Ua ave ai nei le faatāua ale komiti o tina ole afioaga o Vailoa Faleata i ana atinae oloo faia e faatatau ile puipuiga o lona gataifale. E talitonu le sui tamaitai ole malo i totonu ole nuu, le faletua ia Anna Mataiumu, o i tonu lava e fanau mai ai nisi o alagatupe o tatanu ele latou nuu ile togatogo lea e lua ituaiga oloo feola ai.
E faitau eka le sosolo ale togo ile gataifale o Vailoa. Ole atinae lenei ale komiti ua toe toto ai le togo ina ia fesoasoani e ufiufi ai vaega pa’umātu ole aloalo ua manu a’e e afua mai suiga ole tau, pe a oo ina pe eleele le tai. E le gata ai lena, ae ole taofiofia ai lea ole palapala tafea, faamalu ai taumafa o tatanu ai ile oneone pei o tugane, o ipo, asi, paalimago, ua, aemaise ole saga faalalata ane ai o i’a e tautuufua ai, e pei ole aua, lea a faasolo ina lapoa ma maua mai ai le anae.
Ole isi vaega o lea atinae, e pei ona tapena iai vaa paopao, ina ia mafai ai e tagata maimoa ile togatogo ona aloalo ile lanulauava o lona loloto. O paopao ole poloketi na fesoasoani mai ai Malo Aufaatasi, UNDP i ana polokalame atinae. Ole tolu ai lenei o tausaga talu ona galulue faatasi le UNDP ma le pulega ole nuu o Vailoa. Ina ua faamanuiaina ile mealofa tupe e $50,000USD talu mai le 2014. I sailiiliga na iloa ai na amata mea mai toeaiina ole nuu, na faamatuu mai ai le $20afe ile 2014, oo mai ile 2015 toe faaopoopo mai le isi $20afe, ma totoe mai ai loa le $10afe, lea ua faaaogā ele komiti a tina e ta ai paopao, ma fai ai le taligalu i fafo atu ole vaitaele, ile vaega e faaee ai paopao ma tuta mai iai. Ua faamautina mai ele Sui ole malo ile vaega o tamaitai, ole vaiaso fou lea ole a sosoo atu ai loa ma le fauina ole sima e toso mai ai vaa i luga ma faaee ai foi.
Ole totoina ole togatogo, lea na saunoa le faletua ia Anna oloo faaauau lava, auā e tofu lava le masina ma lona tai oo. E ta’i faalua ile masina ona alu le faamamāina ole gataifale ma tafāala, ma toto atu ai lava ma togo fou.
Taimi nei ua silia ile 60 aiga ole afioaga o Vailoa ua faasopolia i faamanuiaga e ala esese mai Malo Aufaatasi. E le gata ina unaia ai le ola ise siosiomaga mamā, soifua maloloina, ae o tupe maua ile agai atu ile lumanai.
Pei ona galulue ai nei kulupu o alii ma tamaitai talavou, e faatino galuega e maua ai tupe ina ia faatumauina pea le maua o taumafa ma tupe.
Na ia ta’ua foi e ta’i masina ma alu ana asiasiga i maota o aiga. Ina ia faamautinoa e mamā ma lelei le siosiomaga ole falekuka, le tunoa i fafo e fai ai suavai, ma ia faia ni togalaau’aina e ola faanatura, ma molimauina foi pe o aooga uma tamaiti e tatau ona o ile aoga, ae poo faapefea ona maua alagatupe a lea aiga ma lea aiga, mo le faatumauina ma le faaauau ai pea ona soifua manuia ma saoloto tagata mai faafitauli o aso uma pei ole popole i taumafa ma le soifua lelei.
Ile vaitaimi o taligamalo ale atunuu ole faamanatuina ole tutoatasi ia Iuni, na tulaga ese mai ai foliga vaaia ole afioaga o Vailoa, e le gata ina lanutasia le faiga o togalaau i tafāala ae ole laumamā e pei ona faaauau mai ai pea ile taimi nei.
I tulaga laalaa i luma o lea foi afioaga ole taulaga, ua maitauina ai le lelei tele ole sootaga ua faia nei ma Malo Aufaatasi, ile totogiina lea o latou i tupe ina ia mafai ai lava e latou ona soifua ma aua ne’i maua ile ola faalagolago.
