.”
