O lana solitulafono na faia o le faatamaia oni manu papalagi se tolu, ae lua na fasi ma ave faatau, sa manatu e maua ai se faamanuiaga, mulimuli ane ina ua maua lana gaioiga na faia ma molia ai e leoleo e pei ona faamaonia lona moliaga, ua tele ai lona tigaina. Ose isi faaupuga e pei ona saunoa le afioga ile Faamasino Sili, Patu Tiava’asu’e Falefatu Sapolu, sa faapea e maua ai sona manuia ae o lea ua mafatia ma tigaina ai.
O ana tupe ua alu ma isi meatotino a lona aiga ua sili lea ona ogaoga mo lona tagata ua matua ua 67 tausaga o le soifua ma ua aafia foi ini gasegase. O itu ia na silasila iai le faamasinoga mo sana faaiuga ile afioga Le Mamea Emosi Puni, ona o lona faatamaia oni manu papalagi oni meatotino a le susuga Siaosi Apelu o se tasi o tama talavou o lo latou afio’aga o Pu’apu’a lea sa faatino ai le solitulafono.
O le togisala a le nuu ile afioga Le Mamea Emosi e selau aumatua, ose isi itu lelei mo ia lea sa ia ave ai manu papalagi poo ni povi tetele se lua, lima sefulu pusa’apa ma se ie tele. Faaopoopo iai ma le lua afe tala na ia ave ile aiga o Siaosi Apelu ae sa faataamilo le faaupuga o le seleni e faapea e fesoasoani ai ile maliu o le uso o le e ana povi, ma le tamai povi lea ua taui ai manu na faatamaia. O le silasila a le faamasinoga ua sili atu ona tigaina ai le ua molia ma ua le talafeagai ai se faasalaga faafalepuipui.
O le solitulafono o le faatamaia o meaola e pei o povi ma meaituaolo a nisi tagata e ogaoga tele ile tulafono. Peitai o le faasalaga sa iai muamua o le sala tupe ae o le suiga fou o le tulafono o soligatulafono o lea ua ogaoga ai tele lenei solitulafono ma e fitu tausaga ile falepuipui le faasalaga maualuga pe a faamaonia. O le silasila a le faamasinoga ua talafeagai se sala tupe lea e tasi le afe tala na faatonu nate totogi i totonu o le fitu aso, a le usitaia ua tofu i Tafaigata mo le ono masina.
Na faaalia e Siaosi Apelu ina ua maea ona lau le faasalaga, ua na talia le faaiuga ua iai, ae talosia ia tuu ai lenei solitulafono. Ua alofa foi i le ua molia o se tagata ua matua le soifua aemaise o le igoa tauleleia o lo latou nuu ua ta’uvalea ona o lenei mataupu ua salalau solo tala ile gaioiga na faia e Le Mamea Emosi.
O le sala tupe e tasi le afe, o le a tuuina atu ai le $400 tala e faaatoa ai le tau o manu papalagi e tolu a Siaosi na aafia, ae o le $600 tala e alu ile totogi o le faamasinoga.
O lea tamalii na magalo mai le falepuipui ile masina o Tesema o le tausaga ua mavae lea sa nofosala ai mo le 12 masina ona o le faamaonia o lona moliaga o le faaoolima mataga ise tamaitai.
O se solitulafono na ia faia ao avea ma fomai lea sa ia pulea ai le falemai tumaoti o le Medcen i Vailima. Ua le toe avea ma foma’i ma ua aveese uma ona tusi tofiga o lea tomai faapitoa ona o le solitulafono ua faamaonia.
O tesema 2012 na magalo ai, ae oo mai ile masina o Fepuari o le tausaga nei 2014, tulai mai le solitulafono faasino i manu papalagi ua toe aafia ai.
