Na tauaofia ofisa ma matagaluega o tagata tafafao a atumotu eseese o le Pasefika i Saute i le aai o Melepone i le vaiaso na tuanai atu i lona Aso Faraile ma le Aso Toonai, e faalauiloa a latou manulauti ma anavatau, ma taumafai e faatau atu i kamupani ma faalapotopotoga eseese i le atunuu tele o Ausetalia.
O se tasi lenei o maketi tele pito i latalata atu i le Vasa Pasefika, ma e lē toe taufaailo le mafanafana o sootaga ma faigapaaga a le atunuu tele ma o tatou atumotu, o loo tele ai pea ina sasaa ona manuia mo nai ona uso laiti e pei foi ona iai lenei faamoemoe.
Na maua se feiloaiga ma le afioga a Afoa Amituanai Faleulu Mauli, le taitaifono o le matagaluega i Samoa ma ia saunoa ai o se avanoa tāua tele lenei mo le matagaluega, ona o Ausetalia sa maketiina lava ma faalauiloa e tamalii papalagi sa galulue faatasi ma le matagaluega, peitai o lea ua mae‘a tofia se tamalii Samoa le afioga ia Faalavaau Fasitau Ula, e galue ma avea ma faauluuluga o lea matagaluega i Ausetalia, ona ua finagalo le matagaluega e ao lava ona finau ma faalauiloa Samoa ia tatou lava tu ma agaifanua e o tatou lava tagata e mafai ai ona au la tatou inailau i nisi tulaga maualuluga.
Na tu matila le “Beautiful Samoa” le suafa ua faauluulu i ai faatosina ma le faalauiloaina o si o tatou atunuu pele e le matagaluega. Na ese mai ai lava i fale uma o isi atumotu ona sa tusia lava na o igoa o o latou atunuu. Na fesiligia le afioga ia Papalii Sonja Hunter le faauluuluga o tagata tafafao a Samoa ma le Pasefika atoa, ma ia saunoa ai o le igoa “Beautiful Samoa” poo “Samoa Lalelei” na autasi i ai finagalo o le afioga i le minisita ma le pulega, ina ua mae‘a le tele o a latou faatalanoaga ma tagata tafafao atu i Samoa pe o le ā sa latou silasila ia Samoa, ae o le tali lava e tasi na tuu atu, “so beautiful”.
Na saunoa foi Papalii e matuā moni le molimau a tagata tafafao, ona o o tatou tagata e lalelei uma, e lē gata o le tino a o loto ma agaga. O le vai‘aiga o le aoauli i le Aso Faraile na silasila maimoa ai papalagi i faafiafiaga mai atumotu o Toga Fiti ma Rarotoga a o tali le sua, ae o pese faalogologo i aso e lua o le faamoemoe na mātele lava i pese Samoa.
Saunoa le afioga ia Faalavaau Fasitau, o se laasaga lelei lenei mo le matagaluega aemaise o lea ua toe sauni atu e toe faalauiloa “Beautiful Samoa” i le vaiaso fou mo nisi kamupani i Melepone lava ona faasolo atu ai lea i le aai o Perisipeni ma Sini.
