Toto‘a le sisila, siōa le aumaimoa a‘o alo Cornubia SDA i ona faiva

Autalavou Aso Fitu Samoa a Cornubia ia latou faafiafiaga sa fai ile po ole Aso Toonai, 26 o Novema
Autalavou Aso Fitu Samoa a Cornubia ia latou faafiafiaga sa fai ile po ole Aso Toonai, 26 o Novema

O Samoa i aso ua mavae a taunuu se koniseti faasavali ise nuu, sa pei ole faataliga ole tupu ile lolofi atu e fia maimoa i tapenaga aemaise lava la nuu i tuu auā ole a vaaia foi mata fou, tama ma teine fou i totonu o lea nuu. E lē toe alo tamala le aumaga ma le aualuma i lea foi vaega e pei ona silafia ele toatele o i latou na tutupu a‘e i Samoa.

Ia ua faapena uma lava tapisa ma le talanoa o tagata poo afea le aso ole koniseti ale ekalesia a Cornubia, lea ua aave atu tala e mananaia tele siva ma pese aemaise o talatuu ale atunuu ole a toe faamanatu a‘o faatinoina ele autalavou ale ekalesia.

O a latou teuga mananaia faasamoa, na vaaia lava le matuai lava tapena lelei, e muliga foi koniseti e fai i Samoa i aso la. Na faalogoina le magamaganū ma faapea tala a nisi taulelea “se aga o Samoa ua leva ga kau se kamaimaa ise pākua ose keine ole kogiseki pe kiga foi kaliga ile wistiwisti”. Masalo o manaoga nei ole aumaga ile afiafi ole Aso Toonai na tea nei ile lalelei tele o tamaitai ma tina aemaise alii ole ekalesia Aso Fitu Samoa a Cornubia.

E lē itiiti le taimi aemaise o tupe na faaaluina ele autalavou ile taumafai e faia le mea sili auā le faamatagofieina ole silamaimoa ale atunuu na auai atu. Ole ‘auga o aute ole faamoemoe, ole fia sailia ose seleni e lē gata ole faaleleiina ole malumalu ole Atua ale ekalesia ua mae‘a ona faatauina, ae ose pa e si‘o ai le fanua ale lotu ma le kāpaka, ole manaoga laualuga lea o lenei faafiafiaga ole “Fiafia Night” e pei ona faataunuuina.

E moni lava sa lagolago nai tina ia latou ausiva ma le ekalesia, ae sa pa‘ū lava le mamafa ma le tele o faafiafiaga i lea afiafi ole koniseti i faafiafiaga ma tala sa feagai ma le autalavou.

Ole taitai autalavou ole susuga ia Tui Utuloa Aifilifili Faaifo. Ole Faatamā ole autalavou, o ia foi le taitai toeaina sa feagai ma le a‘oina o talatuu faa-Samoa ma le tele o vaega ole koniseti ole susuga lea ia  Tuuu Talalelei Tuialii.

E 2 masina na a‘oina ai nei faafiafiaga ae na matuai maofa tagata ile faatumulia ile lava ole gagana Samoa na tautatala ai le autalavou e pei lava ni tamaiti na soifua a‘e i Samoa. Na manuia taumafaiga ale ekalesia ma tauaaoina se aao foai ole auvalaaulia e sili atu ile $14, afe tala. Na ole alalaga fiafia ole ekalesia ma faafoi le viiga ile Atua i lenei seleni tele ua latou mauaina.

E 23 matafale poo aiga sa lagolagoina lenei faamoemoe, ma na tagi lava i lima ma tapena mai e aiga taitaisi ile lotomalie le tele o taumafa sa tali ai le sua ale auvalaaulia i lea afiafi, e talamasinei ai foi le aao mafola e ala i seleni. Ole faafeagaiga ale Ekalesia Aso Fitu Samoa a Cornubia ole susuga ia Pr Ieti ma le faletua ia Alofa Ah Siu.

Ole Taitai Toeaina ole susuga ile toeaina ia Tuuu Talalelei Tuialii. Ole sui fesoasoani taitai o Alalatoa Siolo. Ole Failautusi ale ekalesia o Lama Tipoa‘i ma le Teutupe o Pr Ripine Rimoni.