O teuteuga fou o le tulafono o faigapalota o loo tau faaofi e le Malo e ala mai i le afioga i le Minisita o Faamasinoga ma le ofisa o le Komesina o Faigapalota, na faaumiumi ai felafolafoaiga a le Palemene ina ua toe tauaofia le Fono Aoao Faitulafono i le vaiaso ua mavae.
O aiaiga fou o loo aofia i teuteuga ua faapea mai e tatau ona tolu tausaga o le tautua i le nuu a se matai Samoa ona faatoa agavaa lea e avea ma sui faatu poo se sui tauva i palota e filifilia ai tofi faipule, na sili ona malomaloa ai finagalo o faipule o le Itu agai.
O le mau a le taitai o le Itu agai o se teuteuga o le a noatia ai avanoa o tamaitai e avea ma faipule aemaise o le a lē paleni le aiaiga ma se tagata faatoa lua tausaga talu ona matai ae fia alu i le palota, ae faitau ane tausaga talu ona tautua i le nuu e lei atoa le tolu tausaga.
O se isi atugaluga o tagata o loo alala i isi nuu ma afioaga ae matai i se isi nuu o se itumalo o le a fia tauva ai, o le a noatia lona tulaga agavaa ma e faapea mai le taitai o le Itu agai o le a afaina ai le aiā tatau o lena tagata ua umia se suafa matai.
O le finagalo o le faipule o Faleata i Sasae le afioga Aveau Niko Palamo, e fai si felefele ma lautele o le uiga o le upu tautua, ona o se matai e lei atoa le tolu tausaga o le tautua i le nuu pe a fua i le teuteuga, o le a lē mafai ona tauva peitai sa tautua ona tuaa ma aiga i le nuu tainane foi e lē tasi se ituaiga o tautua.
E manatu le faipule pe lē tatau ona faamanino tonu le teuteuga i le aveese o le upu tautua ae tuu i ai le upu monotaga, ona manino lea o le matai ma lana monotaga i le nuu. Na fefeu felafolafoaiga ona o itu i le faauigaina e faipule o le teuteuga.
Fai mai nisi finagalo o faipule afai o le faamatai o loo faamamafa i le agaga o le teuteuga, e ao ona toe foi i tua i le palota na o matai e saili ai tofi faipule o le Palemene e pei o le mea sa sau ai muamua.
Fai mai foi nisi faipule o le faamatai e eseese ma le faatemokarasi mai fafo. Peitai na saunoa le minisita o le tāua o le faamatai o le fai o le tautua, ae e ioe Fiame i finagalo o nisi faipule sa latou ta‘ua le silafia lelei e tagata o le nuu ma matai o se afioaga o le tagata e alu i le palota ae leai se tautua, e leai se isi e palota i ai.
O loo vaogata foi lagona o nisi faipule ona o lo latou talitonuga o se aiaiga ua faia faapitoa mo ē o loo tautua i nuu ae valiano ai matai o loo nonofo i isi nuu e lē o iai se tautua i le nuu o loo suafa matai ai.
Na faamanino e nisi faipule o le matai o le meatotino a se aiga ae lē o se nuu. O lea ua toe see atu le teuteuga i se komiti a le Palemene mo nisi iloiloga ma tatala ai le avanoa i le atunuu mo ni manatu faaalia a o lei toe foi atu i le Palemene mo le faitauga faatolu.
