E tolu vaega na faatāuaina i le Fonotaga a le Pulega o Faailoga ma Tusipasi Taualoa a Samoa (SQA) auā Aoaoga Faaauau i totonu o le atunuu (Post School Education and Training).
O ia vaega tāua e lua e aofia ai le faamalosia lea o le galulue faapaaga ina ia mafai ona siitia le tulaga o avanoa e avanoa ai tagata mo aoaoga faaauau.
O le lona lua, o le siitia lea o tulaga e ausia ai tulaga moomia (quality standards) i totonu o aoga faaauau.
Ma le mataupu mulimuli e talanoaina i le fonotaga, o le talanoaina lea ma faasoa e sui auai o le fonotaga o tulaga e fetaui ma faaleleia atili ai tulaga i aoaoga ina ia fetaui ma manaoga o tagata faipisinisi, manaoga o le Malo aemaise o manaoga o le tagata lava ia.
O lea fonotaga na faatautaia lea i le Maota Fono a Samoa (Samoa Convention Centre) i Sogi, i le Aso Tofi 29 Ianuari 2015.
O le lona lua ai lea o fonotaga faapenei, ma e lua aso na faatautaia ai, mai i le aso 29-30 Ianuari 2015.
I le saunoaga autu a le afioga i le Taitaifono o le Komiti Faafoe o le Pulega, Afioga Hinari Petana, na ia toe faapupula ai le tāua o vaega e lua e pei ona talanoaina i le fonotaga.
Na faaalia e le afioga i le Taitaifono e faapea, o le faatuina ai o le Pulega o Faailoga ma Tusipasi Taualoa a Samoa, o foliga vaaia lea o le naunautaiga o loo iai le Malo o Samoa, ina ia maua avanoa ma ia faamalosia le galulue faapaaga auā avanoa o tagata mo aoga faaauau.
O le tausaga e 2006 lea na faatuina ai le Pulega i ana taiala ma ana tulafono e limataitaiina ai ma faamalosia le Tulafono a le Pulega 2010.
E pei ona faailoa e le afioga i le Taitaifono nisi o vaega o loo nafa ma le Pulega, i le faatautaia lea o tulafono e fautuaina ai le Malo i tulaga tau i aoaoga faaauau.
E lē gata i lea ae o le faagaoia ma le faatulagaina o tusipasi i ona vaega ausia, o le faalauiloa lea o auala ma taiala e ala i le ola aoaoina aemaise o le mataitu lea o ituaiga aoaoga faaauau i totonu o le atunuu.
I le faataunuuina ai o ia vaega uma e pei ona ta‘ua, o se taimi e lē o toe mamao, ona faalauiloa lea e le Pulega o nisi o mataupu aemaise o luitau i totonu o Aoaoga Faaauau.
O le faaiuga o le fonotaga e pei ona faailoa e le afioga i le Taitaifono, o le a faailoa ai loa e le Pulega nisi o ana mataifaioi e faatino i le lumanai ina ia tumau ai pea le galulue faatasi ma ana paaga i le ausia lea o tulaga moomia ina ia faamalosia ma ausia le sini autu o le faamoemoe a le Pulega ma ana Paaga i tulaga mo aoaoga faaauau.
E pei foi ona faailoa e le afioga i le Ofisa Sili o Pulega, Afioga Fepuleai Sinapi Moli, o loo ave pea le faamuamua a le Pulega i atinae a le Malo e pei ona iai le faatāuaina o itu tau i aoaoga i totonu o le atunuu.
O sui auai o lea fonotaga e aofia ai Pulega aoga, sui o komiti a aoga, o sui mai pisinisi aemaise o nisi o faauluuluga o Matagaluega a le Malo, lea na latou saunia nisi o pepa e faamatala ma faailoa ai nisi o mataupu tāua mo aoaoga faaauau i totonu o Samoa.
